ရဲရင့်အောင်ကတော့ သူ့ရဲ့ ဆံပင်စတိုင်လ်အသစ်လေး အပေါ် ချစ်သူဖြစ်တဲ့ ဧငြိမ်းဖြူရဲ့ သဘောထားကို ပြောပြလာပါတယ်။ 

ရဲရင့်အောင်ဟာ ဆံပင်ပုံစံပြောင်းလိုက်တဲ့ အချိန်မှာ ချစ်သူလေး ဧငြိမ်းဖြူက ရုတ်တရက်တွေ့ရင်တောင် မမှတ်မိနိုင်လောက်တဲ့အထိဖြစ်သွားတယ်လို့ ဆိုပါတယ်။ ဧငြိမ်းဖြူကတော့ သပ်သပ်ရပ်ရပ် ပုံစံလေးကို သဘောကျတယ်လို့ မီဒီယာတွေကို ပြောပြလာပါတယ်။ 

“ ကျွန်တော့်ရဲ့ ဒီဆံပင်ပုံစံပြောင်းပြီး နောက်တစ်ရက် သူနဲ့တွေ့တော့ ရဲရင့်အောင်ဆိုတာကို သူလက်ခံလို့မရသေးဘူး။ ရုတ်တရက်တွေ့ရင် ရဲရင့်အောင် ဆိုတာကို သူ လက်မခံနိုင်သေးဘူးလို့တော့ ပြောတယ်။ သူက တကယ်တော့ သပ်သပ်ရပ်ရပ်ကြိုက်တဲ့သူ။ ဒါပေမယ့် ကျွန်တော်နဲ့ပေါင်းတော့မှ သူကိုယ်တိုင်လည်း ကို့ယို့ကားယားတွေ ဝတ်တတ်နေပါပြီ” လို့ သူကဆိုပါတယ်။ 

ရဲရင့်အောင်ကလည်း ဆံပင်ပုံစံကို သူ့ရဲ့ စိတ်တိုင်းကျပြောင်းလိုက်တာလို့ ဆိုပါတယ်။ ရှုပ်ရှုပ်ပွပွဖြစ်နေတဲ့ ဆံပင်စတိုင်လ်လေးကို သဘောကျတယ်ဆိုပြီးတော့ သြဂုတ်လ(၁၆) ရက်နေ့က G.O.A.T အခွေ မိတ်ဆက်ပွဲမှာ ဖြေဆိုခဲ့တာပါ။ 

“ ကျွန်တော် ဒီဆံပင်ပုံလုပ်ချင်တာက အရင်တုန်းကတည်းကပါ။ ဆံပင်ကို ကောက်ပြီးတော့ ဖွပစ်လိုက်ချင်တဲ့ ဆန္ဒပေါ့နော်။ ပြီးတော့ တစ်ခုခုဆို အရမ်းကြီးပြင်ဆင်နေရတာ ကျွန်တော်နဲ့ အဆင်မပြေဘူးလို့ထင်တယ်။ စုတ်စုတ်ပြတ်ပြတ် ရှုပ်ရှုပ်ပွပွနေချင်လို့ပေါ့နော်။ ကျွန်တော့် ဘေးက လူတွေကတော့ ဘယ်လို ဘယ်လိုဆိုတာ Comment သိပ်မပေးကြဘူး” လို့ ဆက်လက် ပြောပြခဲ့ပါတယ်။ 

Photo: Htike

ရဲရင့်အောင်ကတော့ " ငါ့နေရာ" ဆိုတဲ့ သီချင်းကနေတဆင့် ပရိသတ်သိခဲ့သူ တစ်ယောက်ပါ။ အခုဆိုရင်တော့ ဂီတလောကမှာ ပရိသတ်အားပေးမှု အခိုင်အမာနဲ့ အောင်မြင်လာတဲ့ အဆိုတော် တစ်ယောက် ဖြစ်လို့နေပါပြီ။ သူ့ရဲ့ ပထမဆုံး တစ်ကိုယ်တော်အခွေဖြစ်တဲ့ " သဝေထိုးခခွေးယပင့်" သီချင်းအခွေကို ၂၀၁၄ ခုနှစ်က ထွက်ရှိခဲ့တာ ဖြစ်ပါတယ်။ ၂၀၂၀ခုနှစ် သြဂုတ်လ(၁၈) ရက်နေ့မှာတော့ သူ့ရဲ့ ဒုတိယမြောက် တစ်ကိုယ်တော်အခွေဖြစ်တဲ့ G.O.A.T အခွေကို ထွက်ရှိမယ်လို့ သိရပါတယ်။