ရန်းဂ်နစ်ခ်လက်အောက်မှာလည်း ပုံမှန်ကစားခွင့်ရနေခဲ့တဲ့ ပေါ်တူဂီတိုက်စစ်မှူးရဲ့ခြေစွမ်းက တဖြည်းဖြည်းနဲ့ အကျဘက်ကို ရောက်လာနေပြီဖြစ်ပြီး အသင်းဖော်တွေဆီက လုံလောက်တဲ့ ပံ့ပိုးမှုတွေမရချိန်မှာတော့ အဆိုးရွားဆုံးပုံစံတွေဖြစ်လာခဲ့တာပါ။ နယူးကာဆယ်နဲ့ပွဲမှာဆိုရင် သွင်းဂိုးမရှိ၊ ဖန်တီးမှုမရှိ၊ အရေးပါတဲ့ ပေးပို့မှုမရှိခဲ့ဘဲ နေရာယူတာ ၉ ကြိမ်အထိ ရော်နယ်ဒိုက မှားယွင်းခဲ့ပါတယ်။ 

ရော်နယ်ဒိုရဲ့ ကြိုးစားအားထုတ်မှုနဲ့ စိတ်ဓာတ်ပိုင်းပြင်းထန်မှုက မေးခွန်းထုတ်စရာမရှိပေမယ့် သူ တွဲဖက်ကစားနေရတဲ့ ကစားသမားတွေရဲ့ အနေအထားတွေက သူ့ကို အနိမ့်ဘက်က ဆွဲခေါ်သလိုပိုဖြစ်လာပါတယ်။ တော်မီနေး နဲ့ မာတစ်တို့ ပါလာတဲ့ ကွင်းလယ်ဆီကနေ သူ ဘာမှမျှော်လင့်လို့မရပါဘူး။ ပေါ့ဂ်ဘာ၊ ဖာနန်ဒက်စ်တို့နဲ့ တွဲကစားရချိန်မှာ ရခဲ့တဲ့ အခွင့်အရေးမျိုးတွေ ဒီဘက်နောက်ပိုင်းမှာ ရော်နယ်ဒိုမရတော့တာကလည်း သူ့ရဲ့ တပွဲချင်းစီ ကိန်းဂဏန်းတွေကို ပိုဆိုးဝါးလာစေခဲ့ပါတယ်။ 

သူ့ကို ပုံမှန်ထည့်သွင်းကစားမယ်ဆိုရင် သူ့အတွက် အထောက်အကူပေးနိုင်မယ့် ကစားဟန်၊ ကစားသမားမျိုးကို ရန်းဂ်နစ်ခ် ထည့်ပေးလိုက်ဖို့ လိုလာပါတယ်။ ၀ုလ်ဂိုးဧရိယာအတွင်းမှာ ဘောလုံးထိချက် ၃ ကြိမ်သာရှိခဲ့တဲ့ သူ့ဆီကနေ ဂိုးရဖို့ မျှော်လင့်နေမယ်ဆိုတာကတော့ ဒါ ရူးမိုက်လွန်းရာကျပါတယ်။ အသက်အရွယ်အရ ထိန်းကစားနေရတဲ့ ကစားသမားတယောက်၊ ခြေစွမ်းအကျဘက်ရောက်လာတဲ့ ကစားသမားနဲ့ပတ်သက်ပြီး ရှင်းလင်းပြတ်သားတဲ့ ဆုံးဖြတ်ချက်မျိုး ချမှတ်ရတော့မှာပါ။

သူ့ကို ကစားစေမလား ဒါမှမဟုတ် နားစေမလားဆိုတာပါပဲ။ ရော်နယ်ဒိုလို ကစားသမားကို ခေါက်ထားဖို့က တော်တော်လေးတော့ စွန့်စားရပါလိမ့်မယ်။ ထည့်သွင်းကစားစေမယ်ဆိုရင်လည်း သူ့အတွက် လိုက်ဖက်ညီစေမယ့်အရာတွေကို ဖန်တီးပေးနိုင်ဖို့က လိုအပ်ပါတယ်။ ဒါတွေက ရန်းဂ်နစ်ခ်အပေါ်မှာပဲ မူတည်နေပါပြီ။ ကစားမလား နားမလားဆိုတာ သူ ဆုံးဖြတ်ရတော့မှာပါ။