ထက်ဦးထွဋ်ကတော့ မိဘပံ့ပိုးမှုအပြည့်အဝမရှိပဲ အနုပညာအလုပ်တွေကို တစ်ယောက်တည်းကြိုးစားနေရတယ်လို့ ဆိုပါတယ်။ သူ့ရည်မှန်းထားသလို ဖြစ်မလာမချင်းလည်း ဆက်ပြီး ကြိုးစားနေဦးမယ်လို့ ပြောပါတယ်။

ထက်ဦးထွဋ်ကတော့ Mister ပြိုင်ပွဲတွေဝင်ပြိုင်ရင်း အနုပညာလောကထဲကို ရောက်ရှိလာတဲ့သူဖြစ်ပါတယ်။ ရည်ရွယ်ထားတဲ့ အောင်မြင်မှုတစ်ခု မပိုင်ဆိုင်ရမချင်း ကြိုးစားမှုတွေ လျော့သွားမှာ မဟုတ်ဘူးလို့ Duwun Media ကနေပြောပြခဲ့ပါတယ်။

‘’ကျွန်တော်ကတော့ ကြိုးစားနေတာ ဖြစ်မလာရင်လည်း ဆက်ကြိုးစားနေဦးမှာပါ။ ဘယ်လိုပဲဖြစ်ဖြစ် အရှုံးမပေးဘူး။ ဒီအလုပ်က ကြိုးစားတိုင်းလည်း အောင်မြင်တဲ့အရာမဟုတ်ဘူး။ မကြိုးစားပဲနဲ့လည်း အောင်မြင်သွားတဲ့အရာတွေလည်းရှိတယ်။ ဒါကလည်း ကံတွေ၊ စန်းတွေအပြင် အတိတ်ဘဝကသူတို့ရဲ့ ကုသိုလ်ကံတွေနဲ့လည်း အများကြီးဆိုင်မယ်လို့ထင်ပါတယ်’’ လို့ သူကဆိုပါတယ်။

သူတန်ဖိုးထားပြီး ဝါသနာပါလွန်းတဲ့ အနုပညာအလုပ်အပေါ် မိဘတွေက ကန့်ကွက်တာမျိုးတွေတော့ မရှိခဲ့ပေမယ့်လည်း အနုပညာအလုပ် အတွက် ပံ့ပိုးပေး တာမျိုးတွေလည်း မရှိဘူးလို့ သူက ပြောပါတယ်။

‘’ ဒီလောကထဲကို စဝင်လာကတည်းက အခက်အခဲတွေက အများကြီးပဲရှိတာပါ။ တစ်ယောက်တည်း ရုန်းကန်ရတာများတယ်။ အိမ်ကလည်း ဒီအလုပ်ကို ဝါသနာပါတယ် လုပ်ခွင့်ပေးထားတယ်ဆိုပေမယ့် ဘာမှ ပံ့ပိုးပေးတာမျိုးတွေ မရှိဘူး။ ရှုတင်သွားတာတွေကလည်း တစ်ယောက်တည်းသွားရတယ်။ မိတ်ကပ်တွေဆိုရင်လည်း ကိုယ့်ဘာသာကိုယ်တစ်ယောက်တည်းပြင်တတ်လာတယ်။ တစ်ယောက်တည်း ဆိုတော့လည်း ကိုယ့်ဘာသာကိုယ်လုပ်ရတာ အတွေ့အကြုံပိုရလာတယ်ပေါ့’’ လို့ ဆိုပါတယ်။

Photo: Yemilay

ထက်ဦးထွဋ်ဟာ အနုပညာအလုပ်လုပ်နေတဲ့ ရွယ်တူ အပေါင်းအသင်း၊ သူငယ်ချင်းတွေကို အရမ်းအားကျတယ်လို့ ဆိုပါတယ်။ မိဘပံ့ပိုးမှုအပြည့်အဝ ရထားတဲ့ သူငယ်ချင်းတွေကိုမြင်တိုင်း ကိုယ့်ကိုယ်ကိုယ် အားငယ်စိတ်တွေ ဖြစ်မိတယ်လို့လည်း ရင်ဖွင့်ပြောပြလာခဲ့ပါတယ်။

Photo: Htet Oo Htut

ထက်ဦးထွဋ်ကိုတော့ Boy Love Series တစ်ခုဖြစ်တဲ့ ‘’Innocence’’ ဇာတ်လမ်းတွဲမှာပါဝင်မယ့် မြူခိုး ကာရိုက်တာနဲ့ ပရိသတ်တွေ ပိုသတိထားမိခဲ့ကြ တာပါ။ ဒီဇာတ်လမ်းတွဲကနေ နှုတ်ထွက်လိုက်တဲ့ အချိန်မှာတော့ ပရိသတ်အားပေးမှု လျော့နည်းသွားတယ်လို့ သူက ဆိုပါတယ်။ သူဟာ Model တစ်ယောက်အဖြစ်ကနေ သရုပ်ဆောင်ဘက်ကို ကူးပြောင်းတော့မယ်လို့လည်း သိရပါတယ်။ မကြာသေးခင်က Dutch Mill Shining Star ရဲ့ Winner တစ်ယောက်ဖြစ်လာပြီးတဲ့ နောက်မှာတော့ ဇာတ်ကားရိုက်ကူးဖို့တွေ လာရောက် ကမ်းလှမ်းထားတာ ရှိတယ်လို့ သူက ပြောပါတယ်။