မနေ့ညက ကစားခဲ့တဲ့ အယ်လ်အာလီနဲ့ အယ်လ်နာဆာတို့ရဲ့ ဆော်ဒီပရိုလိဂ်ပွဲစဉ်မှာတော့ အယ်လ်နာဆာက ရော်နယ်ဒိုရဲ့ တစ်လုံးတည်းသော ပင်နယ်တီသွင်းဂိုးနဲ့အတူ နိုင်ပွဲပြန်ရှာတွေ့ခဲ့ပါတယ်။ ဒါဟာ အယ်လ်နာဆာအတွက် နောက်ဆုံး (၅) ပွဲမှာ ပထမဆုံးနိုင်ပွဲရရှိခဲ့တာပါ။
ပြိုင်ပွဲစုံ နောက်ဆုံးကစားခဲ့တဲ့ (၄) ပွဲဆက်တိုက် အယ်လ်နာဆာတို့ နိုင်ပွဲပျောက်ဆုံးခဲ့ပါတယ်။ အဲ့ဒါကြောင့်လည်း အခုပွဲက အယ်လ်နာဆာအတွက် သေချာပေါက် အနိုင်ရရှိဖို့ လိုအပ်ခဲ့ပြီး တစ်လုံးတည်းသော ပင်နယ်တီသွင်းဂိုးကြောင့်လည်း နိုင်ပွဲ ရရှိခဲ့တာပါ။
ပထမပိုင်းမှာကတည်းက ရော်နယ်ဒိုရဲ့ သွင်းဂိုးရရှိခဲ့ပေမယ့် VAR က ပြန်လည်ပယ်ဖျက်ခဲ့တာကြောင့် အယ်လ်နာဆာတို့ နစ်နာခဲ့ရပြီး အနိုင်ဂိုးရရှိဖို့ ဒုတိယပိုင်းအထိ စောင့်ခဲ့ရပါတယ်။ ပွဲကစားချိန် (၆၈) မိနစ်မှာတော့ အယ်လ်နာဆာတို့ ပင်နယ်တီရရှိခဲ့ပြီး ဒီပင်နယ်တီကို ရော်နယ်ဒိုက အမှားအယွင်းမရှိ ကန်သွင်းယူခဲ့ပါတယ်။
ဒီပွဲမှာ အယ်လ်နာဆာက ရော်နယ်ဒို၊ မာနေး၊ ဘရိုဇိုဗစ်၊ အိုတာဗီယို၊ အဲလက်စ်တဲလက်စ်၊ လာပေါ့တ်တို့နဲ လူစုံပါဝင်ခဲ့ပေမယ့် တာလစ္စကာတစ်ယောက်ကတော့ ဒဏ်ရာကြောင့် လွဲချော်ခဲ့ရပါတယ်။ တာလစ္စကာ မပါဝင်နိုင်တာက အယ်လ်နာဆာရဲ့ တိုက်စစ်ပိုင်းကို အကျိုးသက်ရောက်မှုရှိစေပြီး ဒီပွဲမှာ ပြိုင်ဘက် ဂိုးပေါက်ကို (၄) ကြိမ်သာ ကန်သွင်းနိုင်ခဲ့သလို ဂိုးပေါက်တည့်တာကလည်း (၁) ကြိမ်တည်းရှိခဲ့ပါတယ်။
ဘာပဲဖြစ်ဖြစ် နိုင်ပွဲရရှိခဲ့တာကြောင့် အယ်လ်နာဆာတို့ အမှတ်ပေးဇယားထိပ်ဆုံးက အယ်လ်ဟီလာနဲ့ အမှတ်ကွာဟချက်ကို (၉) မှတ်အထိ လျှော့ချနိုင်ခဲ့ပါတယ်။ ဒါပေမယ့် ဒါက အယ်လ်ဟီလာတို့ လက်ကျန်ပွဲမကစားရခင် အနေအထားဖြစ်ပြီး အယ်လ်ဟီလာသာ နိုင်ပွဲရရှိခဲ့ရင် အမှတ်ကွာဟချက်က အရင်အတိုင်း ပြန်ဖြစ်သွားမှာပါ။