ဟဲလေးကတော့ သူချစ်ရတဲ့ ဇနီးဖြစ်သူ မြတ်သီရိလင်းနဲ့ မိသားစုဘဝလေး တည်ထောင်ခဲ့တာ အခုဆိုရင် (၁၂) နှစ်ရှိလာပြီလို့ ဆိုပါတယ်။ 

ဟဲလေးကတော့  ဂီတလောကမှာလည်း အောင်မြင်နေသူဖြစ်သလို သူ့ရဲ့ အိမ်ထောင်ရေးမှာလည်း ပရိသတ်တွေ အားကျလောက်စရာကောင်းတဲ့ မိသားစုဘဝလေးကို ပိုင်ဆိုင်ထားတာ ဖြစ်ပါတယ်။ အခုဆိုရင်တော့ သူချစ်ရတဲ့ ဇနီးဖြစ်သူ မြတ်သီရိလင်းနဲ့ မင်္ဂလာသက်တမ်း (၁၂) နှစ်ပြည့် အမှတ်တရလေးကို အခုလို ပြောပြခဲ့ပါတယ်။ 

" ဒီနေ့ ကျွန်တော်တို့အထိမ်းအမှတ်နေ့ မင်္ဂလာနှစ်ပတ်လည် ၁၂ နှစ်ပြည့်ပါတယ်။ ရည်းစား သက်တမ်း(၈) နှစ်ပါထပ်ပေါင်းရင် အောင်မယ်လေး... ဆော်မကြည်တော့တာ..အနှစ်(၂၀)ပဲကျေးဇူးပါအန်တီလင်းရေ..ဒီမဲမဲသဲသဲဟဲဟဲလေးကိုနှစ်နှစ်ကာကာချစ်ပေးတဲ့အပြင်မိသားစုအပေါ်ချစ်ခင်မြတ်နိုးတန်ဖိုးထားလွန်းလို့ပါ ကိုဗစ်ပြီးတာနဲ့အရင်ထက်ရေတွေတစ်ဝကြီးလောင်းပြီး...ပျော်အောင်ထားပါ့မယ်..အချစ်ရေ" ဆိုပြီးတော့ အောက်တိုဘာလ (၂၃) ရက်နေ့ မနက်(၉) နာရီကျော်က သူ့ရဲ့ ဖေ့စ်ဘွတ်စာမျက်နှာမှာ ရေးသားခဲ့ပါတယ်။ 

ဟဲလေး နဲ့ မြတ်သီရိလင်းတို့ဟာ ၂၀၀၈ ခုနှစ် အောက်တိုဘာလ (၂၃) ရက်နေ့က မင်္ဂလာပွဲ ကျင်းပခဲ့ကြတာဖြစ်ပါတယ်။ အခုဆိုရင်တော့ အိမ်ထောင်သက်တမ်း (၁၂) နှစ်မှာ ဟဲလေးတို့ ဇနီးမောင်နှံဟာ ချစ်စရာကောင်းတဲ့ သားလေး နှစ်ယောက်ကို ပိုင်ဆိုင်ထားပြီဖြစ်ပါတယ်။ သူတို့ ဇနီးမောင်နှံဟာ မင်္ဂလာနှစ်ပတ်လည် နေ့ရောက်တိုင်း တတ်နိုင်သလောက် အလှူအတန်းတွေ လုပ်ခဲ့ကြတာကိုလည်း တွေ့ရပါတယ်။ 

Photo: He Lay

လက်ရှိမှာတော့ အဆိုတော် ဟဲလေးဟာ ကိုဗစ်ကာလကြောင့် ဂီတဖျော်ဖြေရေးတွေ နားထားတာပါ။ ဟဲလေးဟာ ၂၀၀၀ ခုနှစ် ဝန်းကျင်က " Teen" ဆိုတဲ့ ယောက်ျားလေး(၃) ယောက် ပါဝင်တဲ့ အဆိုတော် အဖွဲ့မှာ Main Vocal တစ်ယောက်အနေနဲ့ သီချင်းတွေ ဆိုရင်း ဂီတလောကထဲ ရောက်ရှိလာတာ ဖြစ်ပါတယ်။ သူ အောင်မြင်ခဲ့တဲ့ သီချင်းတွေကတော့ " ပတ်သက်ခွင့်ပြုပါ" ၊ " တစ်ယောက်တည်း ချစ်မယ်" ၊ " ခိုနားရာ" ၊ " ကြင်ယာဖက်" စတဲ့ သီချင်းတွေကနေတဆင့် ပရိသတ်အားပေးမှု အခိုင်အမာ ရရှိထားတာပါ။ ဟဲလေးရဲ့ လတ်တလော အောင်မြင်မှုတွေ ရနေတဲ့ သီချင်းကတော့ "မှည့်" သီချင်းဖြစ်ပါတယ်။