ရွှေထူးကတော့ သူငယ်ချင်းတွေနဲ့ အတူတူ သီချင်းတွေ ပြန်ဆိုရတော့မှာဖြစ်လို့ ဝမ်းသာပီတိဖြစ်လို့နေပါတယ်။ မဆုံတာ ကြာတော့လည်း လွမ်းတယ်လို့ ဖွင့်ဟ ပြောပြလာပါတယ်။ 

ရွှေထူးကတော့ ဖေဖော်ဝါရီလ ၂၂ ရက်နေ့မှာ ပြုလုပ်မယ့် Myanmar Top 100 by joox ဖျော်ဖြေပွဲကြီးမှာ ပါဝင်သီဆိုဖို့ရင်ခုန်နေတယ်လို့ ဆိုပါတယ်။ ဒီပွဲမှာ သူငယ်ချင်းတွေနဲ့ သီချင်းတွေ အတူတူပြန်ဆိုရတော့မှာမို့ ဝမ်းသာနေတယ်လို့ Duwun media ကနေ ပြောပြလာပါတယ်။ 

“ ကျွန်တော်လည်း ကန်တော်ကြီး မျှော်စင်ကျွန်းမှာ သီချင်းတွေဆိုရင်းနဲ့ ဘဝတွေ စခဲ့ကြတယ်။ သူငယ်ချင်းတွေနဲ့ကလည်း အဲဒီမှာပဲ ဆုံခဲ့ကြဆိုတော့ လွမ်းမိတယ်။ အမှန်အတိုင်းပြောရရင် ကျွန်တော့် သူငယ်ချင်းတွေနဲ့လည်း အိမ်ထောင်ကျပြီးကတည်းက မတွေ့တာ ကြာပြီ” ဆိုပြီးတော့ နိုဝင်ဘာလ ၈ ရက်နေ့က Joox Top 100 သီဆိုဖျော်ဖြေပွဲအတွက် စာနယ်ဇင်းရှင်းလင်းပွဲကို တက်ရောက်ရင်း ဖြေဆိုခဲ့တာပါ။ 

ရွှေထူးဟာ လက်ရှိမှာတော့ သူ့ရဲ့ အနုပညာ အလုပ်တွေကို အရင်ကထက် တစိုက်မတ်မတ် ဆောင်ရွက်လာတာ တွေ့ရပါတယ်။ သရုပ်ဆောင် အလုပ်ကိုရော ၊ ဂီတအလုပ်ကိုပါ မျှမျှ တတ ဆောင်ရွက်သွားမယ်လို့ ဆိုပါတယ်။ 

“ လက်ရှိမှာတော့ ကျွန်တော့်ရဲ့ ရုပ်ရှင်ကားအတွက် သီချင်းတွေ ရေးနေတယ်။ နောက်ထပ် အခွေအတွက်လည်း သီချင်းတွေ စုနေတယ်။ သီချင်းကတော့ ၈ ပုဒ်၊ ၉ ပုဒ်လောက်တော့ ကျွန်တော် ပြီးနေပြီ။ ရုပ်ရှင်ကားလည်း ရိုက်နေတာ ဆိုတော့ ဒီကြားထဲမှာ ကျွန်တော် ရရင် ရတဲ့ အချိန်မှာ Show ပွဲလေးတွေ သွားဆိုလိုက်၊ ရုပ်ရှင်လေးရိုက်လိုက်၊ သီချင်းလေး ရေးလိုက်၊ မိသားစုကို အချိန်ပေးလိုက် အဲဒီလို အချိန် အကန့်အသတ်ခွဲပြီးတော့ နေရတာပေါ့” ဆိုပြီးတော့ ဆက်လက် ပြောပြထားပါတယ်။ 

Photo: Htoo Khant

ရွှေထူးကတော့ လက်ရှိမှာ “ကမ်း” ဆိုတဲ့ ရုပ်ရှင်ဇာတ်ကားကို ရိုက်ကူးနေတာပါ။ ဒီဇာတ်ကားကို ဒါရိုက်တာ သားညီက ရိုက်ကူးတာဖြစ်ပြီး ရွှေထူးနဲ့ ရွှေမှုံရတီတို့က အဓိက သရုပ်ဆောင်တွေ အဖြစ် ပါဝင်သရုပ်ဆောင်နေတာ တွေ့ရပါတယ်။ အဲဒီနောက် ဖေဖော်ဝါရီလ ၂၂ ရက်နေ့ သုဝဏ္ဏဘူမိ Even Park မှာ ကျင်းပပြုလုပ်မယ့် Myanmar Top 100 by joox ပွဲကြီးမှာ ရွှေထူးနဲ့ အတူ Big Bag, Hlwan Paing, Ar-T, X-Boxin , Oasix, Eternal Gosh , Team 143 , Shine, Wyne Su Khaing Thein, Ni Ni Khin Zaw, Irene Zin Mar Myint ,ChanMyae Mgcho နဲ့ Grace တို့က ပါဝင်သီဆိုသွားမယ်လို့ သိရပါတယ်။ 

ရွှေထူးကိုတော့ အချစ်သီချင်းတွေကနေတဆင့် ပရိသတ်တွေ စတင်သိရှိလာတာဖြစ်ပါတယ်။ အဲဒီနောက်မှာတော့ ဂီတနဲ့ပတ်သက်ပြီး ‘’စိတ်ကူးယဉ်စာအုပ်’’ ၊ ‘’I’’ ဆိုတဲ့ တစ်ကိုယ်တော်အခွေ ၂ ခွေထွက်ရှိခဲ့ပါတယ်။ သရုပ်ဆောင်အနေနဲ့ကတော့ ပထမဦးဆုံးဇာတ်ကားအဖြစ် ‘’ပက်ပက်စက်စက်ညှို့’’ ဆိုတဲ့ရုပ်ရှင်ကားကြီး၊ ‘’ဧည့်သည်’’ ရုပ်ရှင်ကားကြီး၊ ‘’ဒဏ္ဍာရီမိုး’’ ရုပ်ရှင်ကားကြီး တို့အပြင် လက်ရှိမှာ "ကမ်း" ဆိုတဲ့ ရုပ်ရှင်ဇာတ်ကားကိုလည်း ရိုက်ကူးနေတာ တွေ့ရပါတယ်။