မနေ့ညက ကစားခဲ့တဲ့ အယ်လ်နာဆာနဲ့ အယ်လ်ရှာဘတ်တို့ရဲ့ ဆော်ဒီပရိုလိဂ်ပွဲစဉ်မှာတော့ အိမ်ရှင် အယ်လ်နာဆာက လေးဂိုးပြတ်နဲ့ အနိုင်ရရှိခဲ့ပါတယ်။ ဒီပွဲမှာ အယ်လ်နာဆာအတွက် ရော်နယ်ဒိုက ခြေစွမ်းပြခဲ့ပြီး ပင်နယ်တီသွင်းဂိုးနှစ်ဂိုးနဲ့အတူ မာနေးရဲ့ သွင်းဂိုးကိုလည်း ဖန်တီးပေးနိုင်ခဲ့ပါတယ်။
ပွဲကစားချိန် (၁၃) မိနစ်မှာ အယ်လ်နာဆာတို့ ပင်နယ်တီရရှိခဲ့ပြီး ဒီပင်နယ်တီကို ရော်နယ်ဒိုက အဆုံးသတ်ကန်သွင်းခဲ့ပါတယ်။ အဲ့ဒီနောက် ပွဲကစားချိန် (၃၈) မိနစ်မှာ ပင်နယ်တီထပ်ရခဲ့ပြီး ဒီပင်နယ်တီကိုလည်း ရော်နယ်ဒိုကပဲ အမှားအယွင်းမရှိ ကန်သွင်းခဲ့ပါတယ်။
ရော်နယ်ဒိုကတော့ ဒီပွဲမှာ အယ်လ်နာဆာအတွက် အကောင်းဆုံး ခြေစွမ်းပြခဲ့တယ်လို့ ပြောရမှာဖြစ်ပြီး ပွဲကစားချိန် မိနစ် (၄၀) မှာ ရရှိခဲ့တဲ့ မာနေးရဲ့ သွင်းဂိုးကိုလည်း ဖန်တီးပေးနိုင်ခဲ့ပါတယ်။ ဒီပွဲမှာ ရော်နယ်ဒိုက ဟက်ထရစ်ရနိုင်တဲ့ အခွင့်အရေးလည်း ရရှိခဲ့ပါတယ်။
ဒါပေမယ့် ဒီအခွင့်အရေးကို ရော်နယ်ဒိုက ရယူခဲ့ခြင်းမရှိဘဲ ဒုတိယပိုင်းမှာ ရရှိခဲ့တဲ့ ပင်နယ်တီကို အသင်းဖော် အဗ္ဗဒူလာမန်ကို ပေးကန်ခဲ့ပါတယ်။ ဒီပင်နယ်တီကိုတော့ အဗ္ဗဒူလာမန်က ဂိုးဝင်အောင် ကန်သွင်းနိုင်ခဲ့ခြင်းမရှိတာကတော့ ရော်နယ်ဒိုအတွက်ပါ နှမြောစရာဖြစ်ခဲ့ရပါတယ်။
အယ်လ်နာဆာအတွက် ပွဲသိမ်းဂိုးကိုတော့ ပွဲကစားချိန် မိနစ် (၈၀) မှာ အယ်လ်ဂန်နမ်က သွင်းယူပေးခဲ့ပြီး အယ်လ်နာဆာတို့ လိဂ်နှစ်ပွဲဆက်တိုက် နိုင်ပွဲရရှိခဲ့ပါတယ်။ ရော်နယ်ဒိုကလည်း အယ်လ်နာဆာအတွက် အထူးခြေစွမ်းပြခဲ့ပြီး ပြီးခဲ့တဲ့ပွဲမှာ ဟက်ထရစ်သွင်းနိုင်ခဲ့သလို အခုပွဲမှာလည်း နှစ်ဂိုး သွင်းယူနိုင်ခဲ့ပါတယ်။