ထက်ထက်မိုးဦးကတော့ ကျန်းမာရေး မကောင်းတဲ့အချိန်မှာ ရှေ့ဆက်ဘယ်လိုနေထိုင်ရမယ်ဆိုတာတောင် မတွေးတတ်တော့ဘူးလို့ ဆိုပါတယ်။

ပရိသတ်အားပေးမှု ခိုင်ခိုင်မာမာရရှိထားတဲ့ မင်းသမီးချော ထက်ထက်မိုးဦးကတော့ သူမရဲ့ ကျန်းမာရေးကြောင့် စိတ်ဓာတ်ကျနေမိတယ်လို့ ဆိုပါတယ်။  

"လူကတကယ်နေမကောင်းဖြစ်လာရင် စိတ်ရော၊လူရောကျလာတာဘဲ။ ဘယ်လောက်ပဲ တရားမှတ်မှတ်ရင်ထဲမှာဗလောင်ဆူနေတာပဲရှေ့ဆက် ဘယ်လိုအသက်ရှင်နေထိုင်ရမလဲ ဆိုတာမတွေးတတ်တော့ဘူး။ ကိုယ့်ကိုချစ်တဲ့ခင်တဲ့သူတွေကတော့စိတ်ပူပေးနေကြတာကျေးဇူးတင်ပါတယ်။ ကိုယ့်ရင်ထဲမှာတော့နေလို့မကောင်းတာအမှန်ပါ" ဆိုပြီးတော့ ဇူလိုင်လ ၁ ရက်နေ့ နေ့လယ်ပိုင်းက သူ့ရဲ့ ဖေ့စ်ဘွတ်ပေ့ချ်မှာ ရေးသားခဲ့တာ တွေ့ရပါတယ်။  

ထက်ထက်မိုးဦး ဟာ ရွှေစင် ရတနာရွှေဆိုင် ကြော်ငြာကနေတဆင့် ကလေးရော၊ လူကြီးပါ မကျန် တခဲနက် အားပေးခဲ့ကြတဲ့ သရုပ်ဆောင်တစ်ယောက်ပါ။ တစ်ခေတ်တခါ က ကြော်ငြာဘုရင်မလေး လို့တောင် တင်စားခေါ်ဝေါ်ခဲ့ကြတာဖြစ်ပါတယ်။ ထက်ထက်မိုးဦးရဲ့ ချစ်စရာကောင်းတဲ့ အမူအရာလေးတွေက ပရိသတ်ကို အချစ်မလျှော့အောင် အမြဲဆွဲဆောင်နိုင်ခဲ့ပါတယ်။ ဒီနောက် ရုပ်ရှင်ဇာတ်ကား ပေါင်းများစွာ၊ တီဗီကြော်ငြာပေါင်း များစွာ တို့ကိုလည်း ရိုက်ကူးခဲ့သူ ဖြစ်ပါတယ်။ သူမကတော့ ၁၉၉၁ ခုနှစ်က အနုပညာလောကထဲကို ပထမဆုံးအကြိမ် စတင်ဝင်ရောက်လာသူပါ။ အဲဒီနောက် ၁၉၉၆ ခုနှစ်မှာတော့ ပန်းသခင် ရုပ်ရှင်ဇာတ်ကားကြီးနဲ့ အကောင်းဆုံးအမျိုးသမီး ဇာတ်ဆောင်ဆုကို ပထမဆုံးအကြိမ် ရရှိခဲ့ပါတယ်။ နောက်ထပ်လည်း ‘’ သမီးမိုက်’’ ဆိုတဲ့ ရုပ်ရှင်ဇာတ်ကားကြီးနဲ့ ဒုတိယအကြိမ်မြောက် အကောင်းဆုံး အမျိုးသမီးဇာတ်ဆောင်ဆုကို ရရှိခဲ့ပြန်ပါတယ်။