ဖူးပွင့်သခင်ဟာ ဇာတ်ကားရိုက်ဖို့ ကမ်းလှမ်းခံရပြီးမှ အမြဲတမ်း ဖျက်လိုက်ရတာမျိုးတွေရှိတယ်လို့ ဆိုပါတယ်။ ဒါတွေကြောင့်လည်း စိတ်ဓာတ်ကျမိတဲ့ အချိန်တွေရှိတယ်လို့ ပြောပါတယ်။
Photo: H Photography
ဖူးပွင့်သခင်ကတော့ အလုပ်နဲ့ ပတ်သက်ပြီး စိတ်ဓာတ်ကျခဲ့ရတဲ့ အရာတွေကို Duwun Media အင်တာဗျုးကနေ ရင်ဖွင့်ပြောပြလာပါတယ်။
‘’ စိတ်ကျရောဂါ က ဘာနဲ့မှ ကုစားလို့မရဘူးဆိုတာကို ညီမ လက်ခံတယ်။ လူတစ်ယောက်က စိတ်နဲ့ပဲ သွားတာများတယ်။ အနုပညာရှင်တစ်ယောက်ဆိုတာ စိတ်က နူးညံ့တယ်၊ မင်းသား၊ မင်းသမီးတွေက မာယာများတယ်တဲ့။ အဲဒါမဟုတ်ဘူး ပိုပြီးတော့ စိတ်က နူးညံ့တာ။ အမြဲတမ်း သူများရဲ့ စိတ်တွေကို ကိုယ့်ထဲ ထည့်နေရတာလေ။ စိတ်ဓာတ်ကျပြီးတော့ သတ်သေတယ်ဆိုတာကလည်း စိတ်ပါပဲ။ လူတစ်ယောက်က ဦးနှောက်နဲ့ သိပ်မသွားဘူး စိတ်နဲ့ပဲသွားတာဆိုတော့ စိတ်ဓာတ်ကျတယ်ဆိုတာ လူကို အရမ်း ဒုက္ခရောက်စေပါတယ်’’ လို့ သူကဆိုပါတယ်။
Photo: Phoo Pwint Thakhin
ဇာတ်ကားရိုက်ကူးဖို့အတွက် ကမ်းလှမ်းပြီးတဲ့နောက်မှာလည်း အဆင်မပြေလို့ ဖျက်လိုက်ကြတာမျိုးတွေရှိခဲ့တယ်လို့ ဖူးပွင့်သခင်က ပြောပါတယ်။
‘’တစ်ခါတလေကျရင် ကိုယ့်ကို ရိုက်ရက်ယူပြီးမှ မရိုက်ဖြစ်တာမျိုးတွေ၊ ဖြတ်လိုက်တာမျိုးတွေပေါ့နော် ဒီလိုတွေဆိုရင် စိတ်ဓာတ်အရမ်းကျတယ်။ ငါဘာဖြစ်နေလို့လဲ၊ သရုပ်မဆောင်တတ်လို့လား တွေးတယ်။ ဒါပေမယ့်လည်း အကောင်းဘက် အနေနဲ့ တစ်ချိန်ကျရင်ဘာဖြစ်လာမလဲ အတတ်နိုင်ဆုံးတော့ အကောင်းဆုံး ဖြစ်အောင် ငါကြိုးစားသွားမယ် လို့ပဲတွေးတယ်။ ကိုယ့်ကိုယ်ကိုယ် Strong ဖြစ်အောင်နေတယ်’’ ဆိုပြီးတော့ နိုဝင်ဘာလ ၅ ရက်နေ့က ဦးစိုင်းနေမျိုးဝင်း မွေးနေ့ပွဲကို တက်ရောက်ရင်း ဖြေဆိုခဲ့တာပါ။
Photo: Phoo Pwint Thakhin
ဖူးပွင့်သခင်က သူမရဲ့ စိတ်ဓာတ်ကျမှုတွေကို အမြဲတမ်း အားပေးတဲ့ သူကတော့ အမေဖြစ်ပါတယ်တဲ့။ ကိုယ်တိုင်ကလည်း အရမ်းကို စိတ်ဓာတ်ကျလွယ်တဲ့သူတစ်ယောက်ပါလို့ ဆိုပါတယ်။
‘’ ညီမကိုယ်တိုင်ကလည်း တစ်ခုခုဆို အရမ်း စိတ်ဓာတ်ကျတဲ့အထဲမှာပါတယ်။ ကိုယ့်ကိုယ်ကိုယ် မနည်း ထိန်းထားရတာ။ ရှုတင်မှာလည်း တစ်ခုခုဖြစ်လာပြီဆိုရင် ကားထဲဝင် တံခါးပိတ်ပြီးတော့ကို ငိုတာ။ စိတ်ပျော့တဲ့သူဖြစ်တော့ အမေက ဘေးကနေ အမြဲတမ်း တွန်းနေရတယ်။ နင်က အခုမှ လူဖြစ်လာစပဲရှိသေးတာ။ အမေတို့က ဒါကို ဖြတ်သန်းခဲ့ရပြီးပြီ ဆိုပြီးတော့ အားပေးတယ်’’လို့ သူက ဆက်လက်ပြောပြလာပါတယ်။
Photo: Phoo Pwint Thakin
ဖူးပွင့်သခင်ကိုတော့ ဗီဒီယို ဇာတ်ကားတွေကနေတဆင့် ပရိသတ်တွေ စတင်သိရှိလာခဲ့တာဖြစ်ပါတယ်။ သူမဟာ အခုလက်ရှိမှာလည်း စီနီယာ အနုပညာရှင်ကြီးတွေနဲ့ အတူ ရုပ်ရှင်ကားကြီးတွေ ရိုက်ကူးနေရပါပြီ။ အရပ်လည်းမြင့်သလို ရုပ်ရည်ကလည်း ချောမောလှတဲ့ မင်းသမီးတစ်ယောက်ဖြစ်ပါတယ်။ ချစ်စရာကောင်းတဲ့ ပါးချိုင့်လေးကြောင့်လည်း အပြုံးချိုချိုလေးကို ပိုင်ဆိုင်ထားသူ တစ်ယောက်ပါ။