လက်ရှိနွေရာသီ အပြောင်းအရွှေ့မှာတော့ အရှိန်မြှင့် ကြိုးစားလာခဲ့ပြီး ဘိုင်ယန်မြူးနစ်က ဟယ်ရီကိန်းအတွက် ပြောင်းရွှေ့ကြေး ယူရိုသန်း (၇၀) နဲ့ စတင် ကမ်းလှမ်းခဲ့ပါတယ်။ ဒီကမ်းလှမ်းမှုကို စပါးဘက်က ငြင်းဆန်ပယ်ချလိုက်ပေမယ့် ဘိုင်ယန်မြူးနစ်ကတော့ ဆက်လက် ကြိုးစားသွားဖို့ အစီအစဥ် ချမှတ်ထားပြီးဖြစ်ပါတယ်။

စပါးဥက္ကဌ လီဗိုင်းဟာ ဟယ်ရီကိန်းကို လုံးဝလက်မလွှတ်လိုဘဲ လွန်ခဲ့တဲ့ နှစ်နှစ်ကလည်း မန်စီးတီးတို့ ဟယ်ရီကိန်းအတွက် ပြောင်းရွှေ့ကြေး ပေါင်သန်း (၁၀၀) အထိ ပေးခဲ့သည့်တိုင် ရောင်းချဖို့ ငြင်းဆန်ခဲ့ပါတယ်။ အခုချိန်မှာလည်း အိုဟားရားက ဟယ်ရီကိန်းအနေနဲ့ ဘိုင်ယန်မြူးနစ်ကို ပြောင်းရွှေ့မယ်ဆိုရင် တစ်ဆင့်နိမ့်သွားသလို ဖြစ်နိုင်ကြောင်း သတိပေးပြောကြားခဲ့ပါတယ်။

ပရီးမီးယားလိဂ်ဟာ ရုပ်သံဝင်ငွေနဲ့ စပွန်ဆာကြေးတွေအရ ကျန်တဲ့ ထိပ်သီးလိဂ်အားလုံးထက် ခေါင်းတစ်လုံး အသာရရှိနေပြီး တန်းဆင်းသွားတဲ့ အသင်းတွေရဲ့ တစ်ရာသီဝင်ငွေတောင်မှ အခြားလိဂ်တွေရဲ့ ထိပ်တန်းအသင်းကြီးတွေရဲ့ တစ်ရာသီစာဝင်ငွေထက် ပိုမိုများပြားနေပါတယ်။ ဒါပေမယ့်လည်း အခုချိန်မှာတော့ ဟယ်ရီကိန်းကိုယ်တိုင်ကပါ အသင်းပြောင်းဖို့ ဆန္ဒရှိလာခဲ့ပြီး စပါးနဲ့ ဘိုင်ယန်မြူးနစ်သာ သဘောတူညီမှုရရှိခဲ့ရင် ဘွန်ဒက်စ်လီဂါကို သေချာပေါက် ပြောင်းရွှေ့သွားမှာ ဖြစ်ပါတယ်။