ရုပ်ရှင်သက်ကြီးပူဇော်ပွဲ၊ ရုပ်ရှင်အစည်းအရုံးက လုပ်တဲ့ ဘုံကထိန်ပွဲတွေမှာ ရုပ်ရှင်လောကသား တွေကို သိပ်မတွေ့ရတော့တဲ့အကြောင်း ခန့်စည်သူက ပြောလာပါပြီ။

‘’ ရုပ်ရှင်အစည်းအရုံးနဲ့ ပတ်သက်ပြီးပြောရမယ်ဆိုရင်တော့ သက်ကြီး ပူဇော်ပွဲပေါ့။ ဒီသက်ကြီးပူဇော်ပွဲမှာ လည်း လောကသားတွေ သိပ်မတွေ့ရဘူး။ ဘုံကထိန်မှာလည်း မတွေ့ရတော့ဘူး။ ကြာလာရင် ရုပ်ရှင်အစည်းအရုံးက သရဲခြောက်မှာတောင် ကြောက်ရတယ်။ အားလုံးကလည်း အဆင်မပြေဖြစ်နေကြတဲ့အချိန်မှာ ရုပ်ရှင်အစည်းအရုံးက ဘာလုပ်ပေးနိုင်မလဲဆိုတဲ့ အဖြေကို အားလုံးက သိချင်နေကြတာ’’ လို့ ဆိုပါတယ်။

မကြာသေးခင်က ရာထူးကနေ နုတ်ထွက်သွားတဲ့ ရုပ်ရှင်အစည်းအရုံး ဥက္ကဌ ဦးဇင်ဝိုင်းလက်ထက်မှာလည်း ရုပ်ရှင်လောကအတွက် ကောင်းတာတွေ ဆောင်ရွက်ပေးခဲ့တယ်လို့ ခန့်စည်သူက ပြောပါတယ်။

နောက်တက်လာမယ့် ရုပ်ရှင်အစည်းအရုံး ဥက္ကဌ ကလည်း ရုပ်ရှင်လောကသားတွေအတွက် လိုအပ်တာကို ဖြည့်ဆည်းပေးနိုင်မယ့် ဥက္ကဌမျိုးဖြစ်စေချင်တယ်လို့ ခန့်စည်သူက ပြောပါတယ်။

‘’ အခု ကျဆင်းနေတဲ့ ဇာတ်ကားတွေ Block ဖြစ်နေတယ်။ ရုံတင်ခွင့်မရတဲ့ ကိစ္စတွေရယ်၊ ဗီဒီယို ဆိုတာ လုံးဝ ပျောက်ပျက်သွားတာပေါ့နော်။ ကိုယ့်လောကသားတွေအားလုံး စားဝတ်နေရေးလည်း အဆင်ပြေမယ်။ လုပ်ငန်းလည်း အဆင်ပြေမယ်၊ အဲဒါမျိုးကို ဖန်တီးပေးနိုင်မယ့် စီးပွားရေးကိုလည်းနားလည်၊ အနုပညာကို ချစ်မြတ်နိုးတဲ့ လူတစ်ယောက်ပေါ်လာမယ်ဆိုရင်တော့ အားလုံးက လက်ခံရမှာပဲလေ’’

ခန့်စည်သူဟာ သီဟသုဓမ္မမဏိဇောတဓရ၊ အဘိဓမ္မဓရ အကယ်ဒမီ ခန့်စည်သူဆိုတဲ့ ဘွဲ့ကို လည်း ရရှိထား သူဖြစ်ပါတယ်။ သူဟာ ၂၀၀၈ ခုနှစ်တုန်းက ‘’အများနှင့် မသက်ဆိုင်သောသူ’’ ဆိုတဲ့ ရုပ်ရှင်ဇာတ်ကားကြီးနဲ့ အကောင်းဆုံး အမျိုးသားဇာတ်ဆောင်ဆုကို ရရှိထားသူဖြစ်ပါတယ်။ လက်ရှိမှာလည်း ‘’မေတ္တာသိင်္ဂဟ’’ အသင်းကြီးကို ဦးဆောင်ပြီး ပရဟိတအလုပ်တွေလုပ်ဆောင်နေတာ တွေ့ရပါတယ်။