လီဗာပူးလ်ကစားသမားတွေ အောင်ပွဲခံနေတဲ့ အသံကို နားထောင်ခိုင်းခဲ့တာပါ။

မန်ချက်စတာယူနိုက်တက်နည်းပြကြီး အဲရစ်တန်ဟက်ဂျ်ကတော့ လီဗာပူးလ်ကို အရှက်တကွဲအကျိုးနည်းဖြစ်စေခဲ့တဲ့ ရှုံးပွဲနဲ့ ရင်ဆိုင်ခဲ့ရပြီးနောက်မှာ သူ့ကစားသမားတွေကို ကောင်းကောင်းကြီး ပညာပေးခဲ့ပြီဖြစ်ပါတယ်။ တန်ဟက်ဂျ်က ပွဲပြီးနောက်တနေ့မှာ သူ့ကစားသမားကို အနားမပေးခဲ့ဘဲ လေ့ကျင့်ရေးကွင်းဆီကို စောစောစီးစီးလာရောက်ခိုင်းခဲ့ပြီး သူကိုယ်တိုင်လည်း မနက် ၇ နာရီကတည်းက ရောက်ရှိနေခဲ့ပါတယ်။ ဒီနောက် ကစားသမားတွေအားလုံး မနက် ၉ နာရီအရောက် လေ့ကျင့်ရေးကွင်းကို ရောက်လာခဲ့ကြပါတယ်။

အဲဒီနောက်မှာ တန်ဟက်ဂျ်က လီဗာပူးလ်နဲ့ပွဲက သူ ရွေးချယ်ပြီး ထုတ်နုတ်ထားတဲ့ ရုပ်သံဗီဒီယိုကို ကစားသမားတွေဆီ ပြသခဲ့တယ်လို့ သတင်းရင်းမြစ်တခုက ဖွင့်ဟခဲ့ပါတယ်။ ဒါ့အပြင် နယ်သာလန်အားကစားစိတ်ပညာရှင်တဦးနဲ့လည်း တန်ဟက်ဂျ်က ဆွေးနွေးမှုတွေလုပ်ခဲ့ကာ အဆိုပါဆွေးနွေးမှုကနေ အသင်းအတွက် အကျိုးကျေးဇူးတွေရမယ်လို့လည်း မျှော်လင့်ထားကြောင်း သိရပါတယ်။ ကစားသမားတွေကိုလည်း တန်ဟက်ဂျ်က နောက်ထပ်နည်းလမ်းတခုနဲ့ ထပ်မံပြီးတော့ ပညာပေးခဲ့ပါသေးတယ်။

အဲဒါကတော့ လီဗာပူးလ်ကစားသမားတွေနဲ့ ပရိသတ်တွေ ကွင်းအတွင်း အောင်ပွဲခံပျော်ရွှင်နေတဲ့ အသံတွေကို နားထောင်ခိုင်းခဲ့တယ်လို့ Mirror က ဖော်ပြခဲ့ပါတယ်။ ကစားသမားတွေကိုလည်း နောက်ထပ်တကြိမ် ဒီလိုမျိုး အပြုအမူ၊ စိတ်ဓာတ်ပိုင်းနဲ့ ကစားမယ်ဆိုရင် အရံအသင်းဆီ ပို့ပစ်မယ်လို့ သတိပေးခြိမ်းခြောက်ခဲ့ကြောင်းလည်း သိရပါတယ်။ ဒီ သမိုင်းဝင်ရှုံးပွဲအတွက် တန်ဟက်ဂျ်က တော်တော်လေးဒေါသထွက်နေခဲ့ပြီး သူ့ကစားသမားတွေကို ပွဲအပြီးအင်တာဗျူးမှာလည်း လူသိရှင်ကြား ကြိမ်းမောင်းခဲ့တာဖြစ်ပါတယ်။

ယူနိုက်တက်ဟာ လာမယ့်ပွဲအဖြစ် ယူရိုပါလိဂ် ၁၆ သင်းအဆင့် ပထမအကျော့အဖြစ် လာလီဂါကလပ် ရီးရဲလ်ဘက်တစ်နဲ့ ကစားသွားရမှာဖြစ်ပါတယ်။ လီဗာပူးလ်နဲ့ ရှုံးပွဲကနေ ပြန်လည်ရုန်းထွက်နိုင်ဖို့အတွက် ဒီပွဲက သူတို့အတွက်အရေးပါနေပါတယ်။ အိမ်ကွင်းမှာ ကစားရမှာဖြစ်လို့ ယူနိုက်တက်အတွက် အခွင့်အရေးကောင်းရရှိထားကာ ကြီးမားတဲ့ရှုံးပွဲကနေ ရုန်းထွက်နိုင်မလားဆိုတာ စောင့်ကြည့်ရမှာဖြစ်ပါတယ်။ အဆိုပါပွဲမှာတော့ ကွင်းလယ်လူကက်စ်မဲရိုး ပါဝင်ဖို့ မသေမချာဖြစ်နေတယ်လို့လည်း သိရပါတယ်။

Share

Loading Next Article...
က္က