လက်ရှိအသင်းပိုင်ရှင်ဂလေဇာမိသားစုကို မကျေမနပ်ဖြစ်နေတဲ့ ယူနိုက်တက်ပရိသတ်တွေက အီလွန်မက်စ်ကို ကြိုဆိုနေကြပါပြီ။ တခုစဉ်းစားစရာရှိတာကတော့ အီလွန်မက်စ်ရဲ့ တွစ်တာပေါ်က သူရေးသားခဲ့မှုတွေရဲ့ မှတ်တမ်းပါ။ အီလွန်မက်စ်က မကြာခဏဆိုသလို သူ စိတ်ကူးပေါက်ရာတွေကို ရေးသားပြောဆိုလေ့ရှိပြီး ဟိုဟာလုပ်မယ်၊ ဒီဟာလုပ်မယ်ဆိုကာ တကယ်တမ်းတော့ ဘာမှဖြစ်မလာဘဲ ဒီအတိုင်းအဆုံးသတ်ခဲ့တာတွေရှိခဲ့ပါတယ်။

အထင်ရှားဆုံးကတော့ တွစ်တာကို ဒေါ်လာဘီလျံပေါင်းများစွာပေးချေပြီး ဝယ်ယူဖို့အတွက် လုပ်ဆောင်ခဲ့ပြီး တကယ်အပြီးသတ်လုပ်ရတော့မယ့်အချိန်မှာ မဝယ်ယူတော့ဘူးဆိုပြီး ပြောဆိုခဲ့တာပါ။ ဒါကြောင့်လည်း လက်ရှိမှာ တွစ်တာရှယ်ယာရှင်တွေက အီလွန်မက်စ်ကို တရားစွဲဆိုမှုတွေပြုလုပ်ထားပြီး ဒီပြသနာကို ဖြေရှင်းနေရပါတယ်။ 

ပရိသတ်တဦးကတော့ "မက်ဂွိုင်းယားကို အင်္ဂါဂြိုလ်ဆီပို့ပေးပါ" လို့ တောင်းဆိုခဲ့ပြီး သူ့ရေးသားမှုကို တော်တော်များများက သဘောကျနေကြပါတယ်။ ယူနိုက်တက်မှာ အသင်းခေါင်းဆောင်အဖြစ်တာဝန်ယူနေရတဲ့ မက်ဂွိုင်းယားက ခြေစွမ်းမပြနိုင်လို့ ဝေဖန်ခံနေရသူဖြစ်ကာ အသင်းကိုဦးဆောင်နိုင်စွမ်းမရှိသူလို့လည်း သတ်မှတ်ခံထားရပါတယ်။