အစ္စဏီကို တရားလိုစူးရှထက်ဘက်က ကြေအေးပေးခဲ့ပေမယ့် ရာဇဝတ်ကျင့်ထုံး ဥပဒေအရ လွှတ်ပေးလို့ရတဲ့ အနေအထား မရှိတဲ့အကြောင်း တာမွေတရားရုံးက ပြန်ကြားရေးအရာရှိက ပြောခဲ့ပါတယ်။ အခုလို ပြစ်ဒဏ်ပေးလိုက်ရခြင်းကလည်း လူငယ်တွေကို အတုယူမမှားအောင် စံနမူနာအဖြစ် ဆောင်ရွက်ခဲ့တာလို့ ဆိုပါတယ်။

“ အမှုကြေအေးလွှာကို တရားလိုဘက် တင်တာကို ကျွန်တော်တို့လက်ခံပါတယ်။ ဥပဒေအရ လုပ်ပေးနိုင်တဲ့ အနေအထားမျိုးတော့ မဟုတ်ဘူး။ ဒါဟာ မြို့နယ်ဥပဒေရုံးကို လိပ်မူပြီးတင်ရတာပါ။ မြို့နယ် ဥပဒေရုံးကနေမှတဆင့် သက်ဆိုင်ရာတွေကို မေးပါလိမ့်မယ်။ ဒီအမှုကို ရုတ်သိမ်းခွင့်ပြုသင့်ပါတယ်ဆိုပြီးတော့ သူတို့ထင်မှ ရုတ်သိမ်းခွင့်ပြုသင့်တဲ့အကြောင်း ကျွန်တော်တို့ကို လျှောက်ရတာ။ အဲဒီတော့မှ ဥပဒေနဲ့ညီညွတ်တယ်၊ အလားတူပြစ်မှု မမြောက်နိုင်ဘူးဆိုပြီးတော့ ရုတ်သိမ်းခွင့်ပြုလိုက်တာ။ အခုက အဲဒီအဆင့်ထိကို ရောက်မလာဘူး။ ရုတ်သိမ်းခွင့်ပြုတယ်ဆိုတာကို ကျွန်တော်တို့ကို မိတ္ထုလာပေးသွားတာပဲရှိတာ။ ရာဇဝတ်ကျင့်ထုံး ပုဒ်မ ၄၉၄ အရ ဆောင်ရွက်လို့ရတဲ့အနေအထားမှာ မရှိဘူး။ တကယ်လို့သာ ဆောင်ရွက်ခွင့်ရခဲ့တယ်ဆိုရင် အဖြေက တစ်မျိုးဖြစ်သွားနိုင်ပါတယ်” လို့ ဆိုပါတယ်။

လက်ရှိမှာလည်း အစ္စဏီရဲ့ ပြစ်မှုအပေါ် လူငယ်တွေ အတုယူ မမှားစေဖို့ ဆောင်ရွက်လိုက်ရခြင်းဖြစ်တ ယ်လို့လည်း ဦးဝင်းဇော်ဦးက ဆက်လက် ပြောပြလာပါတယ်။

အဆိုတော် အစ္စဏီကို ၂၀၂၀ ခုနှစ် ဇန်နဝါရီလ ၇ ရက်နေ့က ထောင်ဒဏ် ၇ နှစ်ချမှတ်ခဲ့တာဖြစ်ပါတယ်။ သူဟာ ၂၀၁၈ ခုနှစ် ဧပြီလ ၁၂ ရက်နေ့က စတင်အချုပ်ကျခဲ့တာ ဖြစ်ပါတယ်။ အမှုရင်ဆိုင်နေရတာလည်း ၂ နှစ်နဲ့ ၉ လရှိပါပြီ။ ၂၀၁၈ ခုနှစ် မေလ အတွင်းမှာတော့ အစ္စဏီရဲ့ ရည်းစားဟောင်းဖြစ်သူ တရားလို မော်ဒယ်လ်သရုပ်ဆောင် စူးရှထက်က အမှုအပေါ် ပြန်လည်ကျေအေးခဲ့ပေမယ့် တရားဥပဒေ လုပ်ထုံး လုပ်နည်းအရ လွှတ်ပေးလို့ မရသေးဘူးလို့ သိရပါတယ်။ လက်ရှိမှာတော့ အစ္စဏီအတွက် မိသားစုဝင်တွေ၊ အနုပညာမောင်နှမတွေ နဲ့ ပရိသတ်များစွာတို့က စိတ်မကောင်းဖြစ်လို့ နေပါတယ်။