အောင်မြင်ပြီးသား အနုပညာရှင်အချင်းချင်းကို ယှဉ်စရာမလိုတဲ့အကြောင်း သက်မွန်မြင့်က ပြောပြလာပါတယ်။ ဖြတ်သန်းလာခဲ့ရတဲ့ အနုပညာလမ်းကြောင်းကလည်း မတူကြဘူးလို့ဆိုပါတယ်။

‘’သူတို့ကို အများကြီးတော့မပြောဘူး၊ သူတို့ကို ရင့်ကျက်ဖို့ပဲပြောတယ်။ လူဆိုတာ ယှဉ်လို့မရဘူးလေ၊ ကိုယ်လည်း သူ့လို ဖြစ်ချင်မှဖြစ်မယ်၊ သူလည်း ကိုယ့်လို ဖြစ်ချင်မှဖြစ်မယ်၊ သူဆိုတာသူပဲ၊ ကိုယ်ဆိုတာကိုယ်ပဲ အမြဲတမ်းနှိုင်း ယှဉ်ပြီးတော့ ပြောလို့မရဘူး။ ဖြတ်သန်းပုံခြင်းလည်း မတူသလို ကိုယ့်ဘဝကိုယ် တည်ဆောက်ကြတဲ့ ပုံစံခြင်းလည်း မတူဘူး’’ လို့ ဆိုပါတယ်။

တစ်ယောက်နဲ့ တစ်ယောက်ကလည်း အနုပညာလောကမှာ ကြိုးစားခဲ့ပုံခြင်း၊ ဖြတ်သန်းခဲ့ပုံခြင်းက မတူညီကြတဲ့အတွက် နှိုင်းယှဉ်လို့ မရဘူးလို့လည်း သက်မွန်မြင့်က ပြောပါတယ်။

Photo: Amazing Grace

ပရိသတ်တွေ အနေနဲ့ကလည်း ကိုယ်ချစ်တဲ့ အနုပညာရှင်တစ်ယောက်အတွက် တခြားအနုပညာရှင်ကို ထိခိုက်အောင် လုပ်ဖို့ မသင့်ဘူးလို့ သက်မွန်မြင့်က ဆက်လက်ပြောပြလာပါတယ်။

‘’အဓိက ကတော့ ကိုယ်ချစ်တဲ့အချစ်က သူများကို အန္တရာယ်မဖြစ်စေချင်ဘူး။ သူများကို မထိခိုက်စေချင်ဘူး။ အဲဒါလေးကိုပဲ သတိကပ်ရမှာပေါ့’’ ဆိုပြီးတော့ သြဂုတ်လ ၂၅ ရက်နေ့က Brand’s ပွဲကို တက်ရောက်ရင်းနဲ့ ဖြေဆိုခဲ့တာဖြစ်ပါတယ်။

Photo: Amazing Grace

သက်မွန်မြင့်ဟာ လက်ရှိမှာတော့ အကယ်ဒမီ ၂ ဆုရရှိထားတဲ့ အနုပညာရှင်တစ်ယောက်ဖြစ်လို့နေပါပြီ။ ၂၀၁၀ ပြည့်နှစ်မှာ “အာဒံရယ်၊ ဧဝရယ်၊ ဒဿရယ်” ၊ ၂၀၁၆ ခုနှစ်မှာ “ချစ်လှစွာသော အမုန်း”ရုပ်ရှင်ကားတွေနဲ့ အကောင်းဆုံး အမျိုးသမီးဇာတ်ဆောင်ဆုကို ဆွတ်ခူးခဲ့ပါတယ်။ ၂၀၁၄ ခုနှစ် ဖေဖော်ဝါရီလ ၁၄ ရက်နေ့မှာတော့ ခင်ပွန်းဖြစ်သူ ကိုစစ်နိုင်နဲ့ လက်ထပ်ခဲ့တာဖြစ်ပြီး အခုဆိုရင် သားလေး အားချစ်နဲ့ သမီးလေး လဝန်းမေ ဆိုတဲ့ သားနဲ့ သမီးလေးကို ပိုင်ဆိုင်ထားပြီ ဖြစ်ပါတယ်။ သူမကိုတော့ ပရိသတ်တွေက Music Video တွေကနေတဆင့် စတင်အားပေးခဲ့ကြတာပါ။ သက်မွန်မြင့်ရဲ့ ထူးခြားချက်ကတော့ ချစ်စရာကောင်းတဲ့ မျက်ဝန်း၊ အေးချမ်းတဲ့ အပြုံးကို ပိုင်ဆိုင်ထားတဲ့ မိန်းကလေးတစ်ယောက်ဖြစ်ပြီး အရပ်မြင့်မြင့်၊ ခန္ဓာကိုယ် တောင့်တောင့်လေးနဲ့ လှပတဲ့မိန်းကလေးတစ်ယောက်ပါ။ အနုပညာကို ဝါသနာပါလွန်းတာကြောင့် မွေးရပ်မြေ ချင်းတောင်တန်းကနေ ရန်ကုန်ကို ရောက်ရှိလာတဲ့ ချင်းတိုင်းရင်းသူလေး တစ်ယောက်ပါ။