ဒိန်းဒေါင်ဟာ တပည့်ဖြစ်သူ လူရွှင်တော်သာဇံ ကွယ်လွန်သွားတဲ့အတွက် စိတ်မကောင်းဖြစ်လို့နေပါတယ်။ သာဇံရဲ့ ကျန်းမာရေးအတွက် ထောက်ပံ့ဖို့ကပြခဲ့တဲ့ရန်ပုံငွေပွဲမှာ ရတဲ့ ပိုက်ဆံတွေနဲ့ ကွယ်လွန်သူရဲ့မိသားစုဝင်တွေကို ထောက်ပံ့ ကူညီသွားမယ်လို့ဆိုပါတယ်။

“ ကိုသာဇံ ဆီကို ကျွန်တော် ည ၁၂ နာရီလောက်ရောက်တယ်။ ကျွန်တော် ဆရာဝန်ကိုသွားမေးသေးတယ်။ မရတော့ဘူးတဲ့ အသဲရော၊ ကျောက်ကပ်ရော ပျက်စီးသွားပြီတဲ့။ အဲဒီအတွက် လက်လျှော့လိုက်ပြီပေါ့နော်။ စိတ်မကောင်းစွာနဲ့ ကျွန်တော်လည်း ပြန်လာခဲ့ရပါတယ်။ ပထမကတော့ ကိုသာဇံ ရဲ့ ကျန်းမာရေးအတွက် ရန်ပုံငွေပွဲလေးကမလို့။ အခုဆုံးသွားပြီဆိုတော့ သူ့ရဲ့ ၁၉ ရက်သားလေးရယ်၊ သူ့မိန်းမအတွက်ရယ် စားဝတ်နေရေးအတွက် ထောက်ပံ့ပေးသွားမယ်ပေါ့” လို့ သူကဆိုပါတယ်။

Photo: Thar Zan

“ သူက ဒီနှစ်အတွက် ကျွန်တော့်အဖွဲ့ထဲဝင်ဖို့ စာချုပ်ချုပ်ထားတာပေါ့နော်။ စပေါ်တွေဘာတွေ ယူပြီးပြီ။ အခုဆုံးသွားပြီဆိုတော့ အမိန့်စာပြန်ပေးခဲ့ရတယ်။ အဖွဲ့နဲ့ဘာမှမဆိုင်တော့သလို မင်းအပေါ်တင်နေတဲ့ အကြွေးတွေလည်း မယူတော့ဘူးပေါ့။ သေတမ်းစာ ဖတ်ရင်းနဲ့ မျက်ရည်ကျခဲ့ရပါတယ်။ သူက ငယ်ငယ်လေးကတည်းက တပည့်ပါပဲ” လို့ ဆိုပါတယ်။

Photo: Thar Zan

လူရွှင်တော် သာဇံကတော့ ၂၀၁၉ ခုနှစ် နိုဝင်ဘာလ ၂၉ ရက်နေ့ မနက် ၇ နာရီခွဲမှာ ဆုံးပါးသွားခဲ့တာဖြစ်ပါတယ်။ သူ့ရဲ့ ဈာပနကိုတော့ ဒီဇင်ဘာလ ၁ ရက်နေ့က ရေဝေးသုသာန်မှာ မီးသဂြိုဟ်ခဲ့တာဖြစ်ပါတယ်။ ဒီဇင်ဘာလ ၅ ရက်နေ့မှာတော့ နေအိမ်မှာ ရက်လည်ပြုလုပ်သွားမယ်လို့ သိရပါတယ်။ သာဇံဟာ လူရွှင်တော်ဖလား ပြိုင်ပွဲကနေတဆင့် အနုပညာလောကထဲကို ဝင်ရောက်လာခဲ့တာဖြစ်ပါတယ်။ အဲဒီနောက်မှာတော့ ဗီဒီယို ဇာတ်ကားတွေထဲမှာ မင်းသား၊ မင်းသမီးတွေရဲ့ သူငယ်ချင်း နေရာကနေ ပါဝင်သရုပ်ဆောင်ခဲ့တာ တွေ့ရပါတယ်။ သူ့ရဲ့ အနုပညာသက်တမ်းကတော့ ၈ နှစ်ကျော်ခန့်ရှိပါတယ်။ 

Photo: Daing Daung

ဒိန်းဒေါင်(Dain Daung)ဟာ ပရိသတ်တွေကို ပျော်ရွှင်အောင် ပြုလုပ်ပေးတတ်သူ တစ်ဦးဖြစ်သလို ပရဟိတအလုပ်တွေကို တတ်စွမ်းသလောက် လုပ်ကိုင်နေသူတစ်ဦးပါ။ ဘုရားတည်၊ ကျောင်းဆောက်တဲ့ လုပ်ငန်းတွေ လုပ်ကိုင်သလို အနုပညာလောကသားအချင်းချင်းကိုလည်း တတ်နိုင်တဲ့ဘက်ကနေ ကူညီဆောင်ရွက်ပေးတတ်သူလည်း ဖြစ်ပါတယ်။