ဒေါ်လာ ၄၄ ဘီလျံတန် ကုမ္ပဏီအရောင်းအဝယ်ကိစ္စကို ရှောင်လွှဲနိုင်ဖို့ အီလွန်မတ်စ်ဟာ Twitter ရဲ့ CEO ဖြစ်ခဲ့သူ ဂျက်ခ်ဒေါ်ဆီကို သက်သေအဖြစ် တင်သွင်းလိုက်တယ်လို့ ဆိုပါတယ်။ 

မတ်စ်ဘက်ကလည်း သူ့မိတ်ဆွေလည်း ဖြစ်သလို ၂၀၀၆ ခုနှစ်မှာ Twitter ကို စပြီး တည်ထောင်ခဲ့သူတွေထဲက တစ်ဦးလည်း ဖြစ်တဲ့ ဂျက်ခ်ဒေါ်ဆီကို သက်သေအဖြစ် တင်သွင်းသွားမှာပါ။ Twitter CEO ဟောင်း ဂျက်ခ်ဒေါ်ဆီဟာ လူမှုကွန်ရက်ပလက်ဖောင်းပေါ်က bots နဲ့ spam အကောင့်တွေရဲ့ သက်ရောက်မှုဘယ်လောက်ကြီးသလဲဆိုတာကို မေးခွန်းထုတ်ခံရဖို့ ရှိပါတယ်။ NPR သတင်းအရ အီလွန်မတ်စ်ရဲ့ ရှေ့နေတွေဟာ Twitter အနေနဲ့ Fake အကောင့် တွက်ချက်မှု ၊ သတ်မှတ်ချက်နဲ့ ဘယ်လိုမျိုး ထောက်လှမ်းတယ်ဆိုတဲ့အကြောင်းကို ဒေါ်ဆီ ဆီက အထောက်အထားတွေ တောင်းတာမျိုး လုပ်သွားဖို့ ရှိပါတယ်။ 

Twitter ဟာ ကုမ္ပဏီပလက်ဖောင်းပေါ်က နေ့စဉ်ပုံမှန်အသုံးပြုသူတွေကို ကုမ္ပဏီရဲ့ ဘဏ္ဍာရေးရှင်းလင်းပွဲတွေမှာ အဓိကအချက်အလက်တစ်ခုအနေနဲ့ ဘယ်လိုအသုံးပြုသလဲဆိုတာကိုပါ ဂျက်ဆီကို မေးသွားဖို့ ရှိပါတယ်။ ဂျက်ဒေါ်ဆီဟာ ၂၀၂၁ နိုဝင်ဘာလထဲမှာ Twitter အမှုဆောင်အရာရှိချုပ်အဖြစ်ကနေ ဆင်းပေးခဲ့ပြီး သူ့နေရာကို လက်ရှိကုမ္ပဏီ CEO အဖြစ် တာဝန်ယူနေသူ ပါရက် အဂ္ဂရာဝဲလ်ကို လွှဲပြောင်းပေးခဲ့ပါတယ်။ 

အီလွန်မတ်စ်ဟာ Twitter ဆီက အရောင်းအဝယ်သဘောတူညီချက် ရပြီးနောက် လပိုင်းအတွင်းမှာ စိတ်ပြောင်းလာပါတယ်။ ဇူလိုင် ၈ ရက်နေ့မှာ Twitter ပလက်ဖောင်းပေါ်က bot နဲ့ spam အကောင့်အရေအတွက်ကိစ္စကို အကြောင်းပြုပြီး ကုမ္ပဏီကို ဝယ်မယ့်ကိစ္စဖျက်သိမ်းကြောင်း ကြေညာလိုက်ပြီးနောက် မတ်စ်ကို Twitter ဘက်က တရားစွဲပါတယ်။ အီလွန်မတ်စ်က Twitter ဟာ ငွေကြေးသက်သေခံလက်မှတ်လုပ်ငန်းကြီးကြပ်ရေး ကော်မရှင် SEC ပေါ်က ဘဏ္ဍာရေးအချက်အလက်တွေထဲမှာ ကိန်းဂဏန်းအမှားတွေ ထည့်ပြီး ရင်းနှီးမြှပ်နှံသူတွေကို လှည့်ဖျားခဲ့တယ်လို့ စွပ်စွဲခဲ့ပါတယ်။

Twitter ဘက်ကလည်း SEC မှာ တင်ထားတာတွေက အမှန်အတိုင်း ဖြစ်တယ်လို့ ပြောကြားခဲ့သလို အီလွန်မတ်စ်ရဲ့ အဖွဲ့ဟာ spam အရှုပ်တော်ပုံတစ်ခု ဖန်တီးဖို့ ကြိုးစားခဲ့ပေမယ့် ဘာမှ ရှာမတွေ့ခဲ့ဘူးလို့ တုံ့ပြန်ခဲ့ပါတယ်။ မတ်စ်ရဲ့ အကြောင်းပြချက်တွေဟာ ဝယ်လက်ရဲ့ နောင်တကို ကာဗာလုပ်ချင်ရုံသက်သက်ပဲလို့ ပြောပါတယ်။ Twitter အနေနဲ့ အီလွန်မတ်စ်ကို ကုမ္ပဏီထိုးရောင်းဖို့ ဥပဒေကြောင်းအရ ဖိအားပေးနေပါတယ်။ ပြီးခဲ့တဲ့ သုံးလပတ်ထဲမှာလည်း မပြီးမပြတ်ဖြစ်နေတဲ့ အရောင်းအဝယ်ကိစ္စအတွက် ဒေါ်လာ ၃၃ သန်း သုံးစွဲခဲ့တယ်လို့ ထုတ်ဖော်ပြောဆိုထားပါတယ်။