အာဆင်နယ်ကနေ ဘာစီလိုနာကို ပြောင်းရွှေ့ခဲ့ပြီးနောက် အော်ဘာမီယန်ကတော့ ထိန်းလို့သိမ်းလို့မရအောင်ကို ခြေစွမ်းတွေပြနေပါတယ်။ ဂါဘွန်တိုက်စစ်မှူးဟာ မနေ့က ကစားခဲ့တဲ့ အိုဆာဆူနာနဲ့ပွဲမှာလည်း အသင်းအတွက် အနိုင်ဂိုးတဂိုးထပ်သွင်းယူပေးခဲ့ပြီး ဘာကာဂန္ထဝင်ကစားသမားတချို့ရဲ့ မှတ်တမ်းတွေကိုပါ လိုက်မီသွားခဲ့ပြီဖြစ်ပါတယ်။
ဘာစီလိုနာက ၄-၀ နဲ့ အနိုင်ရရှိခဲ့ရာမှာ အော်ဘာမီယန်က တတိယမြောက်ဂိုးကို သွင်းယူပေးခဲ့တာလည်းဖြစ်ပါတယ်။ ဒီဂိုးကတော့ သူ့အတွက် လာလီဂါမှာ ၆ ပွဲကစားအပြီး ၅ ဂိုးမြောက်သွင်းဂိုးဖြစ်လာခဲ့ကာ ပြိုင်ပွဲစုံ ၉ ပွဲမှာ ၆ ဂိုးအထိ ရရှိစေခဲ့ပြီလည်းဖြစ်ပါတယ်။ အာဆင်နယ်အတွက် ၁၄ ပွဲကစားပေးခဲ့ရာမှာ ၄ ဂိုးသာရရှိခဲ့ပေမယ့်လည်း လာလီဂါမှာတော့ ၆ ပွဲကစားအပြီးမှာပဲ ဂိုးပိုရခဲ့တာလည်းဖြစ်ပါတယ်။
အိုဆာနဲ့ပွဲမတိုင်ခင်မှာ ဘာကာအတွက် သူက ဗလန်စီယာနဲ့ပွဲမှာ ၃ ဂိုး၊ ဘီလ်ဘာအိုနဲ့ပွဲမှာ ၁ ဂိုး၊ နာပိုလီနဲ့ပွဲမှာ ၁ ဂိုးသွင်းယူပေးထားပြီးဖြစ်ပါတယ်။ ဒါကြောင့်လည်း သူက ဘာစီလိုနာအတွက် လိဂ်ပွဲ ၆ ပွဲကစားအပြီးမှာ ၅ ဂိုးသွင်းယူခဲ့ကြတဲ့ ဇလာတန်၊ ရော်နယ်ဒို၊ ယိုဟန်ခရိုက်၊ ရိုမာရီယို၊ ရော်နယ်ကိုးမန်း၊ ဟန်စ်ခရန်ကယ်လ်၊ ဆန်ဒါကော့စစ်တို့ရဲ့ စံချိန်တွေကို လိုက်မီခဲ့ပြီလည်းဖြစ်ပါတယ်။
အာဆင်နယ်မှာ စည်းကမ်းပိုင်းဆိုင်ရာပြသနာတွေကြောင့် အသင်းနဲ့လမ်းခွဲခဲ့ရတဲ့ အော်ဘာမီယန်ကို ဘာကာကအလွတ်ခေါ်ယူနိင်ခဲ့တာလည်းဖြစ်ပါတယ်။ အခုအခါမှာ ကစားသမားက ခြေစွမ်းတွေပြသနေတာမို့ သူတို့အတွက် မှန်ကန်တဲ့ခေါ်ယူမှုတခုဖြစ်လာတယ်လို့ ဆိုရမှာဖြစ်ကာ ဇာဗီရဲ့အသင်းက နိုင်ပွဲတွေ ခပ်စိတ်စိတ်ရယူနေခဲ့ပြီး အမှတ်ပေးဇယားတတိယနေရာမှာ ရပ်တည်နေပြီဖြစ်ပါတယ်။