မြန်မာ့ရုပ်ရှင် တစ်သက်တာ ထူးချွန်ဆုကို ရုပ်ရှင်သရုပ်ဆောင်ကြီး မြင့်မြင့်ခင်က ရရှိခဲ့ပါတယ်။ ဒေါ်မြင့်မြင့်ခင်ရဲ့ အနုပညာသက်တမ်းကလည်း ၆၉ နှစ်ရှိပြီ ဖြစ်ပါတယ်။

''

ကျွန်မ ဒီဆုကို ရဖို့ မမျှော်လင့်ပါဘူး။ တစ်သက်တာဆု ဆိုတာ အရမ်းကို ရခဲပါတယ်။ ဒီဆု နဲ့ ကိုက်ညီတဲ့ သူမှသာလျှင်ရတာပါ။ နောင်လာနောင်သားတွေလည်း ကျွန်မတို့လို တစ်သက်တာ ဆုကို ရရှိစေချင်ပါတယ်။ နားပန်းဆံ ဇာတ်ကားကို သီဆိုပေးတဲ့ သား ရန်အောင်ကိုလည်း ကျေးဇူးတင်ပါတယ်။ ကိုသက် ကိုလည်း ကျေးဇူးတင်ပါတယ်'' ဆိုပြီးတော့ အကယ်ဒမီ ဆု ရယူရင်း ပြောကြားခဲ့တာပါ။

ဒေါ်မြင့်မြင့်ခင်ဟာ အခုဆိုရင် အသက် ၈၅ နှစ်ရှိပြီဖြစ်ပါတယ်။ သူမဟာ ၁၉၅၀ ခုနှစ်က စပြီး ဒါရိုက်တာ အောင်ကြီး ရိုက်ကူးတဲ့ ‘’ မာယာရှင်’’ ဇာတ်ကားမှာ အဓိက သရုပ်ဆောင်တစ်ယောက်အဖြစ် ပထမဆုံးပါဝင်သရုပ်ဆောင်ခဲ့တာဖြစ်ပါတယ်။ အဲဒီနောက် ‘’ချစ်ညီမ’’ ၊ ‘’ဖြေလျှော့ခွေ’’၊ ‘’ မုန်းပါတယ် မောင့်ကို’’ ၊ ‘’မှတစ်ပါး အခြားမရှိ’’၊ ‘’မြင်းမိုရ်တောင်ဦး မကကျူးသား’’ စတဲ့ ရုပ်ရှင်ဇာတ်ကားတွေနဲ့ အကောင်းဆုံး အမျိုးသမီး ဇာတ်ဆောင်ဆု ၅ ဆုုကိုလည်း ရရှိပိုင်ဆိုင်ထားသူပါ။ အခုဆိုရင်တော့ ဒေါ်မြင့်မြင့်ခင်ရဲ့ အနုပညာသက်တမ်းဟာ ၆၉ နှစ် ရှိပြီဖြစ်ပါတယ်။ 

၂၀၁၈ ခုနှစ်အတွက် ရုပ်ရှင်အကယ်ဒမီထူးချွန်ဆုပေးပွဲကို မတ်လ ၂၃ ရက်နေ့က The One Entertaianment Park မှာ ကျင်းပပြုလုပ်နေတာဖြစ်ပါတယ်။ ဒီပွဲကိုတော့ မြန်မာတစ်နိုင်ငံလုံးက ပရိသတ်တွေက အလေးထား စောင့်ကြည့်ရတဲ့ ပွဲတစ်ပွဲလည်းဖြစ်ပါတယ်။ ဒီပွဲအပေါ် အနုပညာရှင်တွေသာမက ပရိသတ်တွေကပါ ရင်ခုန် စိတ်လှုပ်ရှားရင်း တစ်နှစ်တစ်ခါ စောင့်မျှော်ရတဲ့ ပွဲပါ။