စည်သူဘွဲ့ရ၊ ရုပ်ရှင်တစ်သက်တာဆုရှင် ဗိုလ်ကလေးတင့်အောင်ဟာ ၂၀၂၁ ခုနှစ် ဒီဇင်ဘာလ ၁၆ ရက်နေ့ ည ၁၁ နာရီက ရွှေဂုံတိုင် SSC ဆေးရုံမှာ ကွယ်လွန်သွားတယ်လို့ မြန်မာနိုင်ငံ ရုပ်ရှင်အစည်းအရုံး နာယက ဦးနှင်းမိုးက Duwun ကို ပြောပါတယ်။ 

ဗိုလ်ကလေးတင့်အောင်ဟာ ဗမာ့လွတ်လပ်ရေးတပ်မတော်တွင် ပါဝင်ခဲ့သူ တပ်မတော်သားတစ်ဦး ဖြစ်ခဲ့ပြီး နိုင်ငံတော်က စည်သူဘွဲ့ ချီးမြှင့်ခြင်း ခံခဲ့ရသူ ဖြစ်ပါတယ်။ အနုပညာလောကမှာ ရုပ်ရှင် ၊ ဂီတ ၊ သဘင်၊ ပန်းချီ ၊ စာပေ စတဲ့ လောကတွေမှာ ကျင်လည်ခဲ့သလို အောင်မြင်မှုတွေလည်း အများကြီး ရရှိထားသူဖြစ်ပါတယ်။ ၁၉၄၀ ခုနှစ်ကတည်းက စတင်လုပ်ဆောင်ခဲ့တဲ့ အနုပညာအလုပ်တွေကို သူ့အသက် ၉၆ နှစ်အထိ လုပ်ဆောင်နေခဲ့ပါတယ်။ ၁၉၉၆ ခုနှစ်မှာ အမျိုးသား စာပေဆု ၊ လူမှုထူးချွန်(ပထမအဆင့်) တံဆိပ်၊ ဝိဇ္ဇာထူးချွန်(ပထမအဆင့်) တံဆိပ်တို့ ချီးမြှင့်ခံခဲ့ရသူပါ။ သူဟာ ရုပ်ရှင်အစည်းအရုံး ရဲ့ နာယက ၊ ဂီတအစည်းအရုံးရဲ့ နာယက စတဲ့ တာဝန်တွေထမ်းဆောင်ခဲ့ပြီး အနုပညာအလုပ်တွေ လုပ်ခဲ့ပါတယ်။ အဲဒီနောက် ဘိုကလေးမြို့နယ်အသင်း၊ ကျိုက်လတ် မြို့နယ် အသင်းနှင့် ကျုံမငေးမြို့နယ် အသင်းတို့ရဲ့ နာယက အဖြစ် လူမှုရေးလုပ်ငန်းတွေကိုလည်း ဆောင်ရွက်နေဆဲဖြစ်တယ်လို့ သိရပါတယ်။