တနင်္သာရီတိုင်းအတွင်းမှာ ဒီနေ့ မေလ ၈ ရက်နေ့ကစပြီး Mask တပ်ပြီးမှ အပြင်သွားကြဖို့ တိုင်းကိုဗစ်ကော်မတီက ထုတ်ပြန်ထားပြီးပညာပေးအနေနဲ့ ဒီတစ်ရက်နှစ်ရက်အတွင်း Mask မတပ်ဘဲ သွားလာသူတွေကို Mask တွေ အခမဲ့ ဖြန့်ဝေပေးသွားမယ်လို့ မြိတ်မြို့နယ် လွှတ်တော်ကိုယ်စားလှယ် ဦးဇော်ဌေးပိုင်က ပြောပါတယ်။

“ ခရိုင်ကနေ မနေ့က အမိန့်ထုတ်ပြန်ထားပြီးဖြစ်တယ်။ ဒီနေ့က Mask တွေကို နေရာအလိုက် အလကားဝယ်ပေးတယ်။ ဒီတစ်ရက်နှစ်ရက်အတွင်းတော့ အသိပညာပေးမယ်။ ၃ ရက်မြောက်နေ့လောက်ကျရင်တော့ ဒဏ်ငွေ ၅၀၀၀ ဖိုး Mask ဝယ်ရမယ်လို့ စီစဉ်ထားတာ” လို့ ဦးဇော်ဌေးပိုင်က Duwun ကိုပြောပါတယ်။

Photo- Myat Ko Ko FB (မေလ ၈ ရက်မှာ မြိတ်မြို့အတွင်း Mask မတပ်သူများကိုစစ်ဆေးပြီး အခမဲ့ဝေပေးနေစဉ်။)

ပြီးခဲတဲ့ သင်္ကြန်ကာလအတွင်းနဲ့ ဧပြီလ ၁၀ ရက် က ကြေညာခဲ့တဲ့ ပိုးတွေ့လူနာအမှတ် ၂၅ဟာ မြိတ်မြို့ကမင်္ဂလာဆောင်တစ်ခုကိုလာသွားခဲ့တာကြောင့် သူနဲ့နီးစပ်သူ လူအယောက် ၁၅၀ ကျော်ကို အသွားအလာကန့်သတ်စောင့်ကြည့်ခဲ့တဲ့ဖြစ်စဉ်တွေ ရှိခဲ့တုန်းက ပြည်သူတွေက စိုးရိမ်တကြီးနဲ့ စည်းကမ်းလိုက်နာမှုတွေ ရှိခဲ့ပေမယ့် အခုနောက်ပိုင်းမှာတော့ လိုက်နာမှု အားနည်းခဲ့တယ်လို့လည်း သိရပါတယ်။

“ ဒီတစ်ပတ်အတွင်းမှာ တော်တော်များများ Mask မတပ်တာ များလာတယ်ပေါ့။ အဲဒါကြောင့် ကျွန်တော်တို့ အရှိန်မြင့်ပြီးလုပ်မှရမယ်ဆိုပြီး ဆုံးဖြတ်ပြီးတော့ ဒီလိုလုပ်တာပါ” လို့ ပြောပါတယ်။

လက်ရှိ မြန်မာနိုင်ငံရဲ့ ပိုးတွေ့ လူနာမရှိတဲ့ တိုင်းနဲ့ ပြည်နယ် (၅) ခုမှာ တနင်္သာရီတိုင်းလည်းပါဝင်နေတယ်လို့ ပြည်သူ့ကျန်းမာရေးဦးစီးဌာနရဲ့ အချက်အလက်တွေအရသိရပြီး အခုလို Mask မတပ်ရင် ဒဏ်ငွေကောက်ခံတာက တနင်္သာရီတိုင်းက ပထမဆုံးစတင်တာဖြစ်ပါတယ်။