ပါဗယ် ဒူးရော့ဗ်ပြောပြတဲ့ ဘာကိုတန်ဖိုးထားသင့်သလဲဆိုတဲ့ အချက်တွေ

ရုရှားဘီလျံနာလည်း ဖြစ်သလို Telegram တည်ထောင်သူနဲ့ အမှုဆောင်အရာရှိချုပ်လည်း ဖြစ်တဲ့ ပါဗယ်ဒူးရော့ဗ်ဟာ သူ့ရဲ့ ၃၇ နှစ်ပြည့်မွေးနေ့မှာ မှတ်သားစရာအကြံဉာဏ်တချို့ မျှဝေခဲ့ပါတယ်။

           ၁၉၈၄ ခုနှစ် အောက်တိုဘာ ၁၀ ရက်နေ့ဖွား ပါဗယ်ဒူးရော့ဗ်ဟာ နာမည်ကျော် လူမှုကွန်ရက်ဆိုဒ်တစ်ခုဖြစ်တဲ့ VK နဲ့ Telegram Messenger တို့ကို တည်ထောင်ခဲ့တဲ့ လူချွန်တစ်ဦးလည်း ဖြစ်ပါတယ်။ VK ကို သူ့အသက် ၂၂ နှစ်အရွယ်မှာ တည်ထောင်ခဲ့တာဖြစ်ပြီး Telegram ကိုတော့ သူ့အသက် ၂၉ နှစ်အရွယ် ၂၀၁၃ ခုနှစ်မှာ သင်္ချာပညာရှင်နဲ့ ပရိုဂရမ်မာဖြစ်တဲ့ သူ့အကို နီကိုလိုင် ဒူးရော့ဗ်နဲ့အတူ တည်ထောင်ခဲ့တာပါ။



           အခုနှစ် အောက်တိုဘာ ၁၀ ရက်နေ့မှာ အသက် ၃၇ နှစ် ပြည့်သွားပြီဖြစ်တဲ့ ပါဗယ်ဟာ သူ့ရဲ့ Telegram Channel ကနေ သူဖြတ်သန်းခဲ့တဲ့ ၃၇ နှစ် ဘဝအတွေ့အကြုံကနေ ရတဲ့ သင်ခန်းစာတချို့ကို မျှဝေခဲ့ပါတယ်။ ၃၇ ပြည့်မွေးနေ့အတွက် သူ့ရဲ့ အကြံပေးချက်ကို 3+7 အကြံပေးချက်လို့ ဆိုနိုင်ပါတယ်။


Photo: Evening Standard


           “”ကျွန်တော် အသက် ၃၇ နှစ် ရှိပြီဆိုတော့ ဘဝမှာ အရေးပါသလောက် တန်ဖိုးထားမခံရတဲ့ Undervalued ဖြစ်နေတဲ့အရာ ၃ ခုနဲ့ လိုတာထက်ပို တန်ဖိုးထား (Overvalued ) လုပ်နေကြတဲ့ အရာ ၇ ခုအကြောင်း စာရင်းလေး လုပ်ထာပါတယ်။” လို့ ပါဗယ်ဒူးရော့ဗ်က သူ့ချန်နယ်မှာ ရေးထားပါတယ်။

           သူရဲ့ တန်ဖိုးထားမှု လျော့နေကြတဲ့ Undervalued စာရင်းမှာ ပါတဲ့ ပထမဆုံးအကြံပေးချက်က "အိပ်စက်မှု"ပါတဲ့။ ဒူးရော့ဗ်ရဲ့ အဆိုအရ Sleep ဟာ ကျွန်တော်တို့ဘဝမှာ အရေးပါပြီး တန်ဖိုးထားမခံရဆုံးအရာတွေထဲမှာ ထိပ်ဆုံးက ပါနေတယ်လို့ ဆိုပါတယ်။ “”အိပ်စက်မှုက လူရဲ့ကိုယ်ခံအား ၊ ဖန်တီးနိုင်စွမ်းနဲ့ စိတ်ပိုင်းဆိုင်ရာ ချမ်းသာမှုကို မြှင့်တင်ပေးနိုင်စွမ်းရှိပါတယ်” လို့ သူက ရေးပါတယ်။

           ဒုတိယအချက်က “သဘာဝ” ဖြစ်ပါတယ်။ “သဘာဝဆိုတာ ကျွန်တော်တို့တွေ ဇီဝဗေဒသဘောအရ ချမ်းမြေ့ပျော်ရွှင်စွာ နေနိုင်အောင် ဒီဇိုင်းထုတ်ထားတဲ့ ပတ်ဝန်းကျင်တစ်ခုပါ။”လို့ ဒူးရော့ဗ်က ဆိုပါတယ်။ Undervalued ကဏ္ဍမှာ တတိယနဲ့ နောက်ဆုံးအချက်က ”တစ်ကိုယ်တော် ဧကစာနေခြင်း”လို့ သူက ပြောပါတယ်။ ဧကစာနေခြင်းဆိုတာ သူ့အလိုအရတော့ “ စိတ်ဝိညာဉ်နဲ့ ဉာဏ်ရည်ဉာဏ်သွေးဆိုင်ရာ ပွင့်လန်းမှုဖြစ်လာဖို့ လွတ်လပ်မှုတွေ ပေးတဲ့အရာ” လို့ ဆိုပါတယ်။

           ဒူးရော့ဗ်အမြင်အရ လူတွေရဲ့ဘဝမှာ လိုတာထက် ပိုတန်ဖိုးထားနေကြတဲ့ Overvalued ကဏ္ဍမှာ နံပါတ်တစ်က “မြို့ကြီးတွေ”အဖြစ် ဖော်ပြထားပါတယ်။ “မြို့ကြီးပြကြီးတွေက ညစ်ညမ်းမှုတွေ ၊ ရာဇဝတ်နဲ့ ဆူညံသူတွေရဲ့ အရင်းအမြစ်တွေပါ။ မြို့ပြရဲ့ အရင်းအမြစ်တွေ ရယူတာ ကောင်းပါတယ်။ ဒါပေမယ့် မြို့ပြနယ်နိမိတ်နဲ့အပြင်ဘက်မှာ နေထိုင်ဖို့ အကြံပေးချင်ပါတယ်။ ”။ ဒုတိယ Overvalued တစ်ခုက “စားသောက်ဆိုင်တွေ”ဖြစ်ပါတယ်။ “စားသောက်ဆိုင်တွေက စားသောက်ဖို့အတွက် အနှေးဆုံးနဲ့ ထိရောက်မှုအနည်းဆုံးနည်းနဲ့ ဝန်ဆောင်မှုပေးနေကြပါတယ်။ အိမ်မှာ ချက်ပြုတ်စားသောက်ခြင်းက ကျန်းမာရေးနဲ့ပို ညီညွတ်တဲ့ အာဟာရဓါတ်တွေ ရပြီး ပါဝင်ပစ္စည်းပေါ်မှာလည်း ကိုယ့်ဘာသာ ပိုပြီးထိန်းချုပ်မှုရစေနိုင်ပါတယ်။” ။

           တတိယအချက်က “ပူပြင်းတဲ့ ရာသီဥတု”ဖြစ်ပါတယ်။ “ပူပြင်းပြီး နေသာတဲ့ ရာသီဥတုက သတိလက်လွတ်နေထိုင်မှုကို ဖြစ်စေရုံတင်မဟုတ်ဘဲ ကင်ဆာနဲ့ အိုမင်းရင့်ရော်မှုကို ဖြစ်စေနိုင်ပါတယ်။ အေးမြတဲ့ရာသီဥတုက စိတ်နဲ့ကိုယ်ကို ကြည်လင်စေပါတယ်။”။ စတုတ္ထအချက်က “ဖက်ရှင်”ပါ။ “အမြဲပြောင်းလဲနေတဲ့ ခေတ်ရေစီးနဲ့ လိုက်ဖက်ဖို့ဆိုတဲ့ အဆုံးမရှိတဲ့ ခေတ်ရေစီးနောက်လိုက်ခြင်းတွေက ဈေးကြီးသလို လိုလည်း မလိုအပ်ပါဘူး။ သက်တောင့်သက်သာရှိတဲ့ အဝတ်အစားတွေပေါ် အာရုံစိုက်တာက အရေးပါတဲ့အရာတွေအတွက် ပိုနေရာပေးဖြစ်သလို ဘဝကိုလည်း ပိုရိုးရှင်းစေပါတယ်။”


Photo: fortune

 

           ပဉ္စမအချက်က “အိမ်ခြံမြေ”ဖြစ်ပါတယ်။ “အိမ်ဝယ်တယ် ခြံဝယ်တယ်ဆိုတာ လူတစ်ယောက်ချင်းစီရဲ့ ရွေးချယ်မှုတွေကို ကန့်သတ်လေ့ရှိပါတယ်။ မေးခွန်းထုတ်စရာကောင်းတဲ့ ရင်းနှီးမြှပ်နှံမှုတစ်ခုလည်း ဖြစ်ပါတယ်။ ငှားရမ်းခြင်းက မတူတဲ့နေရာတွေကို သွားပြီး ဖော်ထုတ်ဖို့အတွက် ပိုပြီး လွတ်လပ်မှု ပေးပါတယ်။”။ ဆဌမအချက်က “Social Media” ဖြစ်ပါတယ်။ “လူမှုကွန်ရက်ပေါ်ကနေ ကျွန်တော်တို့ စိတ်တွေထဲ ဒလဟော ဝင်လာတဲ့ အမှိုက်ထုတ်တွေက ပျော်ရွှင်မှုနဲ့ ဖန်တီးမှုကို လျော့ကျစေပါတယ်။ အင်တာနက်ဝန်ဆောင်မှုတွေကနေ အဆက်ဖြတ်ခြင်းက ကျွန်တော်တို့လုပ်နိုင်တဲ့ အကောင်းဆုံးအရာပါပဲ”

           နောက်ဆုံးအချက် Overvalued ဖြစ်နေတဲ့ အချက်အဖြစ် ဒူးရော့ဗ်ညွှန်းထားတဲ့ အချက်က “ဆယ်လီတွေရဲ့ အကြံဉာဏ်တွေ”ပါတဲ့။ “ကျော်ကြားတဲ့လူတွေက မကြာခဏဆိုသလို သူတို့ကျွမ်းကျင်တဲ့နယ်ပယ်ကို ဘောင်ကျော်ပြီး တလွဲအကြံတွေ ပေးလေ့ရှိပါတယ်။ ဘဝမှာ အရေးပါတဲ့ အရာအားလုံးအတွက် တကယ်လက်တွေ့ကျပြီး ကျွမ်းကျင်သူရဲ့ အမြင်ပဲ အားကိုးတာ အကောင်းဆုံး ဖြစ်ပါတယ်။ ”


ဆက်စပ်အကြောင်းအရာများ

Share

က္က