မေကဗျာ ကတော့ အသက် ၃၀ ကျော်မှ အက ပြိုင်ပွဲကို ဝင်ပြိုင်ဖြစ်တဲ့အကြောင်းပြောလာပါတယ်။ သူမကိုယ်တိုင်ကလည်း အနုပညာအလုပ်တွေ မလုပ်ခင်ကတည်းက အက ကခဲ့သူပါတဲ့။
Photo: May Kabyar
သရုပ်ဆောင် မေကဗျာကတော့ Dancing with the stars ဆိုတဲ့ ပြိုင်ပွဲမှာ အက ဝင်ပြိုင်မယ်လို့ သိရပါတယ်။ သူမရဲ့ အနုပညာအလုပ်တွေ စတင်ခဲ့တာကလည်း အက နဲ့ပဲ စတင်ခဲ့တာဖြစ်တယ်လို့ မီဒီယာ အင်တာဗျူးတွေမှာ ဖြေဆိုခဲ့ပါတယ်။
‘’ တစ်ခါတလေကျရင်လည်း ပြန်စဉ်းစားမိတယ်။ ငါဘာလို့ ကမိတာလဲ ကလေးတွေကြားထဲမှာပေါ့နော်။ အသက်ကြီးကောင်ကြီးမားနဲ့ ဘာလို့ဝင်ကဖြစ်တာလဲ မသိဘူးပေါ့။ ဒါပေမယ့် ကိုယ်က အရမ်းကချင်တာ၊ အကဆိုရင် ဝါသနာပါတယ်။ အကလို့ဆိုလိုက်တာနဲ့ ပါမယ်၊ ပါမယ်ကြီးဖြစ်နေတာပေါ့နော်။ အရင်တုန်းက ကိုယ် ကဖူးခဲ့တယ်ဆိုတဲ့ Dancer ဘဝလေးကို ပရိသတ်ကို ချပြချင်တာ။ ကိုယ်က ဒီ Dancer ဘဝကနေ တက်လာတယ်ဆိုတာကို သိစေချင်တယ်။ စိတ်လည်းလှုပ်ရှားတယ်။ ရင်လည်းခုန်တယ်၊ ကြောက်လည်း ကြောက်တယ်’’ လို့ သူကဆိုပါတယ်။
Photo: May Kabyar
မေကဗျာဟာ သရုပ်ဆောင်လောကထဲမှာ အောင်မြင်မှုတွေရရှိနေတဲ့ သရုပ်ဆောင် တစ်ယောက်ဆိုရင်လည်း မမှားပါဘူး။ ဒါပေမယ့် အဓိက ဝါသနာအရင်းခံ တစ်ခုဖြစ်တဲ့ အက ကိုတော့ လက်မလွှတ်ချင်တဲ့အကြောင်း ပြောလာပါတယ်။
‘’အစ်မရဲ့ အဓိက ဝါသနာက အကပါ။ သရုပ်ဆောင်တာတောင်မှ အကလောက် ဝါသနာမပါဘူး။ မူကြိုတုန်းကလည်း အငြိမ့်အဖွဲ့လေးမှာ ကဖူးတယ်။ ၁၃ နှစ်သမီးလောက်တုန်းကလည်း မတင်မိုးလွင်ဆီမှာ အကအဖွဲ့လေး ဖွဲ့ပြီးတော့ ကဖူးတယ်။ မထက်ထက်ဝင်းတို့နဲ့ Baby G ဆိုတဲ့ အဖွဲ့ဖွဲ့ပြီးတော့ ကဖူးတယ်။ အဲဒါကြောင့်မို့လို့ အခု အသက် ၃၀ ကျော်မှ ပြန်ကတာပါ’’ ဆိုပြီးတော့ သဘောကျရယ်မောရင်း ပြောပြလာပါတယ်။
Photo: May Kabyar
အရင်တုန်းက ကခဲ့ဖူးတဲ့ အကတွေနဲ့ အခုလက်ရှိ အက တွေမှာ ကွဲပြားတာတွေရှိတယ်လို့ မေကဗျာက ပြောပါတယ်။
‘’ အခြေခံကတော့ တူတာပေါ့နော်။ ဒီမှာ အခုပြိုင်ရမယ့် Theme တွေက အများကြီးဆိုတော့ ကိုယ်မက ဖူးတာတွေလည်း အများကြီးပါတယ်။ ကိုယ်က ဖူးတာလေးက ၂ မျိုး၊ ၃ မျိုးလောက်ပဲ ပါတာ။ ဒီမှာက ကိုယ်မကဖူးတာတွေ၊ ကိုယ်မကြားဖူးတဲ့ အကတွေတောင် ပါတယ်’’ ဆိုပြီးတော့ အောက်တိုဘာလ ၂၆ ရက်နေ့က ကျင်းပပြုလုပ်တဲ့ Dancing with the stars စာနယ်ဇင်း မိတ်ဆက်ပွဲမှာ ဖြေဆိုခဲ့တာပါ။
Photo: May Kabyar
မေကဗျာကိုတော့ ဗီဒီယိုဇာတ်ကားတွေကနေတဆင့် ပရိသတ်တွေ အားပေးလာခဲ့ကြတာပါ။ သူမရဲ့ အနုပညာသက်တမ်းကလည်း အတော်ကြာနေပြီဖြစ်ပါတယ်။ အခုဆိုရင်တော့ သရုပ်ဆောင်အလုပ်ထက် ကိုယ်ပိုင်စီးပွားရေးဖြစ်တဲ့ စက်ချုပ်လုပ်ငန်းကို ပိုဦးစားပေးလုပ်ကိုင်နေတာ တွေ့ရပါတယ်။ အဲဒီနောက် နှင်းဆီအဖွဲ့သားတွေနဲ့အတူ အနုပညာအလုပ်တွေ လုပ်ကိုင်နေသူလည်း ဖြစ်ပါတယ်။