ဇေရဲထက်ကတော့ သူ့ရဲ့ ချစ်သူနဲ့ အတူ ဒေါ်ခင်ကြည်ဖောင်ဒေးရှင်းမှာ ဆန်အိတ်(၁၀၀) အိတ် လှူဒါန်းခဲ့တဲ့အကြောင်း ပြောပြလာပါတယ်။ 

သရုပ်ဆောင် ဇေရဲထက်ကတော့ COVID-19 ကာလမှာ ဆင်းရဲနွမ်းပါးသူတွေအတွက် စားနပ်ရိက္ခာအလှူအဖြစ် ဧပြီလ (၈) ရက်နေ့က ဒေါ်ခင်ကြည်ဖောင်ဒေးရှင်းမှာ ဆန်အိတ်(၁၀၀) လှူဒါန်းခဲ့တဲ့အကြောင်း Duwun Media ရဲ့ ဖုန်းဖြင့်ဆက်သွယ်မေးမြန်းတဲ့ အင်တာဗျူးကနေ ဖြေဆိုခဲ့ပါတယ်။ 

“ COVID-19 ရောဂါပိုးဖြစ်နေတဲ့အချိန်မှာ ဆင်းရဲနွမ်းပါးသူတွေအတွက် ကိုယ်တတ်နိုင်သလောက် လှူဒါန်းခြင်းဖြစ်ပါတယ်။ အမေစုကိုလည်း အရမ်းချစ်တယ်။ ပြည်သူတွေအတွက် ကူညီပေးမယ့် အစီအစဉ်စာလေး တတ်လာကတည်းက ကျွန်တော့် စိတ်ထဲမှာ တကယ်ကို လှူချင်စိတ်ဖြစ်လာတဲ့အတွက် လှူတာပါ။ အစကတော့ ဆန်အိတ်(၅၀) လှူမယ်ပေါ့။ ဒါပေမယ့် ကျွန်တော့်ရဲ့ ချစ်သူကလည်း ဆန်အိတ်(၅၀) ပါဝင်ချင်ပါတယ်ဆိုတာနဲ့ နှစ်ယောက်ပေါင်း ဆန်အိတ်(၁၀၀) ဖြစ်သွားတာပါ" လို့ ဆိုပါတယ်။ 

ဇေရဲထက်ဟာ နှာခေါင်းခွဲစိတ်မှု လုပ်ထားတဲ့ ချုပ်ရိုးတွေဟာ အနာမကျက်သေးတာကြောင့် ဒီအလှူမှာ ကိုယ်တိုင်ကိုယ်ကျ ပါဝင်နိုင်ခဲ့ခြင်းမရှိဘူးလို့လည်း ဆိုပါတယ်။ 

" အလှူလုပ်တယ်ဆိုရင် ကျွန်တော်က ကိုယ်တိုင်လုပ်ရမှ ကျေနပ်တဲ့သူ။ အခုက ခွဲစိတ်ထားတဲ့ အနာကမကျက်သေးဘူး။ ဆရာဝန်ကိုယ်တိုင်ကလည်း ၂ လလောက်အပြင်မထွက်ပါနဲ့လို့ ပြောထားတယ်။ ချုပ်ရိုးကလည်း မဖြည်ရသေးတဲ့အချိန်မှာ ပိုးဝင်မှာလည်း စိုးတယ်။ ဒါကြောင့် ဒီအလှူမှာ ကျွန်တော့် ပရိသတ်တွေအားလုံးကို အကူအညီတောင်းပြီးတော့ သွားလှူပေးဖို့ ပြောခဲ့တာပါ" ဆိုပြီးတော့ ဧပြီလ ၈ ရက်နေ့က ဒေါ်ခင်ကြည်ဖောင်ဒေးရှင်းအလှူလုပ်ရင်း ဖြေဆိုခဲ့တာပါ။ 

Photo: Zay Ye Htet

ကမ္ဘာတစ်ဝှမ်းမှာ ဖြစ်ပေါ်နေတဲ့ COVID-19 ရောဂါကြောင့် စားနပ်ရိက္ခာအတွက် အခက်အခဲ ဖြစ်နေသူတွေ အများကြီးပါပဲ။ ဒါကြောင့် အနုပညာရှင်များကလည်း စားနပ်ရိက္ခာတွေကို တစ်ဖက်တစ်လမ်းက တတ်နိုင်တဲ့ အင်အားနဲ့ လှူဒါန်းနေကြတာကိုလည်း တွေ့ရပါတယ်။ အခုဆိုရင်တော့ မြန်မာနိုင်ငံအတွင်းမှာ COVID-19 ကူးစက်ခံရသူ (၂၂)ဦးရှိပြီဖြစ်ပြီး သေဆုံးသူ (၃) ဦးရှိခဲ့ပြီလို့ သိရပါတယ်။ 

Photo: Zay Ye Htet

ဇေရဲထက်ကိုတော့ ဗီဒီယိုဇာတ်ကားတွေကနေတဆင့် ပရိသတ်တွေ စတင်သိရှိလာတာ ဖြစ်ပါတယ်။ သူ့ရဲ့ ရုပ်ရည်ချောမောမှုကြောင့် မိန်းကလေးပရိသတ်တွေအခိုင်အမာ ရရှိလာပါတယ်။ အဲဒီနောက်မှာတော့ TV ကြော်ငြာတွေ အဆက်မပြတ်ရိုက်ကူးလာရပြီး အခုဆိုရင်တော့ အောင်မြင်တဲ့ မင်းသားတစ်ယောက်ဖြစ်လို့နေပါပြီ။ သူ့ရဲ့အနုပညာသက်တမ်းကလည်း ၁၀ စုနှစ်ခန့်ရှိလာပြီဖြစ်ပါတယ်။ လက်ရှိအချိန်ထိလည်း အနုပညာအလုပ်တွေကို တစိုက်မတ်မတ်လုပ်ကိုင်နေတာ တွေ့ရပါတယ်။