ခရစ္စတီယာနိုရော်နယ်ဒိုကတော့ အယ်လ်နာဆာအတွက် မနေ့ကပွဲမှာ အဖွင့်ဂိုးသွင်းပေးခဲ့ပြီး ၄-၀ နဲ့ နိုင်ပွဲရအောင် ကူညီပေးနိုင်ခဲ့ပါတယ်။ နိုင်ပွဲတွေ ဆက်တိုက်ပျောက်ဆုံးနေပြီး ရော်နယ်ဒိုလည်း ဂိုးပေါက်ပျောက်နေခဲ့တဲ့ အယ်လ်နာဆာတို့ အယ်ရိဒ်နဲ့အတွေ့မှာ ၄ ဂိုးပြတ်နဲ့ နိုင်ပွဲပြန်ယူနိုင်ခဲ့ပြီး အယ်လ်အီတီဟတ်ကို ဖိအားပေးနိုင်ခဲ့ပါတယ်။
လက်ရှိမှာ အယ်လ်နာဆာက ၂၅ ပွဲကစားပြီး အယ်လ်အီတီဟတ်ထက် တပွဲပိုကစားကာ ၃ မှတ်နည်းပါးနေပါတယ်။ အမှတ်ပေးဖလားအတွက် သူတို့နှစ်သင်းကြား အပြိုင်အဆိုင်ဖြစ်နေပြီး အယ်လ်အီတီဟတ်က ပြီးခဲ့တဲ့ပွဲမှာ ကစားသမားတယောက်အထုတ်ခံခဲ့ရပေမယ့်လည်း ပြိုင်ဘက်ကို အနိုင်ကစားနိုင်ခဲ့ပြီး အယ်လ်နာဆာကို အမှတ်ဖြတ်ထားဆဲဖြစ်ပါတယ်။
ရော်နယ်ဒိုကတော့ အယ်လ်နာဆာအတွက် ၁၄ ပွဲကစားထားပြီးချိန်မှာ ၁၂ ဂိုးသွင်းပေးထားပြီးဖြစ်ပါတယ်။ ၂၀၂၃ ထဲမှာပဲ သူက ၇ ဂိုးအထိ ရရှိခဲ့ကာ ပြီးခဲ့တဲ့ ၃ ပွဲဆက်တိုက်ဂိုးပေါက်ပျောက်ခဲ့လို့ ဒေါသတွေထွက်နေခဲ့တဲ့ ရော်နယ်ဒိုကို ပရိသတ်တွေ မြင်တွေ့ခဲ့ရပြီး အသင်းဖော်တွေနဲ့ နည်းပြအဖွဲ့ဝင်တွေကို အော်ဟစ်ခဲ့တဲ့အထိ ဖြစ်ခဲ့ပါသေးတယ်။
အယ်လ်နာဆာအတွက် လက်ကျန်ဖလားမျှော်လင့်ချက်ကတော့ အမှတ်ပေးဖလားတလုံးတည်းသာ ရှိတော့တာဖြစ်ပါတယ်။ ဒါဟာ ရော်နယ်ဒိုအတွက်လည်း ဆော်ဒီကို စရောက်တဲ့ ပထမဆုံးနှစ်မှာ ဆုဖလားနဲ့ အောင်ပွဲခံဖို့အတွက် တခုတည်းသော အခွင့်အရေးလည်းဖြစ်ကာ သူ လုပ်ပြနိုင်မလားဆိုတာ စောင့်ကြည့်ရပါတော့မယ်။