ရှိတ်ယက်ဆင်ဘင်ဟာမက်အယ်လ်သာနီက ၁၉၈၂ မှာ မွေးဖွားခဲ့သူဖြစ်ပြီး မန်ချက်စတာယူနိုက်တက်အသင်းပရိသတ်တဦးလို့ ဆိုပါတယ်။ သူ့ရဲ့ ဖခင်ကတော့ ဟာမက်ဘင်ယာဆင်ဘင်ဂျဘားအယ်လ်သာနီဖြစ်ပြီး ကာတာရဲ့ ဝန်ကြီးချုပ်အဖြစ် ၂၀၀၇ ကနေ ၂၀၁၃ အထိ တာဝန်ယူခဲ့သူပါ။ ပြင်သစ်ကလပ် ပီအက်စ်ဂျီကို ပိုင်ဆိုင်ခဲ့ပြီးနောက် အားကစားအသိုင်းအဝိုင်းမှာ ကျော်ကြားလာခဲ့သူလည်းဖြစ်ပါတယ်။ 

အယ်သာနီက အင်္ဂလန်မှာ ကျောင်းတက်ခဲ့သူဖြစ်ပြီး တော်ဝင်စစ်တပ်အကယ်ဒမီ Sandhurst မှာ အရာရှိဗိုလ်လောင်းအဖြစ်နဲ့ ဘွဲ့ရခဲ့ပါတယ်။ ဒီနောက်မှာတော့ သူ မွေးတဲ့နှစ်မှာ တည်ထောင်ခဲ့တဲ့ ကာတာရဲ့ ထိပ်တန်းဘဏ်တွေထဲက တခုဖြစ်တဲ့ QIB (Qatar Islamic Bank) ရဲ့ ဥက္ကဌအဖြစ် အခု တာဝန်ယူနေပါတယ်။ ဗြိတိန်အပြင် ကမ္ဘာတဝှမ်းမှာ သူတို့က ဘဏ်ခွဲတွေဖွင့်လှစ်ထားပြီး ဘဏ္ဍာရေးအရ တောင့်တင်းခိုင်မာမှု အပြည့်အ၀ရှိတယ်ဆိုတာ ယုံကြည်ရပါတယ်။ 

အယ်လ်သာနီဘက်က ထုတ်ပြန်ခဲ့တဲ့ အတည်ပြုချက်မှာတော့ "မန်ချက်စတာယူနိုက်တက်ကို ဘောလုံးလောကမှာ ကျော်ကြားပြီး ကမ္ဘာ့အကောင်းဆုံးအသင်းတသင်းအဖြစ် ပြန်လည်သတ်မှတ်ခံရဖို့အတွက်ပါ" ဆိုတဲ့ အချက်ကို ထည့်သွင်းရေးသားခဲ့ပါတယ်။ ဒီအချက်က ယူနိုက်တက်ပရိသတ်တွေကို ဆွဲဆောင်နိုင်စွမ်းရှိမှာဖြစ်ပြီး အယ်လ်သာနီနဲ့အပြိုင်ကမ်းလှမ်းထားတဲ့ ဗြိတိန်သူဌေးကြီးဆာဂျင်မ်ရက်ကလစ်ဖ်ကို အသာစီးရမယ်လို့လည်း ယုံကြည်နေပြီး ကာတာအုပ်စုက ယူနိုက်တက်ကို ဝယ်ယူနိုင်ဖို့လည်း မျှော်လင့်နေကြပါတယ်။