အောင်ရင်ဟာ အင်္ဂလန်နိုင်ငံမှာ နေထိုင်ရင်း COVID-19 ကူးစက်ခံခဲ့ရတာဖြစ်ပြီး လက်ရှိ ကျန်းမာရေး အခြေအနေကို အခုလို ပြောပြလာပါတယ်။
Photo: Aung Yin
အဆိုတော် အောင်ရင်ကတော့ COVID-19 ကူးစက်ခံနေရတဲ့ အခြေအနေကနေ ပြန်ပြီး သက်သာလာပြီလို့ ဆိုပါတယ်။ စောင့်ကြည့်(၁၄) ရက်အခြေအနေမှာ ကြုံခဲ့ရတဲ့ အရာတွေကို သူကအခုလို ပြောပြလာပါတယ်။
"မင်္ဂလာပါ။ ကိုဗစ်လား ငဗစ်လားမသိပါဘူး။ ကျွန်တော်နေမကောင်းတော့ ဘိလပ်က သူငယ်ချင်းဆရာဝန်က Covid 19 ကူးစက် ခံရတဲ့ လက္ခဏာပြနေတယ်ပြောပါတယ်။ အင်္ဂလန်မှာ ဒီလက္ခဏာပြပေမယ့် အိမ်မှာပဲနေရတယ်။ Test လုပ်မှသာလျှင် Positive လား ၊ Negative လားသိနိုင်ပါမယ်။ ဒီမှာက ဆေးရုံတက်ရတဲ့သူပဲ Test လုပ်ပေးပါတယ်။ ဆေးရုံကိုလည်းအသက်ရှုရတာခက်တဲ့လူနာမှသာလက်ခံပြီးတင်ပါတယ်။ ဘာပဲဖြစ်ဖြစ် ကျွန်တော်နေကောင်းပါပြီ။ ဆုတောင်းမေတ္တာပို့သပေးသူများအားလုံးကျေးဇူးတင် ရှိပါတယ်" ဆိုပြီးတော့ ဧပြီလ ၃ ရက်နေ့ မနက် ၆ နာရီကျော်က သူ့ရဲ့ ဖေ့စ်ဘွတ် စာမျက်နှာမှာ ရေးသားခဲ့တာပါ။
Photo: Aung Yin
အောင်ရင်ဟာ မတ်လ ၂၃ ရက်နေ့က သူ့မှာ COVID-19 ကူးစက်ခံနေရပြီဖြစ်လို့ သူ့ရဲ့ မိသားစုကို စိတ်ပူမိတယ်လို့ ဆိုပါတယ်။ COVID-19 ရောဂါပိုးဟာ တစ်ကမ္ဘာလုံးမှာ ပြန့်နှံ့နေတာဖြစ်လို့ မြန်မာနိုင်ငံမှာရှိတဲ့ သားဖြစ်သူ မိုးအောင်ရင်ကိုလည်း စိတ်ပူနေမိတယ်လို့ သူက ပြောပါတယ်။ လက်ရှိ မြန်မာနိုင်ငံမှာလည်း COVID-19 ကူးစက် ခံနေရသူ အယောက် ၂၀ ရှိနေပြီဖြစ်ပါတယ်။
Photo: Aung Yin
COVID-19 ကြောင့် (၁၄) ရက်အကြာ ဆေးကုသမှု ခံယူနေချိန်မှာလည်း အားရှိတဲ့ အစားအသောက်တွေ အမြဲစားတယ်လို့ အောင်ရင်က ပြောပါတယ်။ COVID-19ရောဂါ အတွက် မစိုးရိမ်ကြဖို့ကိုလည်း အခုလို ပြောပြလာပါသေးတယ်။
"ပါရာစီတမော ၂ လုံး ၄ ကြိမ်နဲ့ ၁၂ ရက်၊ မနက်တိုင်း Vitamin C တလုံးသောက်ပါတယ်။ ဘိလပ်က ကျွန်တော့်ရဲ့ သူငယ်ချင်းဆရာဝန် ၃ ယောက်ဟာလည်း Corona Virus ကြောင့်နေမကောင်းဖြစ်တာ အိမ်မှာ ၂ ပါတ် self quarantine လုပ်ပြီးပြန်ကောင်းတာတွေ့ရလို့ အမျိုးတွေကိုလည်း သိပ်ပြီး အကြောက်မလွန်ဖို့ ပြောချင်ပါတယ်။ ကိုယ်ခံအားကောင်းဖို့သာဂရုစိုက်ကြပါ။ ကျွန်တော့်ကိုလည်း ကိုယ်ခံအားကောင်းဖို့ယခုလိုချက်ပြုတ်ကျွေးတဲ့ ဒေါ်မိုးကိုလည်း ကျေးဇူးတင်ပါတယ်ဗျ" ဆိုပြီးတော့ ဆက်လက် ရေးသားထားတာ တွေ့ရပါတယ်။
Photo: Aung Yin
အောင်ရင်ကတော့ ဂီတလောကမှာ အောင်မြင်နေတဲ့ ဝါရင့်အဆိုတော်ကြီးတစ်ယောက်ဖြစ်ပါတယ်။ တစ်ကိုယ်တိုင် အခွေတွေလည်း အများကြီးထွက်ခဲ့ဖူးသလို သူ့ရဲ့ ကိုယ်ပိုင်သီချင်းတစ်ပုဒ်ချင်းစီတိုင်းကလည်း အောင်မြင်ခဲ့တာတွေအများကြီးပါ။ အခုလက်ရှိမှာတေော့ အမေရိက မှာ အခြေချနေထိုင်နေတာ တွေ့ရပါတယ်။ သူ့ရဲ့ အနုပညာမျိုးဆက်တစ်ဦးဖြစ်တဲ့ မိုးအောင်ရင်ကတော့ ဂီတအပိုင်းကို ဝါသနာနည်းပေမယ့် သရုပ်ဆောင်ဘက်ကိုတော့ တစိုက်မတ်မတ် ဆောင်ရွက်နေတာ တွေ့ရပါတယ်။