Sabal Thwin

ဝါဝါဝင်းရွှေရဲ့ ခင်ပွန်း သရုပ်ဆောင် ဦးသန်းထွဋ်ရဲ့ နောက်ဆုံးခရီးကိုတော့ အနုပညာလောကသားများနဲ့ မိတ်ဆွေ၊ သူငယ်ချင်း မိသားစုတွေက လိုက်ပါပို့ဆောင်ခဲ့ကြပါတယ်။ ဦးသန်းထွဋ်ဟာ အသက် ၇၇ နှစ်မှာ ကွယ်လွန်ခဲ့တာပါ။


Photo: U Aye Kyu Lay

အကယ်ဒမီများရှင် ဝါဝါဝင်းရွှေရဲ့ ခင်ပွန်းဖြစ်သူ တစ်ချိန်က အောင်မြင်ခဲ့တဲ့ ရုပ်ရှင်မင်းသားကြီး တစ်ဦးဖြစ်တဲ့ ဦးသန်းထွဋ်ရဲ့ ဈာပနကိုတော့ ဇူလိုင်လ ၂၇ ရက်နေ့ နေ့လယ်ပိုင်းက ရေဝေးသုဿာန်မှာ မီးသဂြိုဟ်ခဲ့တာဖြစ်ပါတယ်။ ဈာပနကိုတော့ အနုပညာအသိုင်းအဝိုင်းမှ အနုပညာရှင်များ၊ မိတ်ဆွေ၊ သူငယ်ချင်းများနဲ့ ဆွေမျိုးများစွာတို့ကလည်း နောက်ဆုံးခရီးကို လိုက်ပါပို့ဆောင်ခဲ့ကြတာကိုတော့ ဇူလိုင်လ ၂၇ ရက်နေ့ နေ့လယ် ၁ နာရီကျော်က အိုအေစစ်ရဲ့ ဖေ့စ်ဘွတ်စာမျက်နှာ Live ကနေ တွေ့ရှိခဲ့တာပါ။


Photo: U Aye Kyu Lay

ဦးသန်းထွဋ်ဟာ အသက် ၇၇ နှစ်မှာ ကွယ်လွန်ခဲ့တာဖြစ်ပါတယ်။ သူ့ရဲ့ နာရေးအခေါင်းကိုတော့ နာရေးကူညီမှုအသင်းကြီးရဲ့ ဥက္ကဌဖြစ်သူ ဦးကျော်သူကိုယ်တိုင် စီစဉ်ဖြစ်တယ်လိ့ု ဆိုပါတယ်။ ဒီအခေါင်းကိုတော့ ကျောက်စီကွမ်းသီး အနုပညာလက်ရာတွေနဲ့ အလှဆင်ခဲ့တာပါတဲ့။

"မင်းသားကြီးဦးသန်းထွဋ်(၇၇နှစ်)" ၏ဈာပန အတွက် နာ/ကူ(ရန်ကုန်)အသင်း မှ ကူညီမှု အဖြစ် ကဗျာဆရာ၊ စာရေးဆရာ၊ ဒီဇိုင်းဆရာ၊ သင်္ဘောသား၊ စွယ်စုံအနုပညာရှင် ဖြစ်သူ ဆရာကိုမောင်မောင်သိန်းလှိုင်ရဲ့လက်ရာ ကျောက်စီကွမ်းသီးလက်မှုအနုပညာ အခေါင်းအား ဥက္ကဌ ဦးကျော်သူ၏ စီစဉ်မှုဖြင့်အသင်ပြင်ထားပါပြီ’’ ဆိုပြီးတော့ ကိုမျိုး(မြန်မာစာ)ရဲ့ ဖေ့စ်ဘွတ်အကောင့်မှာ ဇူလိုင်လ ၂၇ ရက်နေ့ နေ့လယ် ၁၁ နာရီကျော်က ရေးသားခဲ့တာတွေ့ရပါတယ်။


Photo: kyaw thu

ဦးသန်းထွဋ်ဟာ ဇူလိုင်လ ၂၃ ရက်နေ့ ည ၇ နာရီ ၁၂ မိနစ်က ကျန်းမာရေးအခြေအနေကြောင့် ပန်းလှိုင်ဆေးရုံကြီးမှာ ကွယ်လွန်ခဲ့တာဖြစ်ပါတယ်။ ဒီသတင်းကို ကြားလိုက်ရတဲ့ အနုပညာလောကသားတွေနဲ့ ပရိသတ်တွေကလည်း မိသားစုနဲ့ ထပ်တူ စိတ်မကောင်းဖြစ်ခဲ့ကြပါတယ်။ ကွယ်လွန်သူ ဦးသန်းထွဋ်ရဲ့ ဈာပန ရက်လည်ကိုတော့ ၂၉ ရက်နေ့(တနင်္လာနေ့) မှာ ပြုလုပ်သွားမယ်လို့ သိရပါတယ်။


Duwun ဒီဂျစ်တယ် နေ့စဉ်သတင်းစာ

သင့် အီးလ်မေး ကနေ နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ ဒီနေရာမှာ စာရင်းသွင်းလိုက်ပါ။


Copyright © 2019 Duwun.

Privacy Policy | About Us | Jobs

က္က