လူကြီးလည်းကြိုက် ကလေးလည်းကြိုက်တဲ့ အရသာရှိရှိ Tot လေးတွေကို လုပ်စားကြည့်ပါလား..
Su Yee Moe
 

ပန်းဂေါ်ဖီကို ဟင်းလျာအနေနဲ့ အမျိုးမျိုး ချက်ပြုတ်ကြော်လှော်ကာ စားသုံးကြပါတယ်။ သွားရေစာအဖြစ်နဲ့ ပြုလုပ်ပြီး စားမယ်ဆိုရင်လည်း ရသေးတယ်။ မလုပ်စားဖူးဘူးဆိုရင် ဒီနည်းလေးနဲ့ လုပ်စားကြည့်ပါလား။ ပန်းဂေါ်ဖီတစ်ပွင့်စာကို လုပ်စားကြမယ်လေ။ ကြက်ဥတစ်လုံး၊ ဆား၊ ပေါင်မုန့်ခြောက်မှုန့်၊ ချိစ်အမာ၊  ကြက်သွန်ဖြူတို့ လိုအပ်ပါတယ်။ ကြက်သွန်ဖြူနဲ့ ချိစ်ခဲတို့ကို မွှမွှလေးတွေဖြစ်အောင် ခြစ်ထားပေးပါ။

 

ပထမဆုံးအနေနဲ့ ပန်းဂေါ်ဖီကို ပြုတ်ပါမယ်။ ဆားလေးနည်းနည်းထည့်ပြီးပြုတ်ပါ။ အရမ်းနူးသွားအောင် မပြုတ်ရပါဘူး။ အရောင်ပြောင်းသွားပြီဆိုရင် အိုးထဲကဆယ်ပြီး ဓားနဲ့ နုပ်နုပ်စင်းလိုက်ရပါတယ်။ ပူနေတုန်းလေး နုပ်နုပ်စင်းမှ ပိုအဆင်ပြေပါတယ်။ ပြီးရင်တော့ ပန်းဂေါ်ဖီတွေနဲ့အတူ ကြက်ဥ၊ ဆား၊ ပေါင်မုန့်ခြောက်အမှုန့်၊ ချိစ်၊ ကြက်သွန်ဖြူတို့ကို ရောထည့်ပြီး ဇွန်းလေးနဲ့ နယ်ပေးပါ။ လက်နဲ့နယ်မယ်ဆိုရင် ပန်းဂေါ်ဖီတွေ ပျော့ပြဲသွားနိုင်ပါတယ်။ ၁၅ မိနစ်မှ မိနစ် ၂၀ ထိ ထားလိုက်ရင် နယ်ထားတာတွေ အေးသွားပါလိမ့်မယ်။

 

ပြီးသွားရင်တော့ ကိုယ်လိုချင်တဲ့ ပုံစံလေးအတိုင်း ပုံဖော်လို့ရပါပြီ။ လေးထောင့်တုံးလေးတွေလုပ်မလား အဝိုင်းပြားလေးတွေလုပ်မလား စိတ်ကြိုက်သာရွေး။ ဒီလိုမှမဟုတ်လည်း ပုံစံခွက်လေးတွေနဲ့ထည့်ဖုတ်လည်း ရပါတယ်။ ပုံစံရပြီဆို မီးဖိုထဲမှာ အပူချိန် ၄၀၀ ဒီဂရီဖာရင်ဟိုက် (၂၀၀ ဒီဂရီဆဲလ်စီးယပ်)နဲ့ မိနစ် ၂၀ ကြာ ဖုတ်ပေးရပါမယ်။ အချိန်စေ့သွားပြီဆိုရင် မီးဖိုကိုဖွင့်လိုက်တာနဲ့ အနံ့လေးမွှေးပြီး အညိုရောင်သမ်းနေတဲ့ ပန်းဂေါ်ဖီ Tot လေးတွေ ရပြီပေါ့။ လူကြီးလည်းကြိုက် ကလေးလည်းကြိုက်တဲ့ အရသာရှိရှိ Tot လေးတွေကို လုပ်စားကြည့်ပါလို့.......။

Source : Tasty


Author


က္က