ဗြိတိန်ရဲ့ အချမ်းသာဆုံးသူဌေးကြီး ဆာဂျင်ရက်တ်ကလစ်ဖ်ရဲ့ INEOS Gruop ဟာ မန်ချက်စတာယူနိုက်တက်ကို ဝယ်ယူဖို့အတွက် တရားဝင်ကမ်းလှမ်းမှုပြုလုပ်လိုက်ပြီလို့ သတင်းထုတ်ပြန်ခဲ့ပါတယ်။ အသက် ၇၀ အရွယ် ဗြိတိန်သူဌေးကြီးဟာ ဒီလိုမျိုးကမ်းလှမ်းမှုအတွက် အကြံပေးဖို့ Wall Street ကုမ္ပဏီတွေဖြစ်တဲ့ JPMorgan နဲ့ Goldman Sachs တို့ကို ငှားရမ်းထားသေးတယ်လို့ သိရပါတယ်။
Athletic ရဲ့ ဖော်ပြချက်အရ ရတ်ကလစ်ဖ်ဟာ သူ့ရဲ့ ကမ်းလှမ်းမှုအောင်မြင်ခဲ့မယ်ဆိုရင် မန်ချက်စတာမှာ မန်ချက်စတာယူနိုက်တက်ကို မူလနေရာကို ပြန်လည်ရောက်ရှိအောင် လုပ်ပေးနိုင်ဖို့ မျှော်လင့်ထားကြောင်း သိရပါတယ်။ သူဟာ ယူနိုက်တက်ကို ဝယ်ယူဖို့အတွက် စီစဉ်နေတဲ့ လုပ်ငန်းအများအပြားထဲမှာ ကမ်းလှမ်းမှုပြုလုပ်ခဲ့ကြောင်း တရားဝင်ကြေညာခဲ့တဲ့ ဒုတိယမြောက် လုပ်ငန်းစုဖြစ်လာပါတယ်။
သူ့ထက်အရင် မန်ချက်စတာယူနိုက်တက်ကို ဝယ်ယူဖို့အတွက် တရားဝင်ကမ်းလှမ်းမှုပြုလုပ်ပြီးပြီလို့ ကြေညာခဲ့တာကတော့ ကာတာစော်ဘွားပိုင်ဆိုင်တဲ့ QIB ဘဏ်ဖြစ်ပါတယ်။ ဘဏ်ရဲ့ ဥက္ကဌဖြစ်သူ စော်ဘွားရှိတ်ဂျာဆင်ဘင်ဟာမကအယ်လ်သာနီက တရားဝင်ကမ်းလှမ်းမှုပြုလုပ်ခဲ့ပြီးပြီလို့ ကြေညာခဲ့ကာ သူဟာ ယူနိုက်တက်ကို ၁၀၀% အပြည့် ပိုင်ဆိုင်မှုရဖို့အတွက် ဝယ်ယူတာဖြစ်ပြီး ဒီလိုမျိုး ကမ်းလှမ်းရာမှာ အသုံးပြုမယ့်ငွေကြေးကို လက်ငင်းပေးချေသွားမယ်လို့ သိရပါတယ်။
ဒါကြောင့် လက်ရှိမှာ ယူနိုက်တက်ကို ဝယ်ယူဖို့ ကမ်းလှမ်းထားတဲ့ ကမ္ဘာကျော်လုပ်ငန်းစုကြီးက ၂ ခုရှိလာခဲ့ပါပြီ။ ရက်တ်ကလစ်ဖ်ကတော့ ပြင်သစ်လီဂူးကလပ် NICE ကို ၂၀၁၉ တုန်းက ပေါင် ၉၁ သန်းနဲ့ ဝယ်ယူထားသူဖြစ်ပါတယ်။ အဲဒီမတိုင်ခင် ၂၀၁၇ တုန်းကလည်းသူက ဆွစ်ဇာလန်ကလပ် FC Lausanne-Sport ကို ဝယ်ယူထားပါတယ်။
ကာတာစော်ဘွားအယ်သာနီကတော့ ယူနိုက်တက်ကို ဝယ်ယူတဲ့ ကမ်းလှမ်းမှုမှာ ဦးဆောင်မယ့် အဖွဲ့အစည်းနာမည်ကို Nine Two ဖောင်ဒေးရှင်းလို့ နာမည်ပေးထားပါတယ်။ ဒါဟာ ၁၉၉၂ မှာ သူက ယူနိုက်တက်ပရိသတ်စတင်ဖြစ်ခဲ့ပြီး ယူနိုက်တက်ရဲ့ ရွှေရောင်မျိုးဆက် Class of 92 ကို ရည်ညွှန်းတာလို့လည်း Sky Sports က ဆိုပါတယ်။
ယူနိုက်တက်ကို ဝယ်ယူပြီးပါက သူက ငွေကြေးအမြတ်အစွန်းရတာ၊ မရတာကို ဆန္ဒမရှိဘဲ အသင်းကို ချစ်ခင်အားပေးခဲ့တဲ့ သူ့ရဲ့ ဆန္ဒကြောင့်သာ ဝယ်ယူတာလို့လည်းဆိုပါတယ်။ သူဟာ ကာတာရဲ့ ဥသျှောင်စော်ဘွားဖြစ်သူရဲ့ အစ်ကိုလို့သိရပြီး ငွေကြေးအားဖြင့်တော့ ချမ်းသာကြွယ်၀မှုက အလျှံပယ်ရှိတဲ့ ပုဂ္ဂိုလ်တဦးဖြစ်ပါတယ်။