ထွန်းထွန်းကတော့ Examplez အဖွဲ့ထဲက သူငယ်ချင်းတွေ၊ ညီအစ်ကိုတွေ အိမ်ထောင်ပြုတိုင်း နှမြောတဲ့စိတ်လေး ဖြစ်မိတယ်လို့ပြောပါတယ်။ ထူးကျော်သူ နဲ့ ဖြိုးမောင်မောင်ကလည်း ကိုယ်ပိုင်မိသားစု ဘဝလေးအကြောင်း မိတ်ဆက်ပေးခဲ့ပါသေးတယ်။

‘’ ကျွန်တော်အမှန်အတိုင်းပြောရရင် ထူးကျော်ဆိုရင် သူ အိမ်ထောင်စပြုတဲ့အချိန်မှာ သူ မိသားစုဖြစ်သွားတော့ ကျွန်တော်တို့နဲ့ တွေ့ဖို့ ဝေးသွားတယ်။ ဒီလိုပဲ ဖြိုးမောင် ဆိုရင်လည်း ဝေးသွားတာပဲ။ အခုဆို သက်အောင် ဆိုလည်း အိမ်ထောင်ပြုသွားပြီဆိုတော့ ထပ်ဝေးဦးမှာပေါ့။ ညီအစ်ကိုတွေဖြစ်ဖြစ်၊ သူငယ်ချင်းတွေဖြစ်ဖြစ် အိမ်ထောင်ကျသွားပြီဆိုရင် နှမြောတဲ့ စိတ်၊ မတွေ့ရတော့ဘူးကွာ ဆိုတဲ့စိတ်တော့ ခေါင်းထဲမှာ အမြဲတမ်းရှိတယ်’’ လို့ ဆိုပါတယ်။

ဖြိုးမောင်မောင်(Examplez)ကတော့ ၂၀၁၁ ခုနှစ် ၁၁ လပိုင်း ၁၁ ရက်နေ့က ဇနီးချောလေး မဇွန်ဇာသက်ပန်စိုး နဲ့ လက်ထပ်ခဲ့တာဖြစ်ပါတယ်။ အခုဆိုရင် ကိုယ်ပိုင် မိသားစုဘဝလေးကို ပိုင်ဆိုင်ထားပြီဖြစ်ပါတယ်။ အနုပညာအလုပ်တွေထက် မိသားစု စီးပွားရေးကို ပိုဦးစားပေးဖြစ်နေတယ်လို့လည်း သိရပါတယ်။

Photo: Phyo Maung Maung

ထူးကျော်သူ(Example) ကလည်း ဇနီးချောလေး မအိအိဖြိုးနဲ့ ၂၀၁၁ ခုနှစ်အတွင်းက လက်ထပ်ခဲ့တာဖြစ်ပါတယ်။ အခုချိန်မှာ ပျော်စရာကောင်းတဲ့ မိသားစု ဘဝလေးကို တည်ဆောက်ထားပါပြီ။

‘’ ကျွန်တော်ကတော့ ကလေး တစ်ယောက်ပဲရှိပါသေးတယ်။ နောက်တစ်ယောက်ယူဖို့တော့ စီစဉ်ထားပါတယ် ကြိုးစားနေတုန်းပါပဲ’’ ဆိုပြီးတော့ သဘောကျရယ်မောရင်း ပြောပြခဲ့တာဖြစ်ပါတယ်။ လက်ရှိမှာတော့ ဂီတအလုပ်တွေ ထက် စီးပွားရေးကို ပိုပြီးတော့ ဦးစားပေးနေတယ်လို့ သိရပါတယ်။

Photo: Htoo Kyaw Thu

Examplez အဖွဲ့ထဲမှာတော့ ထွန်းထွန်း၊ ဖြိုးမောင်မောင်၊ သက်အောင်နဲ့ ထူးကျော်သူ တို့ ပါဝင်တာဖြစ်ပါတယ်။ သူတို့ဟာ Rapper အဖွဲ့အနေနဲ့ သီချင်းတွေ ဆိုခဲ့ကြတာပါ။ ၂၀၀၀ ခုနှစ်ကတည်းက ဂီတအလုပ်တွေ စတင်ခဲ့တယ်ဆိုရင်လည်း မမှားပါဘူး။ အခုချိန်မှာတော့ ထွန်းထွန်း တစ်ယောက်တည်းသာ အနုပညာအလုပ်တွေ ဆက်လက် လုပ်ကိုင်နေတာ တွေ့ရပါတယ်။