မြနှင်းရည်လွင်ကတော့ လုံးဝ မRo တတ်တဲ့ ခင်ပွန်းကို ပိုင်ဆိုင်ထားတာပါတဲ့။ သူမက အစအနောက်သန် သလောက် ခင်ပွန်းကတော့ တည်ငြိမ်တဲ့သူပါလို့ ဆိုပါတယ်။

“သူက မRo တတ်ဘူး အရမ်းဆိုးတယ် တကယ်ပဲ။ သူက တည်ငြိမ်တဲ့ဘက်ကို သွားတာပေါ့နော်။ မြနှင်းပြောတာကိုလည်း သူ လက်ခံတဲ့ ပုံစံမျိုးပါ။ ကိုယ်က စနောက်နေတာမျိုးဆိုရင်တောင် သူက ဘာမှကို ပြန်မပြောတော့တာ။ အဲဒါက ပိုအဆင်ပြေတယ်” ဆိုပြီးတော့ သဘောကျရယ်မောရင်း ပြောပြခဲ့ပါတယ်။

မြနှင်းရည်လွင်က အနုပညာအလုပ်တွေ တစိုက်မတ်မတ် လုပ်ဆောင်လာရတဲ့ အချိန်မှာ အခက်အခဲတွေ အများကြီးရှိခဲ့တယ်လို့ သိရပါတယ်။ လူတွေရဲ့ အကြောင်းကိုလည်း သူမရဲ့ အတွေ့အကြုံအရ သိခဲ့ပြီလို့ ဆိုပါတယ်။

မြနှင်းရည်လွင်နဲ့ ခင်ပွန်းဖြစ်သူ ကိုမျိုးသွင်တို့ရဲ့ အိမ်ထောင်ရေးမှာ ကလေးမရှိပေမယ့်လည်း အစစအရာရာ အဆင်ပြေတယ်လို့ မြနှင်းရည်လွင်က ပြောပါတယ်။ လက်ရှိမှာလည်း သူမရဲ့ အနုပညာအလုပ်တွေကို ခင်ပွန်းဖြစ်သူက အပြည့်အဝ ကူညီပေးတယ်လို့ ဆိုပါတယ်။

‘’ကိုယ့် အိမ်ထောင်ရေးကလည်း အဆင်ပြေနေတဲ့လူပေါ့နော်။ ဒါပေမယ့် အရှေ့ကိုတော့ ကြိုမမြင်နိုင်ဘူးပေါ့။ အခုလက်ရှိမှာတော့ သူက ၁၀၀ ရာခိုင်နှုန်း နားလည်ပေးတယ်။ ဒီအလုပ်ကိုလည်း အားကြိုးမာန်တက် ကူညီပေးတယ်ဆိုတော့ ပြဿနာတော့ မရှိသေးဘူး’’ ဆိုပြီးတော့ မီဒီယာ အင်တာဗျူးတွေမှာ ဖြေဆိုခဲ့ဖူးပါတယ်။

သရုပ်ဆောင်မြနှင်းရည်လွင်ကတော့ ဧဒင်နတ်သမီးရုပ်ရှင်ဇာတ်ကားကြီး ရိုက်ကူးပြီးနောက် ၂၀၁၄ ခုနှစ်မှာ ခင်ပွန်းဖြစ်သူ ကိုမျိုးသွင်နဲ့ အိမ်ထောင်ပြုလိုက်တဲ့အတွက် နှစ်အနည်းငယ် လောက် ပရိသတ်နဲ့ အဆက်အသွယ်ပြတ်သွားခဲ့ပါတယ်။ အနုပညာအလုပ်ကို အားပေးတဲ့ ခင်ပွန်းကြောင့်ပဲ ၂၀၁၇ ခုနှစ်အတွင်းမှာ ရုပ်ရှင် ဇာတ်ကားတွေ၊ ရုပ်သံဇာတ်လမ်းတွဲတွေကို ရိုက်ကူးလက်ခံခဲ့တာဖြစ်ပါတယ်။