အသက် ၃၇ နှစ်အရွယ် ရော်နယ်ဒိုရဲ့ အပြောင်းအရွှေ့သတင်းဟာ နွေရာသီစျေးကွက်အတွင်းမှာ ထိပ်တန်းသတင်းတပုဒ်အဖြစ်နဲ့ ရှိနေခဲ့တာပါ။ အသင်းကနေ ထွက်ခွာခွင့်တောင်းဆိုထားပြီး ချန်ပီယံလိဂ်ဝင်ခွင့်ရ အသင်းတသင်းဆီကို ပြောင်းရွှေ့ဖို့ ရော်နယ်ဒိုက စိတ်အားထက်သန်နေပေမယ့် လက်ရှိအချိန်ထိတော့ သူ့ကို ခေါ်ယူချင်တဲ့အသင်းမရှိဖြစ်နေပြီး မန်ဒက်စ်က လိုက်ချိတ်ဆက်ပေးနေပေမယ့် ငြင်းဆန်ခံနေရဆဲဖြစ်ပါတယ်။ 

ပရီးမီးယားလိဂ်အဖွင့်ပွဲနှစ်ပွဲဆက် ရုပ်ပျက်ဆင်းပျက်အရေးနိမ့်ခဲ့ပြီးနောက် ရော်နယ်ဒိုရဲ့ အနာဂတ်က ပိုမိုလှုပ်ခတ်လာခဲ့ပြီး အသင်းမှာ မပျော်မရွှင်ဖြစ်မှုက ပိုများလာတယ်လို့လည်း သိရပါတယ်။ ဘရန်ု့ဖို့ဒ်ကို ရှုံးနိမ့်ခဲ့အပြီးမှာ နည်းပြတန်ဟက်ဂျ်က ကစားသမားတွေရဲ့ နားရက်ကို ဖျက်သိမ်းပြီး နောက်တရက်မှာ လေ့ကျင့်ကွင်းဆီခေါ်ခဲ့ကာ ၈ မိုင်အကွာအဝေးကို ပြေးကာ လေ့ကျင့်စေခဲ့တယ်လို့လည်း သိရပါတယ်။ 

ဂျူဗင်တပ်စ်မှာ ၃ ရာသီကြာ ကစားခဲ့ဖူးတဲ့ ရော်နယ်ဒိုက စီးရီးအေအတွေ့အကြုံလည်းရှိနေပေမယ့် မီလန်နှစ်သင်းကတော့ ငြင်းဆန်ခဲ့တာပါ။ အစောပိုင်းမှာ နာပိုလီက စိတ်ဝင်စားခဲ့ပေမယ့် သူတို့ကို တုံ့ပြန်မှုမရှိခဲ့ဘဲ ခေါ်ယူမယ့်အသင်းမရှိမှ လာရောက်ဆက်သွယ်ခဲ့လို့ မခေါ်ယူတော့ဘူးလို့ နာပိုလီဥက္ကဌဒီလော်ရန်တစ်ကလည်း ပြီးခဲ့တဲ့ ရက်သတ္တပတ်တွေအတွင်းက ပြောဆိုခဲ့ဖူးပါတယ်။