Fortis-Escorts ဆေးရုံက ဒေါက်တာ Rupali Datta ရဲ့အဆိုအရဆိုရင် ချက်ပြုတ်လိုက်မယ်ဆိုရင် တချို့ အစားအစာတွေထဲက ဗိုက်တာမင်စီတို့၊ ဘီတို့ကို ပျောက်ကွယ်သွားစေနိုင်ပါတယ်တဲ့။ ဒါကြောင့် တချို့အစားအစာတွေကို မချက်ပြုတ်ဘဲ အစိမ်းစားခြင်းဖြင့် အာဟာရတန်ဖိုးတွေကို အပြည့်အဝရယူနိုင်ပါတယ်။

၁။ ပန်းဂေါ်ဖီ

ဒီ အစိမ်းရောင်ဟင်းသီးဟင်းရွက်မှာ ဗိုက်တာမင်စီနဲ့ ကယ်လ်ဆီယမ် အထူးကြွယ်ဝပါတယ်။ ဒါ့အပြင် သူ့မှာ သွေးတိုးကျစေတဲ့ sulforaphane ဆိုတဲ့ ဓာတ်ပေါင်းတစ်မျိုးလည်းပါဝင်ပြီး နှလုံးကျန်းမာရေးကို အထူးကောင်းမွန် စေနိုင်ပါတယ်။ လေ့လာချက်တွေအရ ပန်းဂေါ်ဖီကို ပြုတ်လိုက်မယ်ဆိုရင် sulforaphane ပမာဏကို (၇၀) ရာခိုင်နှုန်းထိ ကျဆင်းသွားစေနိုင်ပါတယ်တဲ့။

၂။ အုန်းသီး

ဒီတိုင်း အစိမ်းစားမယ်ဆိုရင် အုန်းသီးဟာ ရေဓာတ်ပြန်လည်ပြည့်ဝစေတဲ့ အကောင်းဆုံးအစားအစာတစ်ခုဖြစ်ပြီး electrolyte ပမာဏ မြင့်မားစွာပါဝင်မှုကြောင့် နာမည်ကြီးပါတယ်။ အုန်းသီးကို အခြောက်လှန်းပြီး အုန်းသီးခြောက်အဖြစ် စားရင်လည်း အာနိသင်တူတူပဲ ဆိုပေမယ့် အစိမ်းစားရင်တော့ ပိုကောင်းတာပေါ့။ အထူးသဖြင့် ပင်လယ်ခရီးသွားတွေ ဆီဓာတ်နဲ့ ရေဓာတ်ပြည့်ဝနေစေဖို့ အုန်းသီးခြောက်လေး ဆောင်ထားသင့်ပါတယ်။

၃။ ပန်းသီး

ပန်းသီးကို အခြောက်လှမ်းလိုက်မယ်ဆိုရင် ရေဓာတ်ခမ်းခြောက်ပြီး ပန်းသီးထဲမှာပါဝင်တဲ့ အာဟာရနဲ့ သတ္ထုဓာတ် အများစုဟာ ကုန်ခမ်းသွားနိုင်ပါတယ်။ ဒါ့အပြင် ပန်းသီးကို အခြောက်လှမ်းလိုက်မယ်ဆိုရင် သကြားဓာတ်တွေ ပိုမိုများပြားလာပြီး ကျန်းမာရေးနဲ့ မလျော်ညီတဲ့ ကယ်လိုရီနဲ့ ကာဘိုဟိုက်ဒရိတ်တွေ ပိုမိုများပြားလာစေနိုင်မှာပါ။

၄။ ငရုပ်ပွသီး

ငရုပ်ပွသီးမှာလည်း ဗိုက်တာမင်စီ ပမာဏ မယုံကြည်နိုင်လောက်အောင် များပြားစွာပါဝင်ပါတယ်။ အမေရိကန်နိုင်ငံက အမျိုးသားကျန်းမာရေးသိပ္ပံဋ္ဌာနရဲ့အဆိုအရတော့ ငရုပ်ပွသီးတွေကို အပူချိန် (၃၇၅) ဒီဂရီလောက်နဲ့ ချက်ပြုတ်လိုက်မယ်ဆိုရင် ဗိုက်တာမင်စီအပါအဝင် အာဟာရဓာတ်တွေ ကုန်ခမ်းသွားမယ်လို့ ဆိုပါတယ်။

၅။ ဘယ်ရီသီး

ဘယ်ရီသီးခြောက်တွေဟာ လတ်လတ်ဆတ်ဆတ်ဘယ်ရီသီးတွေလောက်တော့ အာဟာရတန်ဖိုး ပြည့်မီမှာ မဟုတ်ပါဘူး။ ဘာလို့လဲဆိုတော့ အခြောက်လှမ်းလိုက်ချိန်မှာ ဘယ်ရီသီးမှာပါဝင်တဲ့ ဗိုက်တာမင်နဲ့ သတ္ထုဓာတ်တွေဟာ ပျောက်ကွယ်သွားလို့ပါပဲ။

၆။ သီဟိုစေ့၊ သစ်ကြားစေ့

သီဟိုစေ့လှော်တို့၊ သစ်ကြားစေ့တို့ကို လှော်စားတာထက် အစိမ်းစားတာက သူ့မှာပါဝင်တဲ့ သံဓာတ်၊ မဂ္ဂနီစီယမ်နဲ့ ဖော့စ်ဖရိတ်ဓာတ်တွေကို ပိုမိုရရှိစေနိုင်ပါတယ်။

Source: Food.ndtv