လီဗာပူးလ်ပရိသတ်တွေဟာ ဒီနေ့ကစားရမယ့် ရီးရဲလ်မက်ဒရစ်နဲ့ ချန်ပီယံလိဂ်ပွဲမတိုင်ခင်မှာ ရီးရဲလ်အသင်းတည်းခိုရာ ဟိုတယ်အနီးမှာ မီးရှူးမီပန်းတွေ ပစ်လွှတ်ခဲ့ကြပါတယ်။ မနက် ၂ နာရီအချိန်ကြီးကို အခုလိုမျိုး လုပ်ခဲ့တာဖြစ်ပြီး ဒါဟာ ပြိုင်ဘက်အသင်းကစားသမားတွေ ကောင်းကောင်းအနားယူလို့မရအောင် ကြံစည်ကာ ပြုလုပ်ခဲ့တာလို့ ယူဆရပါတယ်။
မီးရှူးမီးပန်းအချက်ရေအများအပြားကို ပစ်လွှတ်ခဲ့တာဖြစ်ပြီး ရီးရဲလ်ကစားသမားတွေ ကောင်းကောင်းအနားယူမရအောင် လုပ်ခဲ့တာပါ။ ကစားသမားတွေအနေနဲ့ အားအင်ပြည့်၀မှုမရှိရင် ဒီနေ့ကစားမယ့်ပွဲမှာ စွမ်းဆောင်ရည်ကျဆင်းလာနိုင်ပြီး ဒီလိုသာဆိုရင် လီဗာပူးလ်က အန်ဖီးလ်မှာ အသာစီးရနိုင်တဲ့ အခြေအနေမှာ ရှိသွားမှာဖြစ်ပါတယ်။
လီဗာပူးလ်ပရိသတ်တွေရဲ့ လုပ်ရပ်ကို ရီးရဲလ်မက်ဒရစ်ပရိသတ်တွေကလည်း ဒေါသထွက်နေပြီး ဘာနေဗျူးမှာ ကစားမယ့်ပွဲကျရင် ဒီလိုတုံ့ပြန်လာဖွယ်ရှိပါတယ်။ လီဗာပူးလ်ဟာ ရီးရဲလ်နဲ့ နောက်ဆုံးတွေ့ခဲ့တဲ့ ချန်ပီယံလိဂ် ၅ ပွဲစလုံးကို အနိုင်မရထားဘဲ ၄ပွဲအထိ အရေးနိမ့်ခဲ့ကာ ဒီနေ့ည အိမ်ကွင်းပွဲမှာ ရလဒ်ကောင်းပိုင်ဆိုင်ထားဖို့ အရေးကြီးနေပါတယ်။
ဒီနှစ်သင်းက ပြီးခဲ့တဲ့ရာသီမှာ ဗိုလ်လုပွဲကစားခဲ့ပြီး ဗင်နီရှပ်ရဲ့ သွင်းဂိုးနဲ့ ရီးရဲလ်တို့ အနိုင်ရခဲ့ပါတယ်။ အဆိုပါပွဲအပြီးမှာ လီဗာပူးလ်နည်းပြကလော့ပ်က နောက်ရာသီမှာ သူတို့ ဗိုလ်လုပွဲကို ပြန်လာမယ်လို့ ကြုံးဝါးခဲ့ပြီး အသင်းပရိသတ်တွေကို ဗိုလ်လုပွဲကျင်းပမယ့် အစ္စတန်ဘူလ်မြို့က ဟိုတယ်တွေကိုပါ ကြိုတင်ဘွတ်ကင်လုပ်ထားဆိုပြီး ပြောခဲ့ဖူးပါတယ်။