“ဆန္ဒဖော်ထုတ်မယ်”ရုပ်ရှင်ဇာတ်ကားကြီးမှာတော့ ရွှေမှုံရတီကို ဒါရိုက်တာ ကျော်ဇောလင်း(အတွေးပုံရိပ်)က ယောကျ်ားလေးအသွင် ဖန်တီးခဲ့တဲ့အကြောင်းပြောပြလာပါတယ်။ မိန်းမလျာစစ်စစ် တစ်ယောက်ကာရိုက်တာနဲ့ ဇေယျကလည်း သူ့ကို ယောကျ်ားလေးလို့တောင် မမြင်ကြလောက်တော့ဘူးလို့ဆိုပါတယ်။

“ အဓိက ကတော့ ဆံပင်နဲ့ အဝတ်အစားပိုင်းပေါ့နော်။ ဦးမိုးဦးဖြစ်စေချင်တဲ့ အတိုင်း ကြိုးစားဖြစ်တယ်။ မိတ်ကပ်လည်း မလိမ်းဘူး။ ကိုယ်က ယောကျ်ားလေးနဲ့ပိုတူတော့ ယောကျ်ားလေးကာရိုက်တာ သရုပ်ဆောင်ရတယ် ထင်ပါတယ်။ သဲက လမ်းလျှောက်ရင်လည်း ကားတားတားနဲ့ ဒီကာရိုက်တာက သဲအတွက် ပိုအဆင်ပြေတယ်။ ပဲများနေစရာမလိုဘူး” လို့ဆိုပါတယ်။

ရွှေမှုံရတီ မင်းသမီးစဖြစ်ပြီး သိပ်မကြာခင်မှာ “ဆန္ဒဖော်ထုတ်မယ်” ရုပ်ရှင်ဇာတ်ကားကြီးကို ရိုက်ကူးခဲ့တာပါတဲ့။ ယောကျ်ားလေးတစ်ယောက်လို နေထိုင်တတ်တဲ့သူဖြစ်တာကြောင့်လည်း ဒီကာရိုက်တာကို ရွေးချယ်ခဲ့တာလို့ ဒါရိုက်တာ ကျော်ဇောလင်း(အတွေးပုံရိပ်) က ပြောပြခဲ့ပါတယ်။

“ဆန္ဒဖော်ထုတ်မယ်” ရုပ်ရှင်ဇာတ်ကားကြီးထဲမှာ ဇေယျကိုတော့ မိန်းမလျာစစ်စစ်တစ်ယောက်အဖြစ် မြင်တွေ့ရမှာပါ။ ရွှေမှုံရတီရဲ့အစ်ကိုအဖြစ်ပါဝင်သရုပ်ဆောင်ထားတာပါ။ အဲဒီနောက် ပြေတီဦးကို တစ်ဖက်သတ် ချစ်ကြိုက်နေတဲ့ မိန်းမလျာတစ်ယောက်အဖြစ် သရုပ်ဖော်ထားတာ တွေ့ရပါတယ်။

“ ရိုက်ကွင်းပေါ်မှာဆိုလည်း ကိုပြေတီက အရမ်းနောက်တတ်တာ။ ကိုယ့်ကို တွေ့တာနဲ့သူက ရရ ဆိုတာပဲခေါ်တယ်။ ကျွန်တော့်ကိုကြည့်ပြီး ငါတော့ ပြစ်မှားချင်လာပြီဆိုပြီးတော့ စတာ။ အဲဒီအခါကျရင် ဟာ အစ်ကို ..ကျွန်တော် ယောကျ်ားလေးနော်လို့ပြောရတယ်။ ဦးအောင်ခိုင်နဲ့တွေ့ရင်လည်း ဟာ..မင်းကွာ..ဆိုတာချည်းပဲ။ ရွှေမှုံရတီကလည်း ကျွန်တော့်ကို ယောကျ်ားလေးလို့ မမြင်တော့ဘူး လုံးဝ မိန်းကလေး ပုံစံပဲ မြင်သွားတော့တာ” လို့ သူကပြောပါတယ်။

“ဆန္ဒဖော်ထုတ်မယ်” ရုပ်ရှင်ဇာတ်ကားကြီးကို လပ်ကီးဆဲဗင်း ရုပ်ရှင်ထုတ်လုပ်ရေးက ထုတ်လုပ်ထားတာဖြစ်ပြီး ဒါရိုက်တာ ကျော်ဇောလင်း(အတွေးပုံရိပ်) က ရိုက်ကူးပုံဖော်ထားတာဖြစ်ပါတယ်။ ဒီဇာတ်ကားထဲမှာ သရုပ်ဆောင် ပြေတီဦး၊ ဇေယျ နဲ့ ရွှေမှုံရတီတို့က အဓိက ပါဝင်သရုပ်ဆောင်ထားတာပါ။ “ဆန္ဒဖော်ထုတ်မယ်” ရုပ်ရှင်ဇာတ်ကားကြီးကို နိုဝင်ဘာလ ၂၈ ရက်နေ့ဆိုရင် မြန်မာတစ်နိုင်ငံလုံးမှာရှိတဲ့ အဆင့်မြင့်ရုပ်ရှင်ရုံတွေမှာ ရုံတင်ပြသသွားမှာဖြစ်ပါတယ်။