ရှစ်လကျော်ကြာပိတ်ထားတဲ့ ရန်ကုန်မြို့ သိမ်ဖြူလမ်းမပေါ် ဝန်ကြီးများရုံးရှေ့က ရန်ကုန်စာအုပ်လမ်းကို ဖေဖော်ဝါရီ ၂၊၃ ရက်က စတင်ကာ အပတ်စဉ် စနေ၊တနင်္ဂနွေနေ့တိုင်း ဖွင့်လှစ်သွားတော့မှာဖြစ်တယ်လို့သိရပါတယ်။

“ စာအုပ်တန်းဆိုတာ အာဆီယံနိုင်ငံအချို့မှာလည်းရှိတယ်။ ဒီမှာ စာအုပ်တိုက်တွေကနေ ရောင်းချနေတဲ့စာအုပ်တွေကို တစ်စုတစ်စည်းတည်း ရနိုင်တယ်။ မြို့ထဲလိုနေရာမျိုး၊အခုဆို သမိုင်းဝင်နေရာဖြစ်တဲ့ ဝန်ကြီးများရုံးရဲ့ အရှေ့မှာ ဖွင့်လှစ်ထားတာမို့ အားလပ်ရက်တွေမှာ သွားရင်းလာရင်းနဲ့ အလွယ်တကူလာဝယ်လို့ရပါတယ်”လို့ မြန်မာနိုင်ငံစာပေထုတ်ဝေသူနှင့် ဖြန့်ချိသူများအသင်းရဲ့ အတွင်းရေးမှူး ဦးသိန်းစိုးက Duwunကိုပြောပါတယ်။

စာအုပ်အရောင်းတန်းသာမကဘဲ စာရေးသူနှင့် စာဖတ်သူဆွေးနွေးပွဲ၊စာပေဟောပြောပွဲ၊ စာရေးသူတို့ရဲ့ စာဖတ်ဝိုင်း၊ကာတွန်းဆရာတွေရဲ့ ကယ်ရီကေးချား ရွေးဆွဲခြင်းအစီအစဉ်တွေကိုပါ အပတ်စဉ် ဖွင့်လှစ်တဲ့ ရန်ကုန်စာအုပ်လမ်းမှာ ထည့်သွင်းကျင်းပသွားမယ်လို့လည်းသိရပါတယ်။

အဆိုပါ ရန်ကုန်စာအုပ်လမ်းကို မြန်မာနိုင်ငံစာပေထုတ်ဝေသူနှင့် ဖြန့်ချီသူများအသင်းကနေ ဦးစီးပြီး ၂၀၁၇ ခုနှစ်က စတင်ကာ ပွင့်လင်းရာသီရောက်တိုင်း ဖွင့်လှစ်ပေးနေရာ အခုဆိုရင် ၃ နှစ်အထိရှိခဲ့ပြီလို့လည်းသိရပါတယ်။

 အခုနှစ်မှာတော့ ဖေဖော်ဝါရီ ၂ ရက် (စနေနေ့)က စတင်ကာ မတ်လပိုင်းအထိ အပတ်စဉ် စနေ၊တနင်္ဂနွေ နေ့ မနက် ၉ နာရီ ညနေ ၅ နာရီအထိ ရောင်းချပေးသွားမှာဖြစ်တယ်လို့လည်းသိရပါတယ်။