မနေ့ (အောက်တိုဘာလ ၁၂ ရက်) ကစပြီး တရုတ်ယွမ်နဲ့ဂျပန်ယန်းကို တရားဝင်ရောင်းချခွင်ပြုလိုက်တာဖြစ်ပါတယ်။ ဒါကြောင့် ငွေလဲကောင်တာတွေကလည်း တရုတ်ငွေ ယွမ်နဲ့ ဂျပန်ငွေ ယန်းကိုစတင်ရောင်းချခဲ့ပေမယ့် ရောင်းသူ ဝယ်သူ မရှိဘူးလို့ သိရပါတယ်။

" တရုတ်ရော ဂျပန်ရော အရောင်းလည်းမရှိဘူး။ အဝယ်လည်းမရှိဘူး ။ ဝယ်ရောင်းလုပ်လို့ရတယ်ဆိုတာတော့ ကြေညာထားတယ်" လို့ ရန်ကုန်မြို့က ငွေလဲကောင်တာ တစ်ခုမှ တာဝန်ရှိသူတစ်ဦးက ပြောပါတယ်။

" အရင်က ယူရို ၊ စင်္ကာပူ ဒေါ်လာ ၊ ထိုင်း ဘတ်ငွေ၊ မလေးရှား ရင်းဂစ် ကိုပဲ ရောင်းချခွင့်ပြုတာပေါ့။ ခုကတော့ တရုတ်နဲ့ဂျပန်ထပ်တိုးပေးတာ။ ဝယ်ရောင်းလုပ်နိုင်ကြောင်း နဲ့ ဈေးကိုပါ ကြေညာ ပေးထားတယ်။ ဒါပေမယ့် ဒီနေ့တော့ ဝယ်တာလည်းမရှိဘူး၊ ရောင်းတာလည်းမရှိဘူး " လို့ money changer တခုကပြောပါတယ်။

ဓာတ်ပုံ - commerce.gov

" တရုတ်ကိုကုန်ပို့ရင်နယ်စပ်ကပဲပို့ပိုသင်္ဘောကပဲပို့ပို့ပေါ့။ တရုတ်က တရုတ်ငွေပဲပေးတယ်။

ဆန်ကွဲတတန်ဘယ်လောက်လဲဆိုတာကအစ တရုတ်ငွေပဲပြောတယ်။တရုတ်ငွေကနေ ဒေါ်လာပြောင်း၊ဒေါ်လာကနေ စင်္ကာပူဘက်ကနေ ပတ်သွင်းရ၊ဟောင်အောင်ကနေပတ်သွင်းရတယ်။ ခု တရားဝင်လဲလို့ရပြီဆိုတော့ တရုတ်နဲ့လုပ်နေတဲ့လုပ်ငန်းတွေအကုန်အဆင်ပြေတယ်။ငွေကြေးပိုင်းဆိုင်ရာမှာလည်းပိုကျယ်ပြန့်လာမယ် " လို့ သူကဆိုပါတယ်။

တရုတ် ငွေယွမ်နဲ့ ဂျပန်းငွေယန်းကို တရားဝင်ရောင်းချခွင့်ပြုတဲ့အပေါ် ဗဟိုဘဏ်ဘက်ကိုဆက်သွယ်ခဲ့ပေမယ့် ဖြေဆိုဖို့ငြင်းဆန်ခဲ့ပါတယ်။

ဒီနေ့ ငွေလဲကောင်တာတချို့မှာ တရုတ်ငွေပေါက်ဈေးက အဝယ် ၂၇၀ ကျပ် နဲ့ အရောင်းက ၃၀၀ ဈေးပေါက်ပြီး ၊ ဂျပန်ငွေ ယန်းက အဝယ် ၁၅ ကျပ် နဲ့ အရောင်းက ၁၇ ကျပ်ဈေးပေါက်တယ်လို့ သိရပါတယ် ။