အိစိကွေးကတော့ သူ့အတွက် အချစ်ရေးထက် ပညာရေး၊ အလုပ်ကို ပိုဦးစားပေးနေတယ်လို့ ဆိုပါတယ်။
ကလေးသရုပ်ဆောင်ဘဝကတည်းက ပရိသတ်အခိုင်အမာရရှိထားတဲ့ သရုပ်ဆောင် အိစိကွေးက အခုဆိုရင်တော့ ခေါင်းဆောင်မင်းသားအဖြစ်သရုပ်ဆောင်လို့ရတဲ့ လူငယ်တစ်ယောက်အရွ ယ်ကို ရောက်ရှိလာပါပြီ။ အခုချိန်မှာ ချစ်သူလည်းမထားသေးဘူးလို့ မီဒီယာ အင်တာဗျူးတွေမှာ ဖြေဆိုခဲ့ပါတယ်။
“ ကျွန်တော်က အချိန်မပေးနိုင်ဘူးခင်ဗျ။ ကျွန်တော့်မှာ အလုပ်တစ်ဖက်ရှိတယ်၊ ကျောင်းတစ်ဖက်ရှိတယ်၊ ကရာတေး သင်တန်းလည်းဖွင့်ထားတယ်။ ဇာတ်လမ်းတွဲရိုက်ဖို့တွေလည်း လက်ခံထားတာရှိတော့ နောက်ပိုင်းမှာ ပိုတောင်အလုပ်ရှုပ်ဦးမယ်။ ကျွန်တော့်ကို ချစ်မယ်ဆိုရင်လည်း စိတ်ပူရမယ်၊ ကျွန်တော့်ပတ်ဝန်းကျင်မှာက မိန်းကလေးတွေ အများကြီးရှိတယ်လေ။ အဲဒီတော့ သူများကိုလည်း ဒုက္ခမပေးချင်ဘူး ဒီအတိုင်းလေးပဲနေတာ ကောင်းပါတယ်” လို့ သူကဆိုပါတယ်။
Photo: Eisi Kway
အိစိကွေးဟာ အနုပညာအလုပ်တွေ ခဏနားထားတဲ့ အချိန်မှာ ချစ်သူထားခဲ့ဖူးတယ်လို့ ဆိုပါတယ်။ လမ်းခွဲလိုက်တာလည်း အနုပညာအလုပ်တွေ ပြန်မလုပ်ခင်ကတည်းကလမ်းခွဲလိုက်ကြတယ်လို့ ပြောပါတယ်။ သူ့ရဲ့ ရည်းစားဟောင်းအတွက် ဆုတောင်းစကားတွေလည်း ပြောခဲ့ပြန်ပါသေးတယ်။
“ ကိုယ်မဟုတ်တဲ့ တခြားသူတစ်ယောက်ရဲ့ ရင်ခွင်မှာ ပျော်နေရတယ်ဆိုရင်တော့ ကောင်းပါတယ်။ ဘယ်လိုပဲဖြစ်ဖြစ် ဝမ်းသာတယ်။ စိတ်ပူပန်စရာမရှိပဲ ပျော်ရွှင်နေရတယ်ဆိုရင် ဝမ်းသာတယ်။ ကိုယ့်ထက် သာတဲ့သူတွေနဲ့ပဲ တွေ့မှာပါ” ဆိုပြီးတော့ ဖေဖော်ဝါရီလ ၁၁ ရက်နေ့က TUNE Bar ဆိုင်ဖွင့်ပွဲကို တက်ရောက်ရင်း ဖြေဆိုခဲ့တာပါ။
Photo: Eisi Kway
အိစိကွေး(Eisi kway)ဟာ ကလေးဘဝကတည်းက အနုပညာအလုပ်တွေကို လုပ်ဆောင်ခဲ့တာဖြစ်ပါတယ်။ ကလေးသရုပ်ဆောင်ဘဝကတည်းက ပရိသတ်တွေရဲ့ အချစ်ကိုလည်း အပြည့်အဝ ရရှိထားသူ တစ်ယောက်ပါ။ လက်ရှိမှာတော့ သူဟာ ပညာရေးကို ဦးစားပေးနေတာ ကြောင့် အနုပညာအလုပ်တွေကို တစိုက်မတ်မတ်မလုပ်နိုင်သေးဘူးလို့ သိရပါတယ်။ သရုပ်ဆောင် အိစိကွေးက အခုဆိုရင် ခေါင်းဆောင်မင်းသား နေရာကနေ ဇာတ်ကားတွေ ရိုက်ကူးနေရပါပြီ။