သရုပ်ဆောင်၊ အဆိုတော် စိုင်းစည်တွမ်းခမ်းကတော့ နာမည်ကြီး အဆိုတော် တစ်ယောက်နဲ့ ချစ်သူတွေ ဖြစ်ခဲ့တယ်ဆိုတဲ့ သတင်းတွေနဲ့ ပတ်သက်ပြီး ယခုလို ပြောပြခဲ့တာပါ။
Photo : Sai Si
မိန်းကလေး ပရိသတ်တွေရဲ့ အားပေးမှု အခိုင်အမာရရှိထားတဲ့ စိုင်းစည်တွမ်ခမ်းဟာ အနေအေးလွန်းတာကြောင့် တော်ရုံတန်ရုံ ကောလာဟလ သတင်းတွေ ၊ သတင်းအမှားတွေကို ပြန်လည် ဖြေရှင်းလေ့မရှိခဲ့ပါဘူး။ သူ့ရဲ့ အချစ်ရေးနဲ့ ပတ်သက်ပြီး ဝေဖန်ပြောဆိုမှုတွေ ရှိနေပေမယ့်လည်း ဝေဖန်တဲ့ ပရိသတ်တွေအတွက် ဗွေယူခြင်း မရှိခဲ့ပါဘူး။ ဒါပေမယ့် နာမည်ကြီး အဆိုတော် တစ်ယောက်နဲ့ ချစ်သူတွေ ဖြစ်ခဲ့တယ်ဆိုတဲ့ သတင်းနဲ့ ပတ်သက်ပြီး သူ့ရဲ့ စိတ်သဘောထားကို ယခုလို ပြောပြခဲ့ပါတယ်။
“သူများကိစ္စကတော့ ကိုယ့်ကို လာလာပြီးတော့ ပြောတာတွေ ခဏခဏ ကြုံရတယ်။ ကျွန်တော်ရဲ့ သက်တမ်း တလျှောက်လုံးပေ့ါ။ အဓိကက လူတွေက အွန်လိုင်းခေတ်လည်း ဖြစ်နေတော့ ထင်ရာမြင်ရာလေးတွေလည်း ပြောကြတယ်။ ကျွန်တော်ကတော့ ဘယ်လိုမှ သဘောမထားပါဘူး။ ကျွန်တော်တို့အနုပညာသမားဆိုတာ လူတွေ စိတ်အပန်းဖြေဖို့ လုပ်နေကြတာ ဖြစ်ပြီး အဲ့ဒီကနေ ရလာတဲ့ ပီတိကို စားရတာဆိုတော့ ကိုယ့်အကြောင်းပြောလို့ သူတို့ ပျော်ကြတယ်ဆိုရင်ပဲ ကျေနပ်ပါတယ်။ ဒါပေမယ့် သူများတွေ မင်္ဂလာယူ ပျော်တဲ့ရွှင်တဲ့အချိန်မှာ ကိုယ့်ကြောင့်မို့ စိတ်အနှောင့်အယှက် မဖြစ်စေချင်ပါဘူး။ ကိုယ့်နာမည်ပြောပြီး သူများစိတ်အနှောက်အယှက် မဖြစ်ရင်ဘဲ ရပါတယ်။ ကျွန်တော့်ကို ကြိုက်သလောက် ပြောလို့ ရတယ်” ဆိုပြီး ကောလာဟလ သတင်းတွေထွက်ပေါ်လာတာနဲ့ ပတ်သက်ပြီး ပြောပြခဲ့တာပါ။
Photo : Sai Si
အချစ်ရေးနဲ့ ပတ်သက်ပြီး ကောလာဟလ သတင်းတွေ ခဏခဏထွက်တတ်ပေမယ့်လည်း လက်ရှိမှာ သူနဲ့ ချစ်သူဖြစ်နေတာကတော့ အနုပညာနဲ့ သူရဲ့ ပရိသတ်တွေပါပဲတဲ့။
“လောလောဆယ် လက်ထပ်ထားတာတို့ ချစ်သူဖြစ်နေတာတော့ ဖန်တွေပဲ ရှိပါတယ်တဲ့၊ ကိုယ်ရဲ့ အနုပညာရယ် ကိုယ့်ရဲ့ ဖန်တွေကိုပဲ အပြည့်အဝချစ်ပေးနေပါတယ်။ ကိုယ့်ကိုလည်း သူတို့ ချစ်ကြတော့လေ ဒီလိုလေးနဲ့ပဲ အကြားကြီး နေသွားချင်ပါတယ်”လို့ သူက ဆိုပါတယ်။
လူပျိုကြီး လုပ်မလားဆိုတဲ့ မေးခွန်းအပေါ်မှာတော့ "လူပျိုကြီး လုပ်မလားဆိုတာကတော့ ဘုရားပေးတဲ့အချိန် ကိုယ်ကံပါတဲ့ အချိန်ဆိုရင်တော့ တစ်ခုခု အပြောင်းအလဲ ဖြစ်မှာပေ့ါနော်။ ကျွန်တော် ကိုယ်တိုင်လည်း သေချာမသိသေးပါဘူး” တဲ့။
စိုင်းစည်တွမ်ခမ်းကတော့ လက်ရှိမှာ ပရိသတ်တွေအတွက် သီချင်းအသစ်လေးတွေ ဖန်တီးနေတယ်လို့ ဆိုပါတယ်။ မျှော်နေကြတဲ့ ပရိသတ်တွေအတွက် သီချင်းအသစ်တွေ အမြန်ဆုံး ထွက်နိုင်အောင်လည်း ကြိုးစားသွားပ့ါမယ်လို့ Duwun က တစ်ဆင့် သတင်းကောင်းပါးခဲ့တာပါ။
စိုင်းစည်တွမ်ခမ်း(Sai Si Tom Khan) ကို တီဗီကြော်ငြာတွေ၊ မဂ္ဂဇင်းကာဗာတွေကနေတဆင့် ပရိသတ်တွေ စတင်သိရှိလာတာပါ။ ခန့်ညားကျော့ရှင်းတဲ့ ရုပ်ရှည်နဲ့ အရပ်အမောင်းကြောင့်လည်း မိန်းကလေးပရိသတ်တွေရဲ့ ပိုမိုအားပေးခြင်းကို ခံထားရသူတစ်ဦးလည်း ဖြစ်ပါတယ်။
Share