အိန္ဒိယမှာ လယ်သမား ထောင်ပေါင်းများစွာဟာ အကြွေးနွံနစ်နေကြတယ်လု့လည်း သိရပါတယ်။ အိန္ဒိယမှာ စိုက်ပျိုးရေးလုပ်ငန်းဟာ မိုးခေါင်မှုနဲ့ ရေအရင်းအမြစ်လျော့နည်းလာမှုတို့ကြောင့် အခက်အခဲကြုံနေခဲ့ရတာ ဆယ်စုနှစ်များနဲ့ချီပြီး ကြာမြင့်ခဲ့ပြီလို့ ဆိုပါတယ်။ စိုက်ပျိုးရေးလုပ်ငန်းတွေမှာ ထုတ်လုပ်နိုင်မှုကျဆင်းလာခြင်းနဲ့ ခေတ်မီ နည်းပညာနဲ့ စက်ကိရိယာများ မရှိခြင်းတို့ ကြုံတွေ့နေရပါတယ်။

အိန္ဒိယမှာ လယ်သမားများ ကိုယ့်ကိုယ်ကိုယ် သတ်သေမှုတွေဟာလည်း လယ်ယာစိုက်ပျိုးရေးလုပ်ငန်း အခက်အခဲတွေနဲ့ ဆက်နွယ်နေခဲ့ပါတယ်။ ၁၉၉၅ ခုနှစ်မှစပြီး အိန္ဒိယလယ်သမား ၃၀၀,၀၀၀ ထက်မနည်း ကိုယ့်ကိုယ်ကိုယ် သတ်သေသွားခဲ့ကြတယ်လို့ သိရပါတယ်။

အဆိုပါ လယ်သမားတွေကို ဘဏ်မှထုတ်ပေးလိုက်တဲ့ ကြွေးမြီပေးဆပ်ပြီးကြောင်း စာရွက်စာတမ်းများ ပေးအပ်သွားရန် ဘတ်ချန်းက စီစဉ်ထားတယ်လို့ သိရပါတယ်။ အူတာပရာဒက်ရှ်ပြည်နယ်မှ လယ်သမားတွေဟာ ဘတ်ချန်းနေထိုင်ရာ မွမ်ဘိုင်းမြို့ကို လာမယ့် နိုဝင်ဘာ ၂၆ ရက်မှာ ရောက်ရှိလာမယ်လို့ မျှော်လင့်ရပါတယ်။

လယ်သမားတွေအတွက် အကြွေးဆပ်ပေးခဲ့တဲ့ မင်းသားကြီးဘတ်ချန်းဟာ ရုပ်ရှင်ဇာတ်ကား ၁၉၀ ကျော်မှာ ပါဝင်သရုပ်ဆောင်ခဲ့သူ ဖြစ်ပါတယ်။ ဘတ်ချန်းက လတ်တလောနှစ်များအတွင်း ဘောလိဝုဒ်မှာသာမက ဟောလိဝုဒ်ရုုပ်ရှင်ဇာတ်ကားတွေမှာလည်း ပါဝင်သရုပ်ဆောင်ခဲ့ပါတယ်။ ဒါ့အပြင် မင်းသားကြီးဘတ်ချန်းက အိန္ဒိယရုပ်မြင်သံကြား အစီအစဉ်တစ်ခုဖြစ်တဲ့ Kaun Banega Crorepati (Indian version of Who Wants to be a Millionaire) မှာလည်း အစီအစဉ်တင်ဆက်သူအဖြစ် ဆောင်ရွက်နေတယ်လို့ BBC သတင်းမှာ ဖော်ပြထားပါတယ်။