ညီနန္ဒ အနေနဲ့ အနုပညာအလုပ်တွေ ပြန်မလုပ်ခင်တုန်းက ဖြစ်ပေါ်ခဲ့တဲ့ ငွေကြေးအခက်အခဲတွေကို အကောင်းဆုံး ဖြစ်လာအောင် ကြိုးစားနေတယ်လို့ဆိုပါတယ်။

ညီနန္ဒဟာ လက်ရှိမှာ ထောပတ်ထမင်းရောင်းပြီး မိသားစု စားဝတ်နေရေး ဖြေရှင်းနေတာ တွေ့ရပါတယ်။ သူ့အနေနဲ့ ရရှိလာတဲ့ ငွေကြေးတွေ ထဲက အကြွေးကိစ္စတွေလည်း ဖြေရှင်းရတယ်လို့ Duwun ကနေ ပြောပြလာပါတယ်။ 

“ ဒီရက်ထဲမှာတော့ အစ်ကို ပေးနိုင်သလောက် အကြွေးတွေထဲက နည်းနည်းစီပေးတယ်။ အခုချိန်မှာ အစ်ကို့အတွက် စိတ်ညစ်စရာဆိုလို့ အကြွေးကိစ္စတွေပဲရှိတယ်။ ဒါပေမယ့် ဒါတွေကို ခေါင်းထဲမှာ တွေးထားလည်း ရှင်းသွားနိုင်တာမှ မဟုတ်တာ။ တကယ်တမ်းကတော့ အစ်ကိုသည် ပေးနိုင်တဲ့ အချိန်မှာ ပေးဖို့က အဓိက လိုအပ်တယ်။ ပေးနိုင်တဲ့ အချိန်မှာ မပေးတဲ့လူကတော့ ကောင်းတဲ့ လူတစ်ယောက် မဟုတ်ဘူး” လို့ ဆိုပါတယ်။ 

အခုလို အကြွေးကိစ္စတွေကိုလည်း ခေါင်းထဲမှာ အကြာကြီးထားပြီး မတွေးထားဘူးလို့ ညီနန္ဒက ဆိုပါတယ်။ 

Photo: Nyi Nanda

ညီနန္ဒကိုတော့ Music Video တွေ၊ ဗီဒီယို ဇာတ်ကားတွေ ကနေတဆင့် ပရိသတ်တွေ သိရှိလာခဲ့တာ ဖြစ်ပါတယ်။ သူ့ အနေနဲ့ စီးပွားရေးလုပ်ငန်းကို ဦးစားပေးခဲ့ချိန်မှာတော့ အနုပညာလောကနဲ့ ခဏတာ ဝေးကွာသွားခဲ့ပါတယ်။ အဲဒီနောက် ၂၀၁၇ ခုနှစ်ကစပြီး ဒုတိယအကြိမ် အနုပညာလောကထဲကို ဝင်ရောက်လာပြီး " နေရယ် လရယ် အမှန်တရားရယ်" ဇာတ်လမ်းတွဲနဲ့ ပရိသတ် အရှေ့ကို ပြန်လည် ရောက်ရှိလာခဲ့ပါတယ်။ အဲဒီနောက် ရုပ်ရှင်ဇာတ်ကားကြီးတွေလည်း ပြန်လည် ရိုက်ကူးနေရပြီဖြစ်ပါတယ်။