အဆန်စီယိုဟာ ယခုနွေရာသီမှာ ရီးရဲလ်မက်ဒရစ်အသင်းနဲ့ စာချုပ်သက်တမ်းကုန်ဆုံးတော့မှာဖြစ်ပေမယ့်လည်း စာချုပ်သက်တမ်းတိုးဖို့ ဆွေးနွေးညှိနှိုင်းမှုတွေက ခက်ခဲနေပြီး စပိန်တောင်ပံကစားသမားရဲ့ လစာတောင်းဆိုမှုပမာဏက အဓိကအချက်တစ်ခုအဖြစ်နိုင်တယ်လို့ MARCA က ဖော်ပြခဲ့ပါတယ်။ အဆန်စီယိုဟာ အသင်းထဲက ၎င်းရဲ့ အခန်းကဏ္ဍကိုလည်း သိချင်နေပြီး ကျန်တဲ့အရာတွေထက် ပထမအသင်းမှာ ပုံမှန်ပွဲထွက်ကစားခွင့်ရရှိချင်နေတာဖြစ်တယ်လို့ ယင်းသတင်းက ဖော်ပြခဲ့ပါတယ်။

တစ်ဆက်တည်းမှာ အာဆင်နယ်နဲ့ မန်ချက်စတာယူနိုက်တက်တို့အတွက် အဆန်စီယိုနဲ့ ရီးရဲလ်မက်ဒရစ်တို့ကြား ပြောဆိုဆွေးနွေးမှုတွေ ပျက်ပြယ်သွားတာနဲ့ ခေါ်ယူဖို့အတွက် အဆင်သင့်ပြင်ထားဖို့ အချက်ပေးသံဖြစ်လာခဲ့တာဖြစ်ပြီး အသက် ၂၇ နှစ်အရွယ် စပိန်ကြယ်ပွင့်ဟာ အယ်လ်ချီကို ၄-၀ နဲ့ အနိုင်ရရှိခဲ့တဲ့ပွဲမှာ ဂိုးသွင်းယူနိုင်ခဲ့ပေမယ့် အန်ဆယ်လော့တီရဲ့အသင်းမှာ ယခုရာသီ ပုံမှန်ပါဝင်ကစားခွင့်မရရှိခဲ့တာဖြစ်ပါတယ်။ ရီးရဲလ်မက်ဒရစ်နည်းပြ အန်ဆယ်လော့တီက လက်ရှိမှာ အဆန်စီယိုကို အသင်းကနေ ထွက်ခွာခွင့် ပေးလိုက်ပြီဖြစ်ပြီး စပိန်တောင်ပံကစားသမား အသင်းမှာ ဆက်နေသည်ဖြစ်စေ၊ မနေသည်ဖြစ်စေ ဂရုမစိုက်ဘူးလို့ ပြောကြားခဲ့တာဖြစ်ပါတယ်။

Defensa Central ရဲ့ ဖော်ပြချက်အရ မန်ချက်စတာယူနိုက်တက်နည်းပြဟာ ကိုဒီ ဂက်ခ်ပိုက လီဗာပူးလ်ကို ပြောင်းရွှေ့သွားခဲ့ပြီးနောက် အဆန်စီယိုဘက်ကို အာရုံပြောင်းခဲ့ပေမယ့်လည်း ဗက်ဟော့စ်ကို ရေတို ဖြေရှင်းနည်းအဖြစ် အငှားနဲ့ ခေါ်ယူခဲ့ပြီး လာမယ့်နွေရာသီမှာ ရေရှည်အစားထိုးနိုင်မယ့် တိုက်စစ်မှူးကို ရှာဖွေနေတယ်လို့ သိရပါတယ်။ ရီးရဲလ်မက်ဒရစ်က ကမ်းလှမ်းမှုတွေကို နားထောင်သွားချင်နေတယ်လို့ သတင်းတွေ ထွက်ပေါ်လာခဲ့ပြီးနောက် အဆန်စီယိုကို ပြီးခဲ့တဲ့လက အာဆင်နယ်အသင်းကလည်း ခေါ်ယူဖို့ စိတ်ဝင်စားခဲ့တယ်လို့ ကောလာဟလတွေ ထွက်ပေါ်ခဲ့ပြီး Mundo Deportivo ရဲ့ ဖော်ပြချက်အရ ဂန်းနားတွေဟာ အဆန်စီယိုကို ခေါ်ယူနိုင်မယ့် အခွင့်အရေးရတာနဲ့ ကမ်းလှမ်းမှုပြုလုပ်သွားဖို့ အဆင်သင့်ဖြစ်နေတယ်လို့ သိရပါတယ်။