သမန်းတောထမင်းကြော်ဆိုင်လေးရဲ့ မူလအစ

ဒီဆိုင်လေးကတော့ မြင်းခြံမြို့နယ် သမန်းတောရွာဇာတိဖြစ်တဲ့ ဦးတင်မောင်ဝင်းဆိုသူက လွန်ခဲ့တဲ့ နှစ် (၂၀) ဝန်းကျင်လောက်မှာ စတင်ဖွင့်လှစ်ခဲ့တာပါ။ ငယ်စဉ်က အလုပ်မျိုးစုံကို လုပ်ခဲ့ဖူးသူဖြစ်ပြီး ဝါသနာပါတဲ့ ထမင်းဟင်းချက်ရောင်းတဲ့အလုပ်ကို လုပ်ဖို့ စိတ်ကူးမိရာကနေ ဆိပ်ကမ်းသာလမ်းမှာ သမန်းတောထမင်းကြော်ဆိုင်ဆိုပြီး စတင်ဖွင့်လှစ်ခဲ့တာပါ။

“ စစချင်းကတော့ ဆိပ်ကမ်းသာလမ်းမှာရောင်းတာ၊ ပေ ၂၀ ပေ ၄၀ လောက်ရှိတဲ့ မြေကွက်လပ်ပေါ်မှာ တဲကြီး ထိုးပြီးတော့ လယ်တောထဲမှာ စားရတဲ့ ပုံစံမျိုး လုပ်ထားတာပေါ့။ အဲဒါနဲ့ ဆိုင်ဖွင့်တာ (၁၅) နှစ်လောက်ကြာတော့ ရောင်းတဲ့နေရာက အဆင်မပြေတော့ ထမင်းရောင်းတဲ့အလုပ်ကို ခဏနားခဲ့တာပေါ့။ ” လို့ ဆိုင်ရှင် ဦးတင်မောင်ဝင်းက ဆိုပါတယ်။

နေရာပြောင်းလဲဖွင့်လှစ်လိုက်ပေမယ့် အောင်မြင်နေဆဲသမန်းတောထမင်းကြော်

“ တက္ကစီမောင်းလိုက်တာ (၇) နှစ် ကြာသွားတယ်။ မောင်းရင်းနဲ့ ဒီနားမှာ ဂိတ်ထိုးရင်း ဒီနေရာတစ်ဝိုက်မှာ ထမင်း၊ ဟင်း၊ စားကောင်းတဲ့ဆိုင် သိပ်မတွေ့ဘူး။ ကိုယ့်ပါးစပ်နဲ့ မထိဘူးပေါ့နော်။ အဲဒါနဲ့ ကိုယ့်လက်ငုတ်လက်ရင်း အလုပ်ဖြစ်တဲ့ ထမင်းကြော်ရောင်းတဲ့အလုပ်ကို ပြန်လုပ်မယ်ဆိုပြီး ဒီနေရာလေးမှာ ဆိုင်ထပ်ဖွင့်လိုက်တာ အခုဆို ၂ နှစ်ရှိပါပြီ” လို့ ဆိုပါတယ်။

ဟင်းချက်ရရင် ပျော်နေတဲ့ သမန်းတောသား

သမန်းတောသားတစ်ယောက်ဖြစ်တဲ့ ဦးတင်မောင်ဝင်းက ထမင်းဟင်းချက်ရောင်းရတာကို ဝါသနာပါတာကြောင့် ဘယ်လောက်ပဲ ပင်ပန်းနေပါစေ ဘယ်တော့မှ မညည်းညူဘဲ ဒီအလုပ်လုပ်ရတာကိုက ပျော်ရွှင်နေတယ်လို့ ဆိုပါတယ်။ ဒါကြောင့် ဒီနေ့အချိန်ထိ အရသာကို သူကိုယ်တိုင်စပ်ပြီး အမြဲတမ်းလက်ရာမပြောင်းအောင် ကြိုးစားနေတယ်လို့ ဆိုပါတယ်။

“ ဒီပညာကို ဝါသနာလည်းပါတယ်။ တတ်ကျွမ်းတဲ့ပညာလည်းဖြစ်တာဆိုတော့ နှစ်တွေ ဘယ်လောက်ကြာကြာ ဘယ်အချိန်ပဲလုပ်လုပ် ဒီပုံစံ ဒီအရသာပဲပေါ့နော်။ အရသာစပ်တာ၊ အသားတုံးတွေ တုံးတာက အစ ကျွန်တော်ပဲ လုပ်တာ။ ကျန်တာ ဟင်းမွှေတာကတော့ ဝန်ထမ်းတွေ လုပ်တယ်။ကိုယ်က ဘေးကနေ ကြည့်ပေးပြီး လိုတာပြောပေါ့။ ” လို့ ဦးတင်မောင်ဝင်းက ဆိုပါတယ်။

အဆက်ပြတ်သွားပေမယ့်လည်း ဖောက်သည်တွေတိုးလာနေဆဲ

ဆိုင်နေရာအသစ်လေးမပြောင်းခင်မှာ (၇) နှစ်နီးပါးလောက် အဆက်ပြတ်သွားပေမယ့် ဖောက်သည်တွေကတော့ သမန်းတောထမင်းကြော်ဆိုင်ဆိုတဲ့ ဆိုင်းဘုတ်လေးမြင်ရင် သတိတရနဲ့လာစားနေကြဆဲဖြစ်ပါတယ်။ နေရာသစ်မှာလည်း ဖောက်သည်တွေပိုးတိုးလာနေပြီး နေရာဟောင်းက စားသုံးသူတွေလည်း တကူးတကနဲ့လာစားတတ်ကြပါတယ်။

“ ဆိပ်ကမ်းသာမှာရောင်းတုန်းက တစ်ခါပြင်ကို တစ်ပွဲ (၅၀) ကျပ်နဲ့ စရောင်းဖူးတယ်တယ်။ အဲဒီတုန်းကဆိုလည်း အနုပညာရှင်တွေ လာစားကြတယ်။ အခုဒီနေရာမှာလည်း ဖောက်သည်အသစ်တွေတိုးလာတယ်။ သုဝဏ္ဏ ဆိုတစ်မြို့လုံးနီးပါး၊ သန်လျင်၊ ကျောက်တန်း၊ အင်းစိန်၊ စမ်းချောင်းကတွေလည်း လာစားကြတယ်။ ” လို့ဆိုပါတယ်။

တစ်နေ့ကို ဆန် (၂)အိတ်၊ ဝက်သား အချိန် (၃၀)ကုန်အောင်ရောင်းရ

ဆိုင်ဖွင့်တဲ့သက်တမ်း (၂) နှစ်အတွင်းမှာ တစ်နေ့ကို ဆန် (၂) အိတ်၊ ဝက်သားတစ်မျိုးတည်းကိုပဲ အချိန် (၃၀) လောက်ရောင်းရပါတယ်။ ဒီဆိုင်မှာရနိုင်တဲ့ ဟင်းပွဲအမျိုးအစားတွေကတော့ ဝက်ချို၊ အမဲနှပ်၊ ဆိတ်သားနှပ်၊ ဝက်ကလီစာ ၊ ကြက်ချိုပေါင်း၊ ကြက်အကြွပ်ကြော်၊ ဘဲဥ ၊ ငါးဖယ်၊ ငါးမွှေ တို့ဖြစ်ပြီး ဈေးနှုန်းတွေကတော့ ထမင်းကြော်နဲ့ဟင်းတစ်ပွဲကို ၂၀၀၀ ကနေ အများဆုံး ၃၈၀၀ ကျပ်ခန့်ဖြစ်ပါတယ်။ အရင်က ထမင်းကြော်နဲ့ဟင်းကို တစ်ပွဲ (၁၀၀၀) ကျပ်နဲ့ရောင်းချခဲ့ပေမယ့် ကုန်ဈေးနှုန်းတွေ မြင့်နေတာကြောင့်လည်း ဈေးနှုန်းလေးတွေ တိုးထားရတယ်လို့ဆိုပါတယ်။

သမန်းတောထမင်းကြော် မြည်းစမ်းချင်သူတွေအတွက်

ဒီဆိုင်လေးကတော့ သာကေတမြို့နယ်၊ ကမာကြည်တံတာအဆင်း ၊ သာကေတအဝိုင်းအနီး YOMA Bank ရှေ့တည့်တည့်မှာဖြစ်ပါတယ်။ ဆိုင်ဖွင့်ချိန်ကတော့ မနက်ဆို ၆ နာရီကနေ ၈ ခွဲ ထိတစ်ကြိမ်၊ ညနေ ၅ နာရီကနေ ၉ ခွဲထိ တစ်ကြိမ်ဖွင့်လှစ်ထားပါတယ်။ ထမင်းကြော်အိအိလေးပေါ်မှာ ဟင်းအနှစ်လေးဆမ်းပြီး နူးအိနေတဲ့ အသားဟင်းလေးတွေနဲ့ တွဲဖက်စားချင်သူတွေအတွက် သမန်းတောထမင်းကြော်ဆိုင်လေးကတော့ အသင့်တော်ဆုံးဖြစ်မှာပါ။ ဒါကြောင့်မို့ ထမင်းကြော်အရသာကောင်းကောင်းလေးစားချင်သူတွေအတွက် ဒီဆိုင်လေးကို တစ်ခါလောက်တော့ စားကြည့်ကြဖို့ ညွှန်းပေးလိုက်ပါတယ်နော်။