မန်စီးတီးနည်းပြ ဂွါဒီယိုလာဟာ ရီးရဲလ်မက်ဒရစ်ကို ချန်ပီယံလိဂ်ဆီမီးဖိုင်နယ်မှာ ဖြုတ်ချနိုင်မယ့် အကြောင်းနဲ့ ပတ်သက်လို့ ပွဲမစခင်ကတည်းက ယူနိုက်တက် ဂန္တဝင်နောက်ခံလူဟောင်းကြီး ဖာဒီနန်ကို မက်ဆေ့ချ်ပို့ အသိပေးထားတယ်လို့ ဖာဒီနန်ကိုယ်တိုင်က ဖွင့်ဟခဲ့ပါတယ်။ လက်ရှိအချိန်မှာတော့ မန်စီးတီးက ချန်ပီယံလိဂ်ဗိုလ်လုပွဲကို တက်ရောက်နိုင်ခဲ့ပါပြီ။
ရီးရဲလ်မက်ဒရစ်နဲ့ ဆီမီးဖိုင်နယ် ဒုတိယအကျော့အိမ်ကွင်းပွဲမှာ မန်စီးတီးတို့ ခြေပြတ်ဂိုးပြတ်နဲ့ လေးဂိုးအထိ သွင်းယူနိုင်ခဲ့တာဖြစ်ပါတယ်။ အဲ့ဒါကြောင့် နှစ်ကျော့ပေါင်းရလဒ် ၅-၁ ဂိုးနဲ့ မန်စီးတီးတို့ ဗိုလ်လုပွဲကို တက်ရောက်ခဲ့ပြီး အင်တာမီလန်နဲ့ ရင်ဆိုင်ရမှာကြောင့် ချန်ပီယံလိဂ်ဖလားကို ဆွတ်ခူးဖို့ တော်တော်လေး အခြေအနေကောင်းနေပါပြီ။
ဒီပွဲမတိုင်ခင်မှာ ဂွါဒီယိုလာ မက်ဆေ့ချ် ပိုခဲ့တာနဲ့ ပတ်သက်လို့ ဖာဒီနန်က “ပွဲမစခင်မှာ ဂွါဒီယိုလာက ကျွန်တော့်ဆီ မက်ဆေ့ချ် ပိုခဲ့ပါတယ်။ ဘာလဲဆိုတော့ ‘လွန်ခဲ့တဲ့နှစ်နှစ်က ငါတို့ သူတို့ကို အနိုင်ယူခဲ့ဖူးပါတယ်။ အခုလည်း အနိုင်ထပ်ယူပြမယ်၊ ငါ့ကို ယုံစမ်းပါ’ ဆိုပြီးတော့ပေါ့” လို့ ဖွင့်ဟခဲ့ပါတယ်။
ဒါ့အပြင် ပွဲအပြီးမှာလည်း ဂွါဒီယိုလာက အီတိဟတ်ကွင်းထဲ ရုပ်သံဝေဖန်သုံးသပ်သူအဖြစ် ရောက်ရှိနေတဲ့ ဖာဒီနန်ဆီ ရည်ညွှန်းပြီး သူပြောတာ မှန်ကန်ကြောင်း အသိပေးခဲ့ပါတယ်။
တကယ်တမ်းကတော့ လွန်ခဲ့တဲ့ (၃) နှစ်က ဖြစ်ပြီး အဲ့ဒီအချိန်တုန်းက မန်စီးတီးတို့ ရီးရဲလ်မက်ဒရစ်ကို ချန်ပီယံလိဂ်မှာ အနိုင်ယူခဲ့တာပါ။ မန်စီးတီးဟာ ရီးရဲလ်မက်ဒရစ်ကို အဝေးကွင်း ဘာနေဗျူးမှာရော၊ အိမ်ကွင်း အီတိဟတ်မှာပါ ၂-၁ ဂိုးဆိုတဲ့ ရလဒ်နဲ့ အနိုင်ရရှိခဲ့ပြီး ကွာတားဖိုင်နယ်ကို တက်ရောက်နိုင်ခဲ့ဖူးတာလည်း ဖြစ်ပါတယ်။