လူကြမ်းသရုပ်ဆောင် မျိုးကြည်ကတော့ သူ့ရဲ့ဓာတ်ပုံကို တက်တူးအပြည့်ထိုးထားတဲ့ ပရိသတ် တစ်ဦးကြောင့် ပီတိဖြစ်နေရတဲ့အကြောင်းပြောပြလာပါတယ်။
Photo: Metro Brothers
လူကြမ်းသရုပ်ဆောင် မျိုးကြည်ရဲ့ အမိုက်စားဓာတ်ပုံတွေကတော့ အွန်လိုင်းစာမျက်နှာပေါ်မှာ ပရိသတ်တွေရဲ့ စိတ်ဝင်စားမှု အများကြီးရရှိခဲ့တာ တွေ့ရပါတယ်။ ဒီဓာတ်ပုံတွေထဲက တစ်ပုံကို မုံရွာမှာ နေထိုင်တဲ့ ပရိသတ်တစ်ဦးက တက်တူးထိုးခဲ့တာ တွေ့ရလို့ ဝမ်းသာပီတိဖြစ်ရတယ်လို့ Duwun ကနေ ပြောပြလာပါတယ်။
“ အစ်ကိုတို့လို အပယ်ခံ အညတရသမားတစ်ယောက်ကို ဒီလိုမျိုး ဂုဏ်ပြုတဲ့အတွက် တကယ်ကို ကျေးဇူးတင်တယ်။ ဒါကလည်း ရှားရှားပါးပါး ပါ။ ဒါကို အစ်ကို မြင်လိုက်တဲ့ အချိန်မှာ တော်တော်ကို အံ့သြသွားရတယ်။ အစအဆုံး တက်တူးထိုးထားတာတွေကို လိုင်းပေါ်မှာ တင်ကြတာ တွေ့ရပါတယ်။ အဲဒီတက်တူးထိုးတဲ့ ကောင်လေးကလည်း တကယ်တော်တယ်။ ထိုးတဲ့လူကိုလည်း ဖုန်းနဲ့ဝမ်းသာစကားပြောပြီးပါပြီ” လို့ သူကဆိုပါတယ်။
Photo: Metro Brothers, Myo Win
လူကြမ်းသရုပ်ဆောင် ကိုမျိုးကြည်ကိုတော့ သူ့ရဲ့နှုတ်ခမ်းမွှေးကြောင့် ပရိသတ်တွေက စတင်သတိထားမိခဲ့ကြတာ ဖြစ်ပါတယ်။ သူကိုယ်တိုင်ကလည်း နှုတ်ခမ်းမွှေးထားရတာ ဝါသနာတစ်ခုဖြစ်တယ်လို့ ဆိုပါတယ်။
Photo: Metro Brothers
ကိုမျိုးကြည်ကတော့ လူကြမ်းသရုပ်ဆောင် တစ်ယောက်အဖြစ် ရုပ်ရှင်ဇာတ်ကား၊ ဗီဒီယို ဇာတ်ကား တော်တော်များများမှာ ပါဝင်သရုပ်ဆောင်ခဲ့ဖူးသူဖြစ်ပါတယ်။ Metro Brother မှ ဓာတ်ပုံပညာရှင်တွေက ရိုက်ပေးထားတဲ့ ဦးမျိုးကြည်ရဲ့ အမိုက်စား ဓာတ်ပုံတွေကလည်း အွန်လိုင်းစာမျက်နှာပေါ်မှာ အရမ်းကို ပျံ့နှံ့သွားခဲ့တာ တွေ့ရပါတယ်။ လက်ရှိမှာတော့ လူကြမ်းသရုပ်ဆောင် မျိုးကြည်ဟာ နာရေးကူညီမှုအသင်း(ရန်ကုန်)မှာ လုပ်အားပေး ပါဝင်ဆောင်ရွက်နေတယ်လို့ ဆိုပါတယ်။