နှိုင်းယှဉ်မြင့်မိုရ်ဟာ ဇာတ်ပို့သရုပ်ဆောင်တွေအတွက် အခွင့်အရေးတွေ နည်းပါးလာတဲ့အချိန်မှာ ဖြစ်ပေါ်လာတဲ့ ခံစားချက်တွေကို ရင်ဖွင့်ပြောပြလာပါတယ်။ သူမက လက်ရှိမှာတော့ သရုပ်ဆောင်နေထူးနိုင်နဲ့အတူ ဇာတ်ပို့သရုပ်ဆောင်တွေ စုပေါင်းပြီး အလုပ်အဆင်ပြေကြဖို့အတွက် ဆွေးနွေးတိုင်ပင်နေတယ်လို့ ဆိုပါတယ်။

ဇာတ်ပို့ သရုပ်ဆောင် တစ်ဦးဖြစ်တဲ့ နှိုင်းယှဉ်မြင့်မိုရ်ဟာ ဇာတ်ကားတွေ အရိုက်ကျဲလာတဲ့အပေါ် သူမရဲ့ ခံစားချက်ကို ရင်ဖွင့်ပြောပြလာပါတယ်။ ဒါပေမယ့် အခက်အခဲတွေဖြစ်နေကြတဲ့ ဇာတ်ပို့သရုပ်ဆောင်တွေနဲ့ နေထူးနိုင်နဲ့ကတော့ အဆင်ပြေတဲ့ လမ်းကြောင်းတစ်ခု ဖြစ်လာဖို့ တိုင်ပင်နေကြတယ်လို့ မီဒီယာ အင်တာဗျူးတွေမှာ ဖြေဆိုခဲ့ပါတယ်။

‘’နှိုင်းယှဉ်တို့ ဇာတ်ပို့တွေအနေနဲ့ အလုပ်အဆင်မပြေကြတဲ့အကြောင်းတွေကို ရေးကြတော့ ကိုနေထူးနိုင်က ညီမတို့ ဇာတ်ပို့တွေကို ဆက်သွယ်တယ်။ စိတ်ဝင်စားတဲ့လူတွေ စကားပြောကြည့်မယ်ဆိုပြီးတော့ စကားပြောကြတယ်။ ညီမလေးတို့ ဘာတွေဖြစ်နေကြတာလဲ၊ ဘာတွေခက်ခဲနေတာလဲပေါ့။ ဒီလမ်းကြောင်းလေးက ဘယ်လိုတွေ သွားလို့ရတယ်၊ ဗီဒီယိုလေးကို ဘယ်လိုတွေရိုက်လို့ရတယ်၊ ကိုကြီးလည်း ရိုက်နေပါတယ်ဆိုပြီးတော့ လမ်းကြောင်းလေးတစ်ခုချပြတယ်’’ လို့ သူကဆိုပါတယ်။

လက်ရှိမှာလည်း သူမတို့လို ဇာတ်ပို့သရုပ်ဆောင်တွေအတွက် ငွေကြေးအခက်အခဲတွေလည်း ရှိတယ်လို့ နှိုင်းယှဉ်မြင့်မိုရ်က ပြောပါတယ်။ ဒါပေမယ့် အနုပညာကို ချစ်တဲ့စိတ်ကြောင့် ဇာတ်ကားရိုက်ချင်တဲ့ စိတ်က ပိုပြင်းထန်တယ်လို့ ဆိုပါတယ်။

‘’ ကိုနေထူးနိုင်ကိုလည်း ပြောပါတယ်။ ပိုက်ဆံရသည်ဖြစ်စေ၊ မရသည်ဖြစ်စေ အခုချိန်မှာ ပိုက်ဆံကတော့ သမီးတို့ လိုတယ်။ သမီးတို့အတွက် ပိုက်ဆံ တကယ်လိုပါတယ်။ ဒါပေမယ့် အခုချိန်မှာ ပိုက်ဆံထက် အလုပ်လုပ်ချင်တဲ့ စိတ်က ပိုလိုအပ်နေတယ်။ တစ်နေ့တစ်နေ့ အိမ်မှာ ငုတ်တုတ်ကြီးထိုင်ပြီး ဘာကိုမှန်းမသိ စောင့်နေရတာကို မဖြစ်ချင်ဘူး။ ရိုက်မယ်ဟေ့လို့သာ ပြောလိုက် အထုတ်ဆွဲပြီး လာရိုက်ချင်တဲ့စိတ်၊ အလုပ်လုပ်ချင်တဲ့စိတ်ဖြစ်နေတယ်။ အဲဒါမှ ကျနေတဲ့ စိတ်တွေ အရင်ဆုံး ပြန်တင်လို့ရမှာ’’ ဆိုပြီးတော့ ဇူလိုင်လ ၇ ရက်နေ့က နှစ်ပါးသွား Update ရုပ်ရှင်အထူးပြပွဲကို တက်ရောက်ရင်း ဖြေဆိုခဲ့တာပါ။

Photo: Nhying Shin

နှိုင်းယှဉ်မြင့်မိုရ်ကလည်း ဇာတ်ပို့သရုပ်ဆောင် တစ်ယောက်ဖြစ်သလို ခင်ပွန်းဖြစ်တဲ့ ကိုဘင်းကလည်း ဇာတ်ပို့သရုပ်ဆောင် တစ်ဦးပါ။ ဒါပေမယ့် ဇာတ်ကားရိုက်ကူးရမှု နည်းလာတဲ့အပေါ်မှာလည်း စိတ်ခံစားချက်တွေ မကောင်းလို့ မပြောဖြစ်ကြတဲ့ အခြေအနေအထိတောင်ရှိကြတယ်လို့ ပြောပါတယ်။

‘’ နှိုင်းယှဉ်နဲ့ အမျိုးသားနဲ့ဆိုရင် သရုပ်ဆောင် အချင်းချင်းပဲ။ ဒါပေမယ့် သရုပ်ဆောင်တဲ့အကြောင်း၊ ကားမရိုက်ရတဲ့အကြောင်း တစ်ခွန်းမှ မပြောကြဘူး။ ပြောလိုက်တာနဲ့ စိတ်မကောင်းတာတွေ ထွက်လာမှာစိုးလို့ လင်မယားနှစ်ယောက်က သရုပ်ဆောင်ဖြစ်နေပါရက်နဲ့ ဘာလို့ ကားမရိုက်ရတာလည်း တစ်ခါမှ မဆွေးနွေးဘူူး။ စကားလည်း မစမိကြဘူးပေါ့နော်။ တစ်ယောက်နဲ့ တစ်ယောက် Feel တွေ ပေါ်ကုန်မှာစိုးလို့ပေါ့’’ လို့ သူကဆိုပါတယ်။

Photo: Nhying Shin

နှိုင်းယှဉ်မြင့်မိုရ်ကိုတော့ ဇာတ်ပို့ဇာတ်ရံ သရုပ်ဆောင် တစ်ယောက်အနေနဲ့ ပရိသတ်တွေ စတင်သိရှိခဲ့တာပါ။ ဗီဒီယိုဇာတ်ကားပေါင်းများစွာ၊ ရုပ်ရှင်ဇာတ်ကားကောင်းများစွာတို့ကိုလည်း ရိုက်ကူးခဲ့ဖူးသူတစ်ယောက်ပါ။ အခုဆိုရင်တော့ ခင်ပွန်းဖြစ်သူ ကိုဘင်းရယ်၊ တစ်ဦးတည်းသော သားလေးရယ်နဲ့ အတူ မိသားစုဘဝလေး တည်ဆောက်ထားတာကို တွေ့ရပါတယ်။