မန်ချက်စတာယူနိုက်တက်အသင်းဟာ ရလဒ်တွေဆိုးရွားနေတဲ့ နည်းပြအိုလီဂန်နာဆိုးလ်ရှားကို ထုတ်ပယ်ဖို့ ဆုံးဖြတ်ခဲ့မယ်ဆိုရင် ပေါင် ၇ သန်းဝန်းကျင် ပေးချေရလိမ့်မယ်လို့ Metro ရဲ့ ဖော်ပြချက်အရ သိရပါတယ်။

မန်ချက်စတာယူနိုက်တက်အသင်းအတွက် နှစ်ပေါင်း ၃၀ အတွင်း အဆိုးဆုံးရာသီအစဖြစ်ခဲ့ပြီး လက်ရှိအချိန်မှာတော့ ဆိုးလ်ရှားဟာ အောက်တိုဘာလ ၂၀ ရက်နေ့မှာ ကစားရမယ့် လီဗာပူးနဲ့ပွဲစဉ်မှာ မရှုမလှရှုံးနိမ့်ခဲ့မယ်ဆိုရင် ရာထူးကနေ ထုတ်ပယ်ခံရမှာကို စိုးရိမ်နေတယ်လို့ သိရပါတယ်။

မန်ချက်စတာယူူနိုက်တက်ဒုဥက္ကဌ အက်ဒ်ဝုဒ်ဝဒ်ဟာ ပြီးခဲ့တဲ့စက်တင်ဘာလမှာ အသင်းရဲ့ စံချိန်တင်ဝင်ငွေပိုင်ဆိုင်မှု ပေါင် ၆၂၇ သန်းရှိကြောင်း ကြေညာခဲ့ပြီး ယင်းပမာဏဟာ နည်းပြမော်ရင်ဟိုကို ထုတ်ပယ်ခဲ့တဲ့အတွက် ပေးချေခဲ့ရတဲ့ ပေါင် ၁၉.၆ သန်း ပါဝင်ပြီးဖြစ်တယ်လို့ သိရပါတယ်။

မန်ချက်စတာယူနိုက်တက်အသင်းအနေနဲ့ ဆိုးလ်ရှားကို နည်းပြရာထူးကနေ ထုတ်ပယ်ဖို့ ဆုံးဖြတ်လိုက်မယ်ဆိုရင်တော့ တစ်နှစ်လုပ်ခလစာ ပေါင် ၆ သန်းကျော်ဝန်းကျင် ပေးချေရမယ်လို့ သိရပြီး ဆိုးလ်ရှားသာ ရာထူးကနေ ထုတ်ပယ်ခံရရင် ဆာအဲလက်စ်ဖာဂူဆန်ရဲ့လက်ထောက်ဟောင်း မိုက်ဖီလန်လည်း ဆိုးလ်ရှားနဲ့အတူ နည်းပြအဖွဲ့ကနေ လိုက်ထွက်မယ်လို့ မျှော်လင့်ရပါတယ်။

ဒါပေမယ့် အခြားနည်းပြအဖွဲ့ဝင်တွေဖြစ်တဲ့ မိုက်ကယ်ကားရစ်၊ ကီရန်မက်ကန်နာတို့လည်း နည်းပြအဖွဲ့ဝင်ရာထူးကနေ ထုတ်ပယ်ခံရမလား၊ ဆက်လက်ရှိနေဦးမလားဆိုတာကိုတော့ စောင့်ကြည့်သွားရမှာဖြစ်ပါတယ်။