အေးမြတ်သူကတော့ အနုပညာရှင် တစ်ယောက်အနေနဲ့ အနုပညာအလုပ်တွေ ပြန်လုပ်ခွင့်ရလာတဲ့ အတွက် အရမ်းဝမ်းသာတယ်လို့ ပြောပါတယ်။
Photo: Aye Myat Thu
COVID-19 ကူးစက်ရောဂါကြောင့် အနုပညာရှင်များစွာဟာ (၄) လအကြာ ဇာတ်ကားရိုက်ကူးရေးတွေ နားခဲ့ရပါတယ်။ အခုဆိုရင်တော့ ဇာတ်ကားရိုက်ကူးခွင့်တွေ ပြန်ရလာပြီဆိုတဲ့ အပေါ် အနုပညာလောကသားတွေအတွက် သရုပ်ဆောင် အေးမြတ်သူက ဝမ်းသာပီတိဖြစ်ရတယ်လို့ Duwun ကို ပြောပြလာပါတယ်။
“ ရိုက်ခွင့်တွေ ပြန်ရတဲ့အချိန်မှာ အရမ်းဝမ်းသာတယ်။ အရင်တုန်းကတော့ ရိုက်ခွင့်မရလို့ မရိုက်ရဘူးဆိုတော့ လူတွေက ဘာမှ မတွေးရတော့ဘူး။ အခုကျတော့ စည်းဘောင်လေးနဲ့ ပြန်ရိုက်ရတော့မယ် ဆိုတော့ အရမ်းဝမ်းသာတယ်။ အရင်တုန်းကလည်း ဇာတ်ကားတွေ ပြန်ရိုက်ချင်တယ်လို့ ပြောခဲ့ဖူးတယ်။ လုပ်ခွင့်ရပြီဆိုတော့ ဘယ်လို လုပ်လို့ရမလဲဆိုတဲ့ မျှော်လင့်ချက်လေးတွေ ပါလာပြီဆိုတော့ တာဝန်ရှိတဲ့ လူကြီးတွေကိုလည်း ကျေးဇူး အများကြီးတင်ပါတယ်” လို့ ဆိုပြီးတော့ သြဂုတ်လ ၂ ရက်နေ့က ဝိန့်စိန် ရွှေဆိုင် ဆိုင်သစ်ဖွင့်ပွဲကို တက်ရောက်ရင်း ဖြေဆိုခဲ့တာပါ။
အေးမြတ်သူဟာ ရုပ်ရှင်ရိုက်ကူးခွင့်တွေ ရလာပေမယ့် COVID-19 ကာလမကုန်သေးတာကြောင့် ဂရုတစိုက်နေထိုင်ရဦးမယ်လို့ သူက ဆိုပါတယ်။
Photo: Aye Myat Thu
အေးမြတ်သူက အနုပညာအလုပ်ကို အသက် ၁၉ နှစ်အရွယ်ကတည်းက စတင်လုပ်ကိုင်ခဲ့တာပါ။ အခုချိန်မှာတော့ ရုပ်ရှင်ဇာတ်ကားတွေ၊ ဗီဒီယို ဇာတ်ကားတွေ၊ တီဗီကြော်ငြာပေါင်း များစွာတို့ကို ရိုက်ကူးခဲ့တဲ့ သရုပ်ဆောင်တစ်ယောက်ပါ။ လက်ရှိမှာလည်း ပရိသတ်အခိုင်အမာနဲ့ အောင်မြင်နေတဲ့ သရုပ်ဆောင်ဖြစ်ပြီး အနုပညာအလုပ်တွေကို တစိုက်မတ်မတ် ဆောင်ရွက်နေတာကိုလည်း တွေ့ရပါတယ်။