ဆာဂျီယို အဂွေရိုဟာ ခရစ္စတီယာနို ရော်နယ်လ်ဒိုရဲ့ အကောင်းဆုံးသွင်းဂိုးတွေကို ကြည့်ရှုခဲ့တဲ့ ဗီဒီယိုဖိုင် ပျံ့နှံ့လာခဲ့ပြီးနောက် ပေါ်တူဂီကြယ်ပွင့်နဲ့ ပြဿနာရှိတယ်လို့ ပရိသတ်တွေကထင်မြင်ခဲ့ကြပါတယ်။
အဂွေရိုဟာ စပိန်နာမည်ကြီး streaming Ibai Llanos ရဲ့ Twitch ချန်နယ်မှာ ရော်နယ်လ်ဒိုရဲ့ အကောင်းဆုံးသွင်းဂိုးအချို့ကို ကြည့်ရှုခဲ့တာဖြစ်ပြီး အံ့အားသင့်ဖွယ်အဆုံးသတ်တွေကို အထင်မကြီးတဲ့ပုံစံနဲ့ အံ့အားသင့်ခြင်းမရှိဘဲ အေးတိအေးစက်သာ ကြည့်နေခဲ့တာဖြစ်ပါတယ်။
ရလဒ်အနေနဲ့ တွစ်တာလူမှုကွန်ရက်ပေါ်က ပရိသတ်တွေဟာ မန်ချက်စတာစီးတီးဂန္တဝင်က ရီးရဲလ်မက်ဒရစ်ဂန္တဝင်ကို မုန်းတီးနေတယ်လို့ ယုံကြည်ခဲ့ကြပြီး အဂွေရိုဟာ ရော်နယ်လ်ဒိုရဲ့ အဓိကပြိုင်ဘက်ဖြစ်တဲ့ လီယွန်နယ် မက်ဆီရဲ့ အချစ်ဆုံးသူငယ်ချင်းလည်း ဖြစ်ပါတယ်။
ပရိသတ်တစ်ဦးက အဂွေရိုရဲ့ တုံ့ပြန်မှုဟာ အာဂျင်တီးနားသားတွေဟာ မကြာသေးမီကမှ ကမ္ဘာ့ဖလားကို ကိုင်မြှောက်နိုင်ခဲ့ပေမယ့်လည်း ရော်နယ်လ်ဒိုရဲ့ ခြိမ်းခြောက်မှုကို ခံနေရဆဲဖြစ်တယ်ဆိုတာကို သက်သေပြသခဲ့တာလို့ ပြောကြားခဲ့ပါတယ်။
“ဆာဂျီယို အဂွေရိုက ဒီအလွတ်တည်ကန်ဘောတွေက ကံကောင်းတာဖြစ်ပြီး ပေါ်တိုနဲ့ပွဲက ဂိုးက ဂိုးသမား အမှားလို့ တကယ်ပြောခဲ့ပါတယ်။ သူတို့တွေ ကမ္ဘာ့ဖလား အနိုင်ရခဲ့ပေမယ့် ခရစ္စတီယာနို ရော်နယ်လ်ဒိုက တစ်နိုင်ငံလုံးကို လှုပ်ကိုင်နေတုန်းပဲ”လို့ တွစ်တာအသုံးပြုသူ ပရိသတ်တစ်ဦးက မှတ်ချက်ပေးခဲ့တာဖြစ်ပါတယ်။